ബാംഗ്ലൂര്‍ ഏകദിനം: രോഹിത് ശര്‍മയ്ക്ക് ഇരട്ട സെഞ്ച്വറി; ഇന്ത്യയ്ക്ക് കൂറ്റന്‍ സ്‌കോര്‍

ബാംഗ്ലൂര്‍: ഓസ്‌ട്രേലിയയ്‌ക്കെതിരായ ഏകദിന പരമ്പരയിലെ നിര്‍ണായകമായ അവസാന മത്സരത്തില്‍ രോഹിത് ശര്‍മയുടെ (209) ഇരട്ട സെഞ്ച്വറിയുടെ പിന്‍ബലത്തില്‍ ഇന്ത്യയ്ക്ക് കൂറ്റന്‍ സ്‌കോര്‍. 16 സിക്‌സറുകളുടെയും 12 ബൗണ്ടറികളുടെയും അകമ്പടിയോടെ 156 പന്തുകളില്‍ നിന്നായിരുന്നു ശര്‍മയുടെ ഇരട്ട സെഞ്ച്വറി നേട്ടം. ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറില്‍ ആറ് വിക്കറ്റ് നഷ്ടത്തില്‍ 383 റണ്‍സാണ് നേടിയത്. നായകന്‍ ധോണി 38 പന്തുകളില്‍ നിന്ന് 68 റണ്‍സ് നേടി ശര്‍മയ്ക്ക് പിന്തുണയേകി.
ഏകദിന ക്രിക്കറ്റില്‍ ഇരട്ട സെഞ്ച്വറി നേടുന്ന മൂന്നാമത്തെ താരമാണ് രോഹിത് ശര്‍മ. നേരത്തെ മാസ്റ്റര്‍ ബ്ലാസ്റ്റര്‍ സച്ചിന്‍ ടെന്‍ഡുക്കറും, വിരേന്ദര്‍ സേവാഗുമാണ് ഈ നേട്ടം കൈവരിച്ചത്. ഏകദിന ക്രിക്കറ്റിലെ ഏറ്റവും ഉയര്‍ന്ന രണ്ടാമത്തെ സ്‌കോര്‍ രോഹിത് ശര്‍മയുടെ പേരിലായി. 219 റണ്‍സുമായി വിരേന്ദര്‍ സേവാഗാണ് മുന്നിലുള്ളത്.

ആദ്യ വിക്കറ്റില്‍ ശര്‍മ - ധവാന്‍ (60) സഖ്യം 112 റണ്‍സിന്റെ കൂട്ടുകെട്ടാണ് പടുത്തുയര്‍ത്തിയത്. ദോഹര്‍ത്തിയുടെ പന്തില്‍ വിക്കറ്റിന് മുന്നില്‍ കുരുങ്ങി ധവാന്‍ പുറത്തായതോടെ ക്രീസിലിറങ്ങിയ കോഹ്ലിക്ക് തുടക്കത്തില്‍ തന്നെ പിഴച്ചു. സ്‌കോര്‍ കണ്ടെത്തുന്നതിന് മുമ്പെ കോഹ്ലി റണ്ണൗട്ടായി.