Pathram Movie | 'പത്രം' ഇന്നും മലയാളി മനസിൽ നിറഞ്ഞോടുന്നു, ഒപ്പം വിശ്വനാഥനും!

 സുരേഷ് ഗോപിയുടെ കരിയറിൽ ഭരത് ചന്ദ്രനടക്കമുള്ള ഫയർ ബ്രാൻ്റ് കഥാപാത്രങ്ങളുടെ സൃഷ്ടാവായ രഞ്ജി പണിക്കർ, ഫയർ ഒട്ടും ചോർന്ന് പോകാതെയാണ് പത്രത്തിലെ നന്ദഗോപാലിനെയും സൃഷ്ടിച്ചത്. സുരേഷ് ഗോപിയുടെ ജനകീയ കഥാപാത്രങ്ങളിൽ പത്രത്തിലെ നന്ദഗോപാലിനും ഒരിടമുണ്ട്. മിമിക്രി, നാടക വേദികളിലൂടെ സജീവമാവുകയും ചെറിയ ചെറിയ വേഷങ്ങളിലൂടെ സിനിമയിൽ മുഖം കാണിക്കുകയും ചെയ്ത അന്തരിച്ച നടൻ എൻ എഫ് വർഗ്ഗീസ്, ഡെന്നീസ് ജോസഫ് രചന നിർവഹിച്ച് സിബി മലയിൽ സംവിധാനം ചെയ്ത ആകാശദൂതിലെ വില്ലൻ വേഷത്തിലൂടെയാണ് മലയാള സിനിമയിൽ ശ്രദ്ധേയനാവുന്നത്. തുടർന്ന് ചെറുതും വലുതുമായ ഒട്ടേറെ ചിത്രങ്ങളിലൂടെ അദ്ദേഹം ചലച്ചിത്ര രംഗത്തെ സജീവ സാന്നിധ്യമായി മാറി.

 ആകാശദൂതിലെ കേശവന് ശേഷം സല്ലാപത്തിലെ ചന്ദ്രൻ നായരും ലേലത്തിലെ കടയാടി രാഘവനുമെല്ലാം ശ്രദ്ധ നേടിയെങ്കിലും എൻ എഫിൻ്റെ ജനകീയത ഉച്ഛസ്ഥായിയിലെത്തുന്നത് പത്രത്തിലെ വിശ്വനാഥനിലൂടെയാണ്. നായകനൊപ്പം കരുത്തരായിരുന്നു രഞ്ജി പണിക്കരുടെ വില്ലൻമാരും. വില്ലൻ എന്നതിലുപരി പ്രതിനായകൻ എന്ന വിശേഷണമായിരിക്കും ഇവർക്ക് അനുയോജ്യം. ഏകലവ്യനിലെ സ്വാമി അമൂർത്താനന്ദയായാലും മാഫിയയിലെ സൂര്യദേവരാജ ഗൗഡയായലും കമ്മീഷണറിലെ മോഹൻ തോമസ് ആയാലും നായകനൊപ്പം കട്ടക്ക് നിൽക്കും. എന്നാൽ നായകനും മുകളിൽ വന്ന ഒരേയൊരു പ്രതിനായകനേ രഞ്ജിയുടെ തൂലികയിൽ പിറന്നിട്ടുള്ളൂ, അതാണ് വിശ്വനാഥൻ. കൊച്ചിയെന്ന മഹാനഗരത്തെ സ്വന്തം വിരൽ തുമ്പിൽ നിയന്ത്രിക്കുന്ന വിശ്വനാഥൻ. ജോഷിയുടെ പത്രത്തിലെ വിശ്വനാഥൻ.

തുടർ വർഷങ്ങളിൽ രഞ്ജി പണിക്കർ, രഞ്ജിത് എന്നിവർ രചന നിർവഹിച്ച് ജോഷി, ഷാജി കൈലാസ് എന്നിവർ സംവിധാനം ചെയ്ത മാസ് - ആക്ഷൻ ചിത്രങ്ങളിലെ പ്രധാന പ്രതിനായക വേഷം എൻ എഫ് വർഗ്ഗീസിനായിരുന്നു. എക്സ് നക്സലും, ജാഗ്രത എന്ന വർത്തമാന പത്രത്തിൻ്റെ എല്ലാമെല്ലാമായ ശേഖരേട്ടൻ എന്ന കഥാപാത്രം അന്തരിച്ച നടൻ മുരളിയുടെ കരിയറിലെ പ്രധാന വേഷങ്ങളിലൊന്നാണ്. 'വേണമെങ്കിൽ ശേഖരനെ നിനക്ക് കൊല്ലാം, ഇവിടെ വച്ചവസാനിപ്പിക്കാം. പക്ഷേ, ഒരുപാട് തവണ മരണത്തിൽ നിന്നും നീന്തിക്കയറിയ ഈ ശരീരവും മനസ്സും നിൻ്റെ മുന്നിൽ കീഴടങ്ങി കാണണമെങ്കിൽ അതിനിനിയൊരു നൂറ് ജന്മം കൂടി ജനിക്കണം നീ.... നായായും നരിയായും പിന്നെ നരനായിട്ടും.....' എന്ന മുരളിയുടെ തകർപ്പൻ ഡയലോഗ് വർഷങ്ങളോളം മിമിക്രി താരങ്ങൾ ഏറ്റു പറഞ്ഞു.