കേരളത്തിന്റെ മനസുതൊടാന്‍ കനേഡിയന്‍ ദമ്പതിജോഡികളുടെ സൈക്കിള്‍ സവാരി

സുബൈര്‍ പള്ളിക്കാല്‍
കാസര്‍കോട്: കേരളത്തിന്റെ മണ്ണും മനസും തൊട്ടറിയാന്‍ കനേഡിയന്‍ ദമ്പതി ജോഡികളുടെ സൈക്കിള്‍ സവാരി. കാനഡയിലെ റഗിന യൂണിവേഴ്‌സിറ്റി അധ്യാപകരായ ചാഡ് (27), ഭാര്യ മെഗാന്‍ (25), ഫാര്‍മസിസ്റ്റുകളായ നഥാന്‍ (27), ഭാര്യ ആറോണ്‍ (25) എന്നിവരാണ് സൈക്കിളില്‍ കേരള പര്യടനം നടത്തുന്നത്. കേരളം മാത്രമല്ല ഇന്ത്യയൊട്ടാകെ സഞ്ചരിച്ച് അറിവും അനുഭവങ്ങളും ഒപ്പിയെടുക്കാനാണ് ഇവരുടെ യാത്ര.

ഒക്ടോബര്‍ 25ന് മുംബൈയില്‍ വിമാനമിറങ്ങിയ ഇവര്‍ ട്രെയിനില്‍ ഗോവയില്‍ എത്തുകയും അവിടെനിന്ന് മംഗലാപുരം വഴി ബുധനാഴ്ച കാസര്‍കോട്ട് എത്തുകയുമായിരുന്നു. കാസര്‍കോട്ടെ ലോഡ്ജില്‍ ബുധനാഴ്ച തങ്ങിയ ഇവര്‍ വ്യാഴാഴ്ച രാവിലെ സൈക്കിളില്‍ കാസര്‍കോടിന്റെ വിവിധ പ്രദേശങ്ങള്‍കാണാന്‍ ഇറങ്ങിത്തിരിച്ചു.

ഇന്ത്യമുഴുവന്‍ ആറ് മാസംകൊണ്ട് സഞ്ചരിക്കാനും തുടര്‍ന്ന് ശ്രീലങ്കയിലേക്ക് പോകാനുമാണ് ഉദ്ദേശിക്കുന്നതെന്ന് ഇവര്‍ പറഞ്ഞു. ദീര്‍ഘദൂരത്തേക്ക് ട്രെയിനുകളില്‍ യാത്രചെയ്യുന്ന ഇവര്‍ സൈക്കിളുകള്‍ കൂടെ കൊണ്ടുപോവുകയാണ് പതിവ്. വസ്ത്രങ്ങളടങ്ങിയ കൂറ്റന്‍ ബാഗും യാത്രയില്‍ കൊണ്ടുപോകും. അതാത് സ്ഥലത്തെത്തുമ്പോള്‍ നാട്ടുകാരുമായി സംസാരിച്ചാണ് പ്രദേശത്തിന്റെ പ്രത്യേകതകളും ടൂറിസ്റ്റ് കേന്ദ്രങ്ങളെകുറിച്ചും മനസിലാക്കുന്നത്. രാവിലെ കാസര്‍കോട്ട് നിന്ന് യാത്ര പുറപ്പെട്ടപ്പോള്‍ തന്നെ സൈക്കിള്‍ കേടായത് ഇവര്‍തന്നെ നന്നാക്കുകയായിരുന്നു. തകര്‍ന്ന റോഡുകള്‍ യാത്ര ദുഷ്‌ക്കരമാക്കുമ്പോഴും തളരാത്ത ആവേശവുമായി കേരളത്തിന്റെ മണ്ണും മനസും അറിയാന്‍ മുന്നോട്ട് കുതിക്കുകയാണ് ഈ ദമ്പതി ജോഡികള്‍.

ഇന്ത്യയെകുറിച്ച് ഏറെ വായിച്ച് മനസിലാക്കിയ തങ്ങള്‍ക്ക് ഈ മണ്ണില്‍ കാലുകുത്തിയപ്പോള്‍ പറഞ്ഞറിയിക്കാനാവാത്ത ആനന്ദമാണ് അനുഭവപ്പെടുന്നതെന്ന് ഇവര്‍ പറയുന്നു. കേരളം ദൈവത്തിന്റെ സ്വന്തം നാട് ആണെന്ന് തങ്ങള്‍ അനുഭവിച്ചറിയുന്നതായും ഇവര്‍ പറഞ്ഞു. എവിടെചൊല്ലുമ്പോഴും ആളുകള്‍ അടുത്തുകൂടി ലോഹ്യംപറയുകയും സഹായത്തിനെത്തുകയും ചെയ്യാറുണ്ടെന്നും മലയാളികളുടെ നല്ലമനസാണ് ഇതില്‍നിന്ന് മനസിലാകുന്നതെന്നും ഇവര്‍ കൂട്ടിച്ചേര്‍ത്തു.