കാഞ്ഞങ്ങാട്ടെ പ്രാകൃത കൊല: മാധ്യമങ്ങള്‍ പറയാത്തത്

Ibrahim

മലദ്വാരത്തിലൂടെ എയര്‍ കംപ്രസര്‍ ഉപയോഗിച്ച് കാറ്റിടച്ച് കയറ്റിയതിനെ തുടര്‍ന്ന് യുവാവ് മരിക്കാനിടയായ സംഭവത്തില്‍ നാട്ടുകാര്‍ കൈക്കൊണ്ട സഹിഷ്ണുതയെ അഭിനന്ദിക്കാതെ വയ്യ. കാഞ്ഞങ്ങാട് തായല്‍ കൊളവയല്‍ സ്വദേശിയായ ഇബ്രാഹിമാണ് മൂന്നു ബിഹാര്‍ സ്വദേശികളുടെ ക്രൂര പീഡനത്തെ തുടര്‍ന്ന് ദാരുണമായി മരിച്ചത്.

വെള്ളിയാഴ്ച ജുമാനിസ്‌കാരത്തിന് പോകണമെന്ന് ആവശ്യപ്പെട്ടപ്പോഴാണ് ഇബ്രാഹിമിനെ വര്‍ക്ക് ഷോപ്പിലെ മൂന്ന് സഹതൊഴിലാളികള്‍ നിഷ്ടൂരമായി പീഡിപ്പിച്ചതെന്നത് സംഭവത്തിന്റെ ഗൗരവം വര്‍ദ്ധിപ്പിക്കുന്നു. എന്നിട്ടും നാട്ടുകാര്‍ സംയമനം വെടിഞ്ഞില്ല. ഇത് വര്‍ഗീയ കലാപത്തിന് വരെ വഴിവെയ്ക്കാവുന്ന സംഭവമാണെങ്കിലും നടക്കാതിരുന്നത് നാട്ടുകാരുടെ അങ്ങേയറ്റത്തെ ഹൃദയ നൈര്‍മല്യം കൊണ്ടുതന്നെയാണ്.

Renjan Kumar

കാഞ്ഞങ്ങാട്ടെ കാര്‍ സര്‍വീസ് സ്റ്റേഷനില്‍ ജോലി ചെയ്തു വരുന്ന രഞ്ജന്‍ കുമാര്‍, സോനു, പങ്കജ് എന്നിവരാണ് ഇബ്രാഹിമിനെ കേട്ടുകേള്‍വിയില്ലാത്ത രീതിയില്‍ പീഡിപ്പിച്ചത്. മൂവരും ഇബ്രാഹിമിനെ പിടിച്ചുവെച്ച ശേഷം മലദ്വാരത്തിലൂടെ ശക്തമായി കാറ്റ് അടിച്ചുകയറ്റുകയായിരുന്നു. ശക്തമായ കാറ്റില്‍ ഇബ്രാഹിമിന്റെ കുടല്‍ വീര്‍ത്ത് പൊട്ടുകയും ആന്തരികാവയവങ്ങള്‍ക്ക് ക്ഷതം സംഭവിക്കുകയും സംഭവ സ്ഥലത്തുതന്നെ ഇബ്രാഹിം ബോധം കെട്ടുവീഴുകയുമായിരുന്നു.

ഒക്ടോബര്‍ 14നാണ് ഈ സംഭവം നടന്നത്. തുടര്‍ന്ന് കാഞ്ഞങ്ങാട്ടെ സ്വകാര്യ ആശുപത്രിയിലും പിന്നീട് മംഗലാപുരം ഫാദേര്‍സ് മുള്ളേര്‍സ് ആശുപത്രിയിലും മരണത്തോട് മല്ലിട്ട് കഴിഞ്ഞ ഇബ്രാഹിം ശനിയാഴ്ച രാത്രിയാണ് വേദനയില്ലാത്ത ലോകത്തേക്ക് യാത്രയായത്.

Pankaj

കാഞ്ഞങ്ങാട്ടും പരിസരങ്ങളിലും നിരവധി ബിഹാര്‍ സ്വദേശികളും മറ്റ് സംസ്ഥാന തൊഴിലാളികളും താമസിച്ച് തൊഴില്‍ ചെയ്തു വരുന്നുണ്ട്. എന്നാല്‍ ഇബ്രാഹിം മരണപ്പെട്ട വിവരമറിഞ്ഞിട്ടും ആരും അവരെ ദ്രോഹിക്കാന്‍ ശ്രമിക്കുന്നില്ല. സാധാരണ ഗതിയില്‍ ചെറിയ ഒരു വാഹനാപകമുണ്ടായാല്‍ പോലും ഡ്രൈവര്‍മാരെ ഓടിച്ചു തല്ലുകയും വാഹനങ്ങള്‍ക്ക് തീയിടുകയും ചെയ്യുന്ന പ്രവണത നാട്ടില്‍ വളര്‍ന്ന് വരുമ്പോഴാണ് കാഞ്ഞങ്ങാട്ട് ഇത്തരത്തിലുള്ള വിധ്വംസക പ്രവര്‍ത്തനങ്ങളൊന്നും നടന്നില്ലെന്നത് ആശ്വാസം പകരുന്നു. കാളപ്പെറ്റെന്ന് കോള്‍ക്കുമ്പോള്‍ തന്നെ കയറെടുക്കുന്നവര്‍ നമ്മുടെ സംസ്ഥാനത്ത് കുറവല്ലല്ലോ.

കേരളത്തിന്റെ മറ്റേതെങ്കിലും ഭാഗത്തോ അന്യ സംസ്ഥാനങ്ങളിലോ ആയിരുന്നു മേല്‍പറഞ്ഞ ക്രൂരകൃത്യം നടന്നതെങ്കില്‍ എന്തായിരിക്കും സ്ഥിതിയെന്ന് ഊഹിക്കാവുന്നതേയുള്ളു. കാഞ്ഞങ്ങാട്ട് യാതൊരു തരത്തിലുമുള്ള നിയമ ലംഘന പ്രവര്‍ത്തനങ്ങളും നടന്നില്ലെന്നത് ഭാഗ്യം കൊണ്ടുകൂടിയാണ്. ഒരു അക്രമത്തെ മറ്റൊരു അക്രമം കൊണ്ട് നേരിടുന്നത് കൊണ്ട് ഒന്നും നേടുന്നില്ലെന്ന തിരിച്ചറിവും ഇവിടെ എടുത്തുപറയേണ്ടതാണ്.

Sonu

ഈ ഹൃദയ വിശാലത പുലര്‍ത്തിയ കാഞ്ഞങ്ങാട്ടുകാരെ എങ്ങനെയാണ് അഭിനന്ദിക്കാതിരിക്കുക. പ്രവാചകന്‍ കാണിച്ചുതന്നതും സംയമനത്തിന്റെ മാര്‍ഗം തന്നെയായിരുന്നുവല്ലോ. ജീവനോട് മല്ലടിച്ച് ആശുപത്രിയില്‍ കഴിഞ്ഞ ഇബ്രാഹിം വേദനയില്ലാത്ത ലോകത്തേക്ക് യാത്രയായത് ത്യാഗത്തിന്റെയും സഹിഷ്ണുതയുടേയും സന്ദേശം നല്‍കുന്ന ബലിപെരുന്നാള്‍ ദിനത്തിലായിരുന്നുവെന്നതും യാദൃശ്ചികതയാകാം.

ഓട്ടോയില്‍ മറന്നുവെച്ച ചില്ലിക്കാശ് തിരിച്ചേല്‍പ്പിച്ച് സത്യസന്ധത വിളംബരം ചെയ്യുന്നവരും, അവരെ കൊണ്ടാടുന്നവരും കാഞ്ഞങ്ങാട്ടുകാരുടെ മഹാമനസ്‌ക്കതയെ തമസ്‌ക്കരിക്കുകയായിരുന്നു. ഇങ്ങനെയല്ല, സംഭവം നേരെ തിരിച്ചായിരുന്നെങ്കില്‍ ഇവിടെ എന്തൊക്കെ സംഭവിക്കുമായിരുന്നു. ചാനല്‍ ചര്‍ച്ചകളും, വാര്‍ത്താ സമ്മേളനങ്ങളും, പത്രങ്ങള്‍ക്ക് പ്രത്യേക പതിപ്പുകളും, ശാന്തിയാത്ര പ്രഹസനങ്ങളും ഘോരഘോരമുള്ള പ്രസംഗങ്ങളും ഇവിടെയുണ്ടാകുമായിരുന്നവെന്നത് അവയില്‍ ചിലത് മാത്രം. കലികാലവൈഭവം എന്നല്ലാതെ ഇതേ കുറിച്ച മറ്റെന്ത് പറയാന്‍.
മലദ്വാരത്തിൽ കാറ്റടിച്ചുകയറ്റിയസംഭവം: ഗുരുതരനിലയിലായിരുന്ന യുവാവ് മരിച്ചു

മറുനാടന്‍ തൊഴിലാളികള്‍ കൊലയാളികളാകുന്നു