തിരുവനന്തപുരം: (KVARTHA) എംപുരാൻ സിനിമ കണ്ട ശേഷം രമേശ് ചെന്നിത്തല മാധ്യമങ്ങൾക്ക് നൽകിയ അഭിമുഖത്തിൽ ചിത്രത്തെ പ്രശംസിക്കുകയും ആവിഷ്കാര സ്വാതന്ത്ര്യത്തിന് മേലുള്ള കടന്നുകയറ്റത്തെ എതിർക്കുകയും ചെയ്തു. ‘എംപുരാൻ സിനിമ കണ്ടു. ചിത്രം വളരെയധികം ഇഷ്ടപ്പെട്ടു. മോഹൻലാലിനും പൃഥ്വിരാജിനും എന്റെ അഭിനന്ദനങ്ങൾ. സിനിമയിൽ സെൻസർ ചെയ്യേണ്ടതായ ഒരു ഭാഗവും ഞാൻ കണ്ടില്ല. ഇന്ത്യൻ ജീവിതത്തിൻ്റെ യഥാർത്ഥ ചിത്രമാണിത്. ആവിഷ്കാര സ്വാതന്ത്ര്യത്തിനു മേലുള്ള ഒരു ഭീഷണിയും അംഗീകരിക്കാൻ നമുക്ക് കഴിയില്ല. അതിനാൽ, ഒന്നും വെട്ടിമാറ്റേണ്ടതില്ല എന്നാണ് എൻ്റെ അഭിപ്രായം. വർഗീയതയ്‌ക്കെതിരെയുള്ള അതിശക്തമായ പ്രമേയമാണ് ചിത്രം കൈകാര്യം ചെയ്യുന്നത്. സിനിമയിൽ പ്രിയദർശിനിയുടെ വിജയം നിരവധി സന്ദേശങ്ങൾ നൽകുന്നുണ്ട്. എല്ലാവരും കാണേണ്ട ചിത്രമാണിത്,’ രമേശ് ചെന്നിത്തല പറഞ്ഞു.

ആവിഷ്കാര സ്വാതന്ത്ര്യത്തിന് നേരെ നടക്കുന്ന ഒരു തരത്തിലുള്ള ആക്രമണവും സമ്മതിച്ചു നൽകരുതെന്നും അദ്ദേഹം കൂട്ടിച്ചേർത്തു. ‘ലെഫ്റ്റ് റൈറ്റ് ലെഫ്റ്റ്, 51 വെട്ട് തുടങ്ങിയ നിരവധി ചിത്രങ്ങൾക്കു നേരെ തീയേറ്റർ കൊടുക്കാതെയും ഒറ്റപ്പെടുത്തിയും ആക്രമണങ്ങൾ നടന്നിട്ടുണ്ട്. ആവിഷ്കാര സ്വാതന്ത്ര്യത്തിന് മേൽ നടക്കുന്ന ആക്രമണങ്ങൾ ഏകപക്ഷീയമല്ല എന്ന് ഓർക്കണം. ലെഫ്റ്റ് റൈറ്റ് ലെഫ്റ്റ് എന്ന ചിത്രം ഇറങ്ങിയപ്പോൾ മുരളി ഗോപിയുടെ ചിത്രങ്ങൾ ഇനി കാണില്ല എന്നാണ് മുഖ്യമന്ത്രി പറഞ്ഞത്. എന്തായാലും അദ്ദേഹം ഈ ചിത്രം വന്നു കണ്ടതിൽ സന്തോഷമുണ്ട്. മുരളി ഗോപിയെ പ്രത്യേകം അഭിനന്ദിക്കുന്നു. വർഗീയതയ്‌ക്കെതിരെയും ജനവിരുദ്ധ നയങ്ങൾക്കെതിരെയും പോരാടുന്നവർ നിർബന്ധമായും കാണേണ്ട ചിത്രമാണിത്. മോഹൻലാലിനെയും പൃഥ്വിരാജിനെയും മുരളി ഗോപിയെയും ഒരിക്കൽ കൂടി അഭിനന്ദിക്കുന്നു,’ അദ്ദേഹം പറഞ്ഞു.
ചിത്രത്തിൻ്റെ അണിയറ പ്രവർത്തകരായ പൃഥ്വിരാജ്, മുരളി ഗോപി, ആന്റണി പെരുമ്പാവൂർ എന്നിവരെ ഫോണിൽ വിളിച്ച് വ്യക്തിപരമായി അഭിനന്ദനങ്ങൾ അറിയിച്ചിട്ടുണ്ടെന്നും രമേശ് ചെന്നിത്തല പറഞ്ഞു.

കോൺഗ്രസ് ഭരിക്കുന്ന കാലത്ത് കോൺഗ്രസിനെ കളിയാക്കി നിരവധി ചിത്രങ്ങൾ ഇറങ്ങിയിട്ടുണ്ടെന്നും ഭരണാധിപന്മാരെയും പാർട്ടിയെയും നയങ്ങളെയും കളിയാക്കി നിരവധി സിനിമകൾ ഇറങ്ങിയിട്ടുണ്ടെന്നും അദ്ദേഹം ഓർമ്മിപ്പിച്ചു. ‘അതൊന്നും ഞങ്ങളുടെ പാർട്ടിയെയോ പ്രവർത്തകരെയോ അസ്വസ്ഥരാക്കിയിട്ടില്ല. എന്നെ വിമർശിക്കാതിരിക്കരുത് എന്ന് കാർട്ടൂണിസ്റ്റ് ശങ്കറിനോട് പറഞ്ഞ നെഹ്‌റുജിയാണ് ഞങ്ങളുടെ ജനാധിപത്യത്തിൻ്റെ വഴികാട്ടി. കലയെ കലയുടെ വഴിക്ക് വിടുക. സിനിമയെ സിനിമയുടെ വഴിക്ക് വിടുക. അതിലെ സാമൂഹ്യ വിമർശനങ്ങൾ ആസ്വദിക്കുക. സംഘടിതമായി എതിർക്കാതിരിക്കുക. സർഗാത്മകത അതിൻ്റെ വഴിക്ക് പോകട്ടെ. ആവിഷ്കാര സ്വാതന്ത്ര്യത്തെ സംഘടിതമായി ആക്രമിക്കുന്നത് ഫാസിസമാണ്. ഫാസിസം ജനാധിപത്യത്തിൻ്റെ മൂല്യങ്ങൾക്ക് എതിരാണ്. ആവിഷ്കാര സ്വാതന്ത്ര്യം അനുവദിക്കപ്പെടുക തന്നെ വേണം,’ അദ്ദേഹം കൂട്ടിച്ചേർത്തു.

ഈ വാർത്ത കൂടുതൽ ആളുകളിലേക്ക് എത്തിക്കാൻ ഷെയർ ചെയ്യൂ. നിങ്ങളുടെ അഭിപ്രായങ്ങൾ കമന്റുകളായി രേഖപ്പെടുത്തുക.

Ramesh Chennithala praised the movie 'Empuraan' and condemned attacks on freedom of expression. He stated that the movie should not be censored and highlighted its strong anti-communal message.

#Empuraan #RameshChennithala #FreedomOfExpression #MalayalamCinema #MovieReview #KeralaPolitics