പ്രശസ്ത നടി സുകുമാരി അന്തരിച്ചു

ഇന്ത്യയിലെ മിക്ക ഭാഷകളിലും അഭിനയിച്ച സുകുമാരി സവിശേഷവും ആര്‍ക്കും അനുകരിക്കാന്‍ കഴിയാത്തതുമായ അഭിനയ സിദ്ധിയുള്ള നടിയാണ്. സ്വന്തം ശബ്ദത്തില്‍ ഡബ്ബ് ചെയ്യുക എന്നത് സുകുമാരിക്ക് നിര്‍ബന്ധമാണ്.

പ്രധാനമായും മലയാളം, തമിഴ് എന്നീ ഭാഷകളില്‍ അഭിനയിച്ച തെന്നിന്ത്യന്‍ ചലച്ചിത്ര നടിയായിരുന്നു സുകുമാരി. ചലച്ചിത്രരംഗത്ത് 60 വര്‍ഷത്തിലേറെയായി അഭിനയിക്കുന്ന അപൂര്‍വം ചില അഭിനേത്രികളില്‍ ഒരാളാണ്. പത്താമത്തെ വയസില്‍ ചലചിത്ര രംഗത്തേക്ക് പ്രവേശിച്ച അവര്‍ തെന്നിന്ത്യന്‍ ഭാഷകളില്‍ 2000ത്തിലധികം ചിത്രങ്ങളില്‍ അഭിനയിച്ചിട്ടുണ്ട്. നാടകങ്ങളിലും ടെലിവിഷന്‍ സീരിയലുകളിലും സുകുമാരി സജീവമായിരുന്നു. രാഷ്ട്രപതിയില്‍ നിന്ന് പത്മശ്രീ പുരസ്‌കാരവും ഒട്ടേറെ സംസ്ഥാന പുരസ്‌കാരങ്ങളും ലഭിച്ചിട്ടുണ്ട്.

1940 ല്‍ തമിഴ്‌നാട്ടിലെ നാഗര്‍കോവില്‍ എന്ന സ്ഥലത്താണ് സുകുമാരി ജനിച്ചത്. അന്നത്തെ മൂന്ന് പ്രധാന നായിക നടിമാരായ ലളിത, പത്മിനി, രാഗിണി എന്നിവരുടെ ബന്ധുവാണ് സുകുമാരി. കഥകളി, കേരള നടനം, ഭരതനാട്യം എന്നിവയില്‍ സുകുമാരി പ്രാവീണ്യം നേടിയിട്ടുണ്ട്. ഗുരു ഗോപിനാഥിന്റെ കീഴിലായിരുന്നു ആദ്യം നൃത്തം പഠിച്ചത്. ഒരറിവ് എന്ന തമിഴ് ചിത്രത്തിലാണ് സുകുമാരി ആദ്യമായി അഭിനയിച്ചത്.

ആദ്യകാല ബ്ലാക് ആന്റ് വൈറ്റ് ചിത്രങ്ങളില്‍ അഭിനയിച്ചതിനുശേഷം പിന്നീട് പുതിയ ചിത്രങ്ങളായ ചേട്ടത്തി, കുസൃതിക്കുട്ടന്‍, കുഞ്ഞാലിമരക്കാര്‍, തച്ചോളി ഒതേനന്‍, യക്ഷി, കരിനിഴല്‍ എന്നിവയിലെ അഭിനയം ശ്രദ്ധേയമായി. പില്‍ക്കാലത്ത് പ്രിയദര്‍ശന്റെ ചിത്രങ്ങളില്‍ ഹാസ്യ വേഷങ്ങളും ചെയ്ത് വളരെ ശ്രദ്ധേയയായി.