Allu Arjun | ഓരോ ഇന്‍ഡ്യക്കാരന്റേയും ഹൃദയത്തില്‍ തൊടുന്ന ചിത്രം; ഇതുപോലൊരു സിനിമ നിര്‍മിക്കാന്‍ തയാറായ മഹേഷ് ബാബുവിന് വ്യക്തിപരമായ അഭിനന്ദനം; 'മേജറിനെ' അഭിനന്ദിച്ച് നടന്‍ അല്ലു അര്‍ജുന്‍

ചെന്നൈ: (www.kvartha.com) ആദിവി ശേഷ് നായകനായ മേജര്‍ എന്ന ചിത്രത്തെ അഭിനന്ദിച്ച് നടന്‍ അല്ലു അര്‍ജുന്‍. ഓരോ ഇന്‍ഡ്യക്കാരന്റേയും ഹൃദയത്തില്‍ തൊടുന്ന ചിത്രമാണിതെന്ന് അല്ലു ട്വീറ്റ് ചെയ്തു. മുംബൈ ഭീകരാക്രമണത്തില്‍ വീരമൃത്യു വരിച്ച മലയാളി മേജര്‍ സന്ദീപ് ഉണ്ണിക്കൃഷ്ണന്റെ ജീവിതകഥയാണ് മേജറിലൂടെ പറയുന്നത്.

അല്ലു ട്വിറ്ററില്‍ കുറിച്ചത്:

ആദിവി ശേഷ് തന്റെ മാജിക് ഒരിക്കല്‍ക്കൂടി ആവര്‍ത്തിച്ചു. പ്രകാശ് രാജ്, രേവതി, ശോഭിത ധുലിപാല തുടങ്ങി എല്ലാ താരങ്ങളും നന്നായി പിന്തുണച്ചു . ഇതുപോലൊരു ചിത്രം നിര്‍മിക്കാന്‍ തയാറായതിന് നിര്‍മാതാവും നടനുമായ മഹേഷ് ബാബുവിന് വ്യക്തിപരമായ അഭിനന്ദനം.

ശശികിരണ്‍ ടിക സംവിധാനം ചെയ്ത ചിത്രത്തിന് തിരക്കഥയൊരുക്കിയിരിക്കുന്നത് നായകനായ ആദിവി ശേഷ് തന്നെയാണ്. കേരളമടക്കം റിലീസ് ചെയ്ത എല്ലായിടത്തുനിന്നും മികച്ച പ്രതികരണമാണ് ചിത്രത്തിന് ലഭിച്ചുകൊണ്ടിരിക്കുന്നത്. റിലീസ് ചെയ്ത് രണ്ടുദിവസംകൊണ്ട് തന്നെ 25 കോടി രൂപയാണ് ആഗോളതലത്തില്‍ നേടിയത്.