നികോളാസ് മധുരോ വെനിസ്വലയില്‍ താല്‍ക്കാലിക പ്രസിഡന്റ്

കരാക്കസ്: ഹ്യൂഗോ ഷാവേസിന്റെ നിര്യാണത്തെ തുടര്‍ന്ന് വൈസ് പ്രസിഡന്റ് നികോളാസ് മധുരോ വെനിസ്വലയുടെ താല്‍ക്കാലിക പ്രസിഡന്റാകും. ഷാവേസ് മരണപ്പെടും മുമ്പുള്ള തീരുമാനപ്രകാരമാണ് മധുരോ ചുമതലയേറ്റെടുക്കുകയെന്ന് വിദേശകാര്യമന്ത്രി ഏലിയാസ് ജൗവ അറിയിച്ചു. വരുന്ന ഒരു മാസത്തിനുള്ളില്‍ പുതിയ തിരഞ്ഞെടുപ്പ് നടക്കും.

14 വര്‍ഷം ജനഹൃദയത്തില്‍ ജീവിച്ച വെനിസ്വലയിലെ ജനകീയ നേതാവ് ശ്വാസകോശത്തിലെ അണുബാധ മൂര്‍ച്ഛിച്ചതിനെ തുടര്‍ന്ന് കാറക്കസിലെ സൈനിക ആശുപത്രിയില്‍ പ്രാദേശിക സമയം ചൊവ്വാഴ്ച വൈകിട്ട് 4.25നാണ് അന്തരിച്ചത്. അര്‍ബുദം ബാധിച്ചതിനെ തുടര്‍ന്ന് ഏറെ നാളായി ചികിത്സയിലായിരുന്നു. ഔദ്യോഗിക ടെലിവിഷനില്‍ വൈസ് പ്രസിഡന്റ് മധുരോയാണ് മരണവാര്‍ത്ത പുറത്തുവിട്ടത്. സംസ്‌കാരചടങ്ങുകള്‍ വെള്ളിയാഴ്ച നടക്കും. രാജ്യത്ത് ഏഴു ദിവസത്തെ ഔദ്യോഗിക ദു:ഖാചരണം പ്രഖ്യാപിച്ചിട്ടുണ്ട്. സ്വാമ്രാജ്യത്വത്തിനെതിരായ ഒറ്റയാള്‍ പോരാട്ടത്തിലൂടെ ഒരു ദേശത്തിന്റെ സ്‌നേഹവും ലോകത്തിന്റെ ശ്രദ്ധയും പിടിച്ചുപറ്റിയ ഷാവേസിന്റെ മരണ വാര്‍ത്ത ഏവരും കണ്ണീരോടെയാണ് ശ്രവിച്ചത്.

കേവലം ബസ് ഡ്രൈവര്‍ ആയിരുന്ന നികോളാസ് മദുരൊ യില്‍ നിന്നും വൈസ് പ്രസിഡന്റ് സ്ഥാനത് എത്തിയ മദുരൊ, താല്‍കാലിക ഭരണ കര്‍ത്താവിന്റെ സ്ഥാനത്തേക്ക് എത്തിയത് പടി പടിയായ വളര്‍ച്ചയിലൂടെ ആയിരുന്നു.