കണ്ണൂർ: (KVARTHA) സർവകലാശാലയ്ക്ക് കീഴിലുള്ള ഗ്രീൻവുഡ് ആർട്സ് ആൻഡ് സയൻസ് കോളേജിലെ ബി.സി.എ പരീക്ഷയുടെ ചോദ്യപ്പേപ്പർ വിതരണത്തിലെ ക്രമക്കേടിൽ പ്രതിഷേധിച്ച് കെ.എസ്.യു പ്രവർത്തകർ സർവകലാശാലയിലേക്ക് നടത്തിയ പ്രതിഷേധ മാർച്ച് സംഘർഷത്തിൽ കലാശിച്ചു.

സർവകലാശാലയുടെ പ്രധാന കവാടത്തിലെ ഗ്രിൽസ് കുലുക്കി അകത്തേക്ക് പ്രവേശിക്കാൻ ശ്രമിച്ച പ്രവർത്തകരെ പോലീസ് ബലമായി തടഞ്ഞു. ഇതേത്തുടർന്ന് പോലീസും കെ.എസ്.യു നേതാക്കളും തമ്മിൽ ഉന്തും തള്ളുമുണ്ടായി.

കണ്ണൂർ ടൗൺ എസ്.ഐ വി.വി ദീപ്തിയുടെ നേതൃത്വത്തിലുള്ള പോലീസ് സംഘം പ്രതിഷേധക്കാരെ ബലപ്രയോഗത്തിലൂടെ പോലീസ് വാഹനത്തിൽ കയറ്റി നീക്കി. കെ.എസ്.യു ജില്ലാ വൈസ് പ്രസിഡന്റ്‌ ആഷിത്ത് അശോകൻ, അർജുൻ കോറോം, കാവ്യ ദിവാകരൻ, അഭിജിത്ത് മടത്തിക്കുളം, അനഘ രവീന്ദ്രൻ, നഹീൽ ടി, തീർത്ഥ നാരായണൻ, അർജുൻ ചാലാട്, വൈഷ്ണവ് കായലോട്, ചാൾസ് സണ്ണി, അബിൻ കെ, പ്രകീർത്ത് മുണ്ടേരി, ദേവനന്ദ കാടാച്ചിറ എന്നിവരാണ് പ്രതിഷേധ സമരത്തിന് നേതൃത്വം നൽകിയത്.

എല്ലാ സംവിധാനങ്ങളും പൂർണ്ണമാകുന്നതുവരെ പരീക്ഷാ ചോദ്യപ്പേപ്പറുകൾ കോളേജുകളിലേക്ക് ഇ-മെയിൽ ചെയ്ത് ക്യാമ്പസിൽ നിന്ന് പ്രിന്റ് ചെയ്യുന്ന രീതി അവസാനിപ്പിക്കണമെന്നും സർവകലാശാല പരീക്ഷകളിൽ സുതാര്യത ഉറപ്പാക്കണമെന്നും കെ.എസ്.യു ജില്ലാ പ്രസിഡന്റ്‌ എം സി അതുൽ ആവശ്യപ്പെട്ടു. കെ.എസ്.യു ജില്ലാ കമ്മിറ്റിയുടെ നേതൃത്വത്തിൽ നടന്ന പ്രതിഷേധ മാർച്ചും ധർണയും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

മുൻ വൈസ് ചാൻസലർ ഗോപിനാഥ് രവീന്ദ്രൻ്റെ കാലത്ത് ആരംഭിച്ച ഈ രീതിയെക്കുറിച്ച് കെ.എസ്.യു അന്ന് മുതലേ ആശങ്ക അറിയിച്ചിരുന്നുവെന്നും എം.സി അതുൽ പറഞ്ഞു. ഏപ്രിൽ 7 മുതൽ ആരംഭിച്ച നാലാം സെമസ്റ്റർ പരീക്ഷ എഴുതാൻ ഗ്രീൻവുഡ് കോളേജിലെ വിദ്യാർത്ഥികൾക്ക് കാസർകോട് ഗവൺമെൻ്റ് കോളേജിലേക്ക് പരീക്ഷാകേന്ദ്രം അനുവദിച്ച സർവകലാശാലയുടെ നടപടി ഇത്തരം ക്രമക്കേടുകൾ വ്യാപകമാണെന്നതിന് ഉദാഹരണമാണെന്നും അദ്ദേഹം കൂട്ടിച്ചേർത്തു.

കുറ്റക്കാർക്കെതിരെ നടപടിയെടുക്കണമെന്നും കോളേജുകളിൽ കൃത്യമായ സംവിധാനങ്ങൾ ഉറപ്പാക്കുന്നത് വരെ മെയിൽ വഴി ചോദ്യപ്പേപ്പർ നൽകി പ്രിന്റ് ചെയ്യിക്കുന്ന രീതി മാറ്റണമെന്നും എം.സി അതുൽ ആവശ്യപ്പെട്ടു. കെ.എസ്.യുവിൻ്റെ പ്രതിഷേധം കണക്കിലെടുത്ത് കണ്ണൂർ ടൗൺ പോലീസ് സർവകലാശാല പരിസരത്ത് കനത്ത സുരക്ഷാ ക്രമീകരണങ്ങൾ ഏർപ്പെടുത്തിയിരുന്നു.

എന്നാൽ, പാലക്കുന്ന് ഗ്രീൻവുഡ്‌സ് കോളേജിലെ ചോദ്യപേപ്പർ ചോർച്ച ആരോപണം പ്രിൻസിപ്പൽ ഇൻ ചാർജ് അജീഷ് നിഷേധിച്ചു. അധ്യാപകർ ചോദ്യപേപ്പർ ചോർത്തിയിട്ടില്ലെന്നും, കോപ്പിയടി പിടിക്കപ്പെട്ട വിദ്യാർത്ഥിയുടെ മൊഴിയിലെ തെറ്റിദ്ധാരണയാകാം ഈ ആരോപണങ്ങൾക്ക് കാരണമെന്നും അദ്ദേഹം വ്യക്തമാക്കി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: KSU activists protested at Kannur University over alleged irregularities in BCA exam question paper distribution, leading to a clash with police and arrests. KSU demands transparency and an end to the email-based question paper system.

#KeralaNews, #KannurUniversity, #KSUProtest, #QuestionPaperLeak, #StudentProtest, #HigherEducation