ന്യൂഡൽഹി: (KVARTHA) വാക്‌സിൻ നിർമാതാവും സെറം ഇൻസ്റ്റിറ്റ്യൂട്ട് ഓഫ് ഇന്ത്യയുടെ സിഇഒയുമായ ശതകോടീശ്വരൻ അദാർ പൂനാവാല വിനോദ വ്യവസായത്തിലേക്ക്. ധർമ്മ പ്രൊഡക്ഷൻസിലും ധർമ്മാറ്റിക് എൻ‌ടർടൈൻമെൻറിലും 50% ഓഹരികൾ 1000 കോടി രൂപയ്ക്ക് ഏറ്റെടുത്തു. നടൻ കരൺ ജോഹറിന്റെ ചലച്ചിത്ര-ടെലിവിഷൻ നിർമ്മാണ-വിതരണ രംഗത്തെ  ഈ കമ്പനിയുടെ മൂല്യം 2000 കോടി രൂപയായി വിലയിരുത്തപ്പെടുന്നു.

സെറീൻ പ്രൊഡക്ഷൻസിലൂടെയാണ് പൂനവല്ല നിക്ഷേപം നടത്തുന്നത്. ധർമ്മ ബാക്കിയുള്ള ഓഹരികൾ നിലനിർത്തും. എക്‌സിക്യൂട്ടീവ് ചെയർമാനെന്ന നിലയിൽ കമ്പനിയുടെ കുന്തമുനയായി കരൺ ജോഹർ തുടരും. അപൂർവ് മേത്ത ചീഫ് എക്‌സിക്യൂട്ടീവ് ഓഫീസറായി തുടരുകയും ചെയ്യും. കമ്പനിയുടെ 90.7 ശതമാനം ഓഹരികൾ കരൺ ജോഹറിന്റെ പേരിലാണ്, ബാക്കിയുള്ള 9.24 ശതമാനം ഓഹരികൾ അമ്മ ഹിരൂ ജോഹറിന്റേതാണ്.

'സുഹൃത്ത് കരൺ ജോഹറിനൊപ്പം രാജ്യത്തെ ഏറ്റവും പ്രശസ്തമായ ഒരു പ്രൊഡക്ഷൻ ഹൗസുമായി പങ്കാളിയാകാൻ അവസരം ലഭിച്ചതിൽ സന്തുഷ്ടനാണ്. ധർമ്മ പ്രൊഡക്ഷൻ ഹൗസിനെ കെട്ടിപ്പടുക്കാനും വളർത്താനും കൂടുതൽ ഉയരങ്ങൾ കൈവരിക്കാനും പ്രതീക്ഷിക്കുന്നു. വരും വർഷങ്ങളിൽ കൂടുതൽ മികച്ച ചിത്രങ്ങൾ സമ്മാനിക്കുമെന്ന് വിശ്വസിക്കുന്നു', അദാര്‍ പൂനവല്ല പ്രസ്താവനയിൽ പറഞ്ഞു.

ധർമ്മ പ്രൊഡക്ഷൻസ്

1976-ൽ യാഷ് ജോഹർ സ്ഥാപിച്ചതും ഇപ്പോൾ കരൺ ജോഹർ നയിക്കുന്നതുമായ ധർമ്മ പ്രൊഡക്ഷൻസ്,  ഇന്ത്യയിലെ പ്രമുഖ ചലച്ചിത്ര നിർമ്മാണ-വിതരണ കമ്പനികളിലൊന്നാണ്. 'കുച്ച് കുച്ച് ഹോത്താ ഹേ', 'കഭി ഖുഷി കഭി ഗം' തുടങ്ങിയ ചിത്രങ്ങൾ വഴി ഇന്ത്യൻ സിനിമയുടെ ചരിത്രത്തിൽ ഒരു പുതിയ അധ്യായം രചിച്ച ധർമ്മ പ്രൊഡക്ഷൻസ്, അവസാനമായി 'ബാഡ് ന്യൂസ് റോക്കി ഔർ റാണി കി പ്രേം കഹാനി', 'ബ്രഹ്മാസ്ത്ര: ഒന്നാം ഭാഗം - ശിവ' തുടങ്ങിയ സിനിമകളിലൂടെയും തങ്ങളുടെ സാന്നിധ്യം അറിയിച്ചു. 

നിരൂപക പ്രശംസയും വാണിജ്യ വിജയവും ഒരുപോലെ നേടിയെടുക്കുന്നതിൽ ധർമ്മ പ്രൊഡക്ഷൻസിന് അതുല്യമായ കഴിവുണ്ട്. ബോളിവുഡിന്റെ പൾസ് അറിയുന്ന ഈ കമ്പനി, ഇന്ത്യൻ സിനിമയിൽ ഒരു പുതിയ തലമുറയെ പ്രചോദിപ്പിക്കുന്നതിൽ നിരന്തരമായ പരിശ്രമം നടത്തുന്നു.  2023 സാമ്പത്തിക വർഷം കമ്പനിക്ക് അതിവേഗ വളർച്ചയും അതേസമയം ചില വെല്ലുവിളികളും നേരിടേണ്ടി വന്നു. 

വരുമാനം നാലിരട്ടിയായി വർധിച്ച് 276 കോടി രൂപയിൽ നിന്ന് 1040 കോടി രൂപയായി ഉയർന്നത് ശ്രദ്ധേയമായ നേട്ടമാണ്. എന്നാൽ അറ്റാദായം 59 ശതമാനം ഇടിഞ്ഞ് 11 കോടി രൂപയായി. വരുമാനത്തിന്റെ കാര്യത്തിൽ വിതരണാവകാശം (656 കോടി രൂപ), ഡിജിറ്റൽ മേഖല (140 കോടി രൂപ), സാറ്റലൈറ്റ് അവകാശം (83 കോടി രൂപ) എന്നിവ പ്രധാന പങ്കുവഹിച്ചു. സംഗീത മേഖലയിൽ നിന്നും 75 കോടി രൂപയുടെ വരുമാനം ലഭിച്ചു.

അദാർ പൂനാവാല

അദാർ പൂനാവാല, സെറം ഇൻസ്റ്റിറ്റ്യൂട്ടിന്റെ സ്ഥാപകനായ സയറസ് പൂനാവാലയുടെ മകനാണ്. പിതാവിന്റെ പാത പിന്തുടർന്ന് വാക്സിൻ നിർമാണ മേഖലയിലേക്ക് എത്തിയ അദാർ, കോവിഡ് മഹാമാരിയുടെ സമയത്ത് ലോകത്തെ ഏറ്റവും വലിയ വാക്സിൻ നിർമാതാക്കളിലൊന്നായി സെറം ഇൻസ്റ്റിറ്റ്യൂട്ടിനെ മാറ്റി. കോവിഷീൽഡ് വാക്സിന്റെ നിർമാണം ഏറ്റെടുത്തതോടെ അദ്ദേഹം ലോക ശ്രദ്ധയിലേക്ക് എത്തി.

ആസ്ട്രസെനെക്കയുമായി സഹകരിച്ച് സെറം ഇൻസ്റ്റിറ്റ്യൂട്ട് നിർമ്മിച്ച കോവിഷീൽഡ് വാക്സിൻ ഇന്ത്യയിലും ലോകത്തിലും വിതരണം ചെയ്തു. ക്യാപിറ്റലൈൻ തയ്യാറാക്കിയ കോർപ്പറേറ്റ് ഡാറ്റാബേസ് പ്രകാരം, കോവിഡ്-19 മഹാമാരി കാലത്ത് 5000 കോടി രൂപയ്ക്കും അതിനുമുകളിലും അറ്റ ​​വിൽപ്പന നേടിയ ഇന്ത്യൻ കമ്പനികളുടെ പട്ടികയിൽ 418 സ്ഥാപനങ്ങൾ ഉണ്ട്. ഈ ലാഭകരമായ കമ്പനികളുടെ പട്ടികയിൽ ഒന്നാം സ്ഥാനത്ത് വാക്സിൻ നിർമ്മാതാക്കളായ സെറം ഇൻസ്റ്റിറ്റ്യൂട്ട് ഓഫ് ഇന്ത്യ ആയിരുന്നു.

#AdarPoonawalla #SerumInstitute #DharmaProductions #KaranJohar #Bollywood #Investment #Covishield