കോവിഡ് പ്രതിസന്ധിയെ തുടര്‍ന്നുള്ള ലോക് ഡൗണിനുശേഷം തിയറ്ററുകള്‍ തുറന്നു; ഡെല്‍ഹിയില്‍ സിനിമ കാണാനെത്തിയത് നാലോ അഞ്ചോ പേര്‍

ന്യൂഡെല്‍ഹി: (www.kvartha.com 16.10.2020) മാസങ്ങള്‍ നീണ്ട ലോക് ഡൗണിന് ശേഷം വെള്ളിയാഴ്ച തിയറ്ററുകള്‍ തുറന്നെങ്കിലും സിനിമ കാണാനെത്തിയത് നാലോ അഞ്ചോ പേര്‍ മാത്രം. കോവിഡ് നിയന്ത്രണ പ്രകാരം ആകെ 300 സീറ്റുകളുളള തിയറ്ററില്‍ 150 സീറ്റുകളില്‍ മാത്രമാണ് പ്രവേശനമുളളത്. 150 സീറ്റുകളുള്ള തിയറ്ററിലാണ് വിരലിലെണ്ണാവുന്നവര്‍ മാത്രം സിനിമ കാണാന്‍ എത്തിയത്. പ്രവര്‍ത്തന ചെലവ് പോലും ആദ്യ ദിവസം ഇല്ല.


ഡെല്‍ഹിയിലെ ഗ്രേറ്റര്‍ കൈലാഷ് ഏരിയയിലെ തിയറ്ററില്‍ ഉച്ചയ്ക്കുള്ള ഷോയ്ക്ക് വെറും നാലു ടിക്കറ്റുകള്‍ മാത്രമാണ് വിറ്റുപോയത്. 2.30-നുള്ള ഷോയ്ക്ക് അഞ്ചുപേരും. തിയറ്ററില്‍ പ്രവേശിക്കുന്നതിന് മുമ്പ് ശരീര താപനില പരിശോധിക്കും. കൂടാതെ പോപ് കോണ്‍ ഉള്‍പ്പെടെ ഭക്ഷ്യവസ്തുക്കള്‍ യു വി സാനിറ്റൈസേഷന്‍ നടത്തും.

അഞ്ചാംഘട്ട അണ്‍ലോക്കിന്റെ ഭാഗമായാണ് തിയറ്ററുകള്‍ തുറക്കാന്‍ കേന്ദ്രസര്‍ക്കാര്‍ അനുമതി നല്‍കിയത്. 50 ശതമാനം സീറ്റുകളില്‍ മാത്രമേ കാണികളെ പ്രവേശിപ്പിക്കൂ. ഉച്ചയ്ക്ക് 12 മണിമുതല്‍ എട്ടുമണി വരെയാണ് പ്രദര്‍ശന സമയം. മാസങ്ങള്‍ക്കിപ്പുറം നിയന്ത്രണങ്ങളോടെ സിനിമ തിയറ്ററുകള്‍ തുറക്കാന്‍ കേന്ദ്ര സര്‍ക്കാര്‍ അനുമതി നല്‍കിയെങ്കിലും കേരളത്തില്‍ എന്നു തുറക്കുമെന്ന് തീരുമാനമായില്ല.

മാര്‍ച്ച് 11 മുതല്‍ തിയറ്ററുകള്‍ അടഞ്ഞു കിടക്കുകയാണ്. കുറഞ്ഞ സീറ്റുകളുമായി തിയറ്ററുകള്‍ തുറക്കുന്നതു നഷ്ടമാകുമോയെന്ന ആശങ്കയ്ക്കു പുറമേ, വിനോദ നികുതി പോലുള്ള അധിക ബാധ്യതകളും തിയറ്റര്‍ ഉടമകള്‍ക്ക് ഭാരമാകുകയാണ്.

Keywords:  4 Arrive To Watch Movie In 150-Seat Delhi Theatre As Cinema Halls Reopen, New Delhi, News, Cinema, Theater, Lockdown, National.