Investigation | മുകേഷിനെതിരായ ആരോപണം പരിശോധിക്കേണ്ടതെന്ന് മന്ത്രി ബിന്ദു

കൊച്ചി: (KVARTHA) നടനും എംഎൽഎയുമായ മുകേഷിനെതിരായ ആരോപണം ഗൗരവമായി പരിശോധിക്കേണ്ടതെന്ന് ഉന്നത വിദ്യാഭ്യാസ വകുപ്പ് മന്ത്രി ആർ ബിന്ദു വ്യക്തമാക്കി. 

ഏതൊരു ആരോപണവും പരിശോധിക്കപ്പെടേണ്ടതാണെന്നും കുറ്റം ആര് ചെയ്താലാലും ശിക്ഷ അനുഭവിക്കുമെന്നും മന്ത്രി പറഞ്ഞു.

സംഭവത്തിൽ വസ്തുനിഷ്ഠമായ അന്വേഷണം നടക്കണമെന്നും അതേസമയം, നിരപരാധികൾ ശിക്ഷിക്കപ്പെടുന്ന അവസ്ഥയും ഉണ്ടാകരുത് എന്നും മന്ത്രി വ്യക്തമാക്കി. ആരോപണങ്ങളെക്കുറിച്ച് അന്വേഷിക്കാൻ പ്രത്യേക അന്വേഷണ സംഘത്തെ നിയമിക്കുന്നത് വൈകിയെന്ന ആരോപണങ്ങളെ മന്ത്രി തള്ളിക്കളഞ്ഞു.

അതേസമയം നടി മിനു മുനീർ മലയാള സിനിമയിലെ ചില പ്രമുഖ നടന്മാർക്കെതിരെ ഗുരുതര ആരോപണങ്ങൾ ഉന്നയിച്ചതിന് പിന്നാലെ, ആരോപണ വിധേയനായ നടൻ മണിയൻപിള്ള രാജു പ്രതികരണവുമായി രംഗത്തെത്തിയിരുന്നു.

മിനു മുനീർ ഉന്നയിച്ച ആരോപണങ്ങൾ അടിസ്ഥാന രഹിതമാണെന്നും ഇത്തരം ആരോപണങ്ങൾ സാധാരണമാണെന്നുമാണ് മണിയൻപിള്ള രാജു പറഞ്ഞു. അവസരം ലഭിക്കാത്തവരും പണം തട്ടാൻ ശ്രമിക്കുന്നവരുമായ ചിലർ ഇത്തരം ആരോപണങ്ങൾ ഉന്നയിക്കാറുണ്ടെന്ന് അദ്ദേഹം കൂട്ടിച്ചേർത്തു.

മിനു മുനീർ മുകേഷ്, ജയസൂര്യ, ഇടവേള ബാബു എന്നിവർ തന്നെ ലൈംഗികമായി ഉപദ്രവിച്ചുവെന്ന ആരോപണം ഉന്നയിച്ചിരുന്നു. എന്നാൽ, മണിയൻപിള്ള രാജു തന്റെ നിഷ്കളങ്കത പ്രഖ്യാപിക്കുകയും, താൻ തെറ്റുകാരനാണെങ്കിൽ തന്നെ ശിക്ഷിക്കണമെന്ന് ആവശ്യപ്പെടുകയും ചെയ്തു. ഇത്തരം ആരോപണങ്ങൾ സിനിമയിൽ സാധാരണമാണെന്നും അദ്ദേഹം അമ്മയിൽ അംഗത്വം എടുക്കുന്നതിൽ വഴിവിട്ട രീതികളൊന്നും ഉണ്ടായിട്ടില്ലെന്നും വ്യക്തമാക്കി.

ഹേമ കമ്മിറ്റി റിപ്പോർട്ടിൽ മലയാള സിനിമയിലെ ലൈംഗിക ചൂഷണത്തെക്കുറിച്ചുള്ള ചർച്ചകൾ ശക്തമായി നടക്കുന്ന സാഹചര്യത്തിലാണ് മിനു മുനീർ തന്റെ ആരോപണങ്ങൾ ഉന്നയിച്ചത്.