ബ്രിട്ടനിലും യു.എസിലും ഇപ്പോള്‍ മുലപ്പാല്‍ വിലയ്ക്ക് കിട്ടാന്‍ തുടങ്ങിയിട്ടുണ്ട്. മക്കള്‍ കുടിച്ച് അധികം വരുന്ന പാല്‍ വില്‍ക്കാന്‍ അമ്മമാര്‍ അഭയം പ്രാപിച്ചിരിക്കുന്നത് ഫേസ്ബുക്ക് പോലുള്ള സോഷ്യല്‍ നെറ്റ്‌വര്‍ക് സൈറ്റുകളെയാണ്. ഒട്ടേറെ ഗ്രൂപ്പുകളും ഇപ്പോള്‍ മുലപ്പാലിന്റെ ആവശ്യക്കാരെ കണ്ടെത്താന്‍ സജീവമാണ്.
പുകവലിക്കാത്ത, മദ്യപിക്കാത്ത, ആരോഗ്യമുള്ള അമ്മമാരുടെ പാല്‍ വില്പനയ്ക്ക് എന്നതാണ് ഇവരുടെ പരസ്യം. പാല്‍ വില്‍ക്കാന്‍ ഒട്ടേറെ അമ്മമാര്‍ സൈറ്റില്‍ പേരു രജിസ്റ്റര്‍ ചെയ്ത് തയാറായി ക്യൂ നില്‍ക്കുകയാണ്. ആവശ്യക്കാരന്‍ പേരു രജിസ്റ്റര്‍ ചെയ്താല്‍ മുലപ്പാല്‍ വീട്ടിലെത്തും. ചൂടോടെയോ അതോ ഫ്രീസ് ചെയ്തതോ മുലപ്പാല്‍ ലഭിക്കും. ബ്രിട്ടണില്‍ ഔണ്‍സിന് ഒരു പൗണ്ടും യു.എസില്‍ ഔണ്‍സിന് രണ്ട് ഡോളറുമാണ് ഈടാക്കുന്നത്.
കുഞ്ഞ് എത്രകുടിച്ചാലും കുറേയൊക്കെ മുലപ്പാല്‍ മിച്ചം വരും. ഇത്രയധികം പോഷകഗുണമുള്ള പാല്‍ വെറുതെ കളയുന്നത് ശരിയല്ലല്ലോ എന്നാണ് മുലപ്പാല്‍ വില്‍പനക്കാര്‍ പറയുന്ന ന്യായം. നാല് ഔണ്‍സ് പാലിന് 18 പൗണ്ടാണ് വരെയാണ് വില. ലണ്ടനിലെ എബ്ഡണ്‍ എന്ന യുവതിയാണ് മുലപ്പാല്‍ വില്‍പ്പന ഇന്റര്‍നെറ്റിലൂടെ ആദ്യം തുടങ്ങിയത്. പ്രസവശേഷം ലീവായതിനാല്‍ വീട്ടില്‍ വെച്ചുതന്നെയാണ് എബിഡണിന്റെ കച്ചവടം.
ഇന്റര്‍നെറ്റില്‍ 'മുലപ്പാല്‍ വില്പനയ്ക്ക്' എന്ന് പരസ്യം കൊടുത്തുകൊണ്ടാണ് എബ്ഡണ്‍ ഈ അപൂര്‍വമായ വില്പനയ്ക്ക് തുടക്കം കുറിച്ചത്. മുലപ്പാല്‍ ആവശ്യത്തിനില്ലാത്ത സ്ത്രീകള്‍ പരസ്യം കണ്ടു വരുമെന്നാണ് കരുതിയത്. കുട്ടിക്ക് പാല്‍ കൊടുക്കാനായി അവര്‍ക്ക് മുലപ്പാല്‍ ആവശ്യമായിവരുമല്ലോ. വില്‍പനക്കാരെപോലും അമ്പരപ്പിച്ചുകൊണ്ട് പുരുഷന്‍മാരാണ് ആവശ്യക്കാരായി കൂടുതലും എത്തുന്നത്.
കസ്റ്റമേഴ്‌സിനെ ആകര്‍ഷിക്കാനായി മുലപ്പാലിന്റെ ഗുണഗണങ്ങളെപ്പറ്റിയും രോഗപ്രതിരോധശേഷിയെപ്പറ്റിയുമൊക്കെ പരസ്യത്തില്‍ വര്‍ണിക്കുന്നുണ്ട്. ആളുകള്‍ മുലപ്പാല്‍ വാങ്ങാനെത്തുന്നത് ഇതൊക്കെ മനസിലാക്കിക്കൊണ്ടായിരിക്കുമെന്നാണ് വില്‍പനക്കാര്‍ പറയുന്നത്.
മുലപ്പാല്‍ വാങ്ങാന്‍ വരുന്നവരോട് വില്‍പനക്കാര്‍ കൂടുതല്‍ ചോദ്യങ്ങളൊന്നും ചോദിക്കാറില്ല. അവരുടെ ജീവിതത്തിലേക്ക് ഒളിഞ്ഞുനോക്കാന്‍ അവര്‍ക്ക് താല്‍പര്യവുമില്ല. വില്പനയ്ക്കു മുമ്പ് കസ്റ്റമറുമായി ഇമെയിലിലൂടെയാണ് ബന്ധപ്പെടുന്നത്. വില പറഞ്ഞുറപ്പിച്ച ശേഷം നേരില്‍ കാണാനെത്താന്‍ ആവശ്യപ്പെടും. അതിനു ശേഷമാണ് വില്പന.
മുലപ്പാല്‍ വില്പനയ്ക്ക് ഒട്ടേറെ നിയമപരമായ നിബന്ധനകളുമുണ്ട്. മില്‍ക്ക് ബാങ്കുകള്‍ വഴി മാത്രമാണ് മുലപ്പാല്‍ ദാനം ചെയ്യുകയോ സ്വീകരിക്കുകയോ ചെയ്യാനാവുക. കുട്ടികളെ മുലയൂട്ടാന്‍ കഴിയാത്ത അമ്മമാരുടെ കുഞ്ഞുങ്ങള്‍ക്ക് വേണ്ടി മാത്രമാണ് ഇവിടെ പാല്‍ സൂക്ഷിക്കുന്നത്. പാല്‍ യഥേഷ്ടമുണ്ടെന്ന് പരിശോധിച്ച് ഉറപ്പുവരുത്തിയശേഷം മാത്രമേ ഇവിടങ്ങളില്‍ പാല്‍ ശേഖരിക്കുകയുള്ളൂ.
വില്പന സോഷ്യല്‍ നെറ്റ്‌വര്‍ക്കുകള്‍ വഴിയായതോടെ നിബന്ധനകളും നിയന്ത്രണങ്ങളും ഇല്ലാതായിരിക്കുകയാണ്. ഈ അനധികൃത പാല്‍വില്‍പനയ്‌ക്കെതിരെ ആരോഗ്യ വിദഗ്ദ്ധരും സാമൂഹ്യ പ്രവര്‍ത്തകരും പ്രതിഷേധവുമായി രംഗത്തുവന്നിട്ടുണ്ട്. യാതൊരു പരിശോധനയും കൂടാതെ, ഗുണനിലവാരം ഉറപ്പാക്കാതെ ഇത്തരത്തില്‍ പാല്‍ വാങ്ങുന്നതിനെതിരെ ഡോക്ടര്‍മാര്‍ അമ്മമാര്‍ക്ക് മുന്നറിയിപ്പ് നല്‍കി കഴിഞ്ഞു. ചില അമ്മമാര്‍ മക്കളെ വേണ്ടരീതിയില്‍ മുലയൂട്ടാതെ ഉള്ള പാല്‍ വിറ്റു കാശാക്കുന്നതിനെതിരെ വിവിധ സംഘടനകളും പ്രതിഷേധമുയര്‍ത്തുന്നു.
Keywords: Social Network, Mother, London, Child, Facebook, World
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
