കൊച്ചി: (KVARTHA) മലയാള സിനിമയിൽ നിരവധി ചർച്ചകൾക്ക് വഴി തുറന്ന സംഭവമായി നടിയും നിർമാതാവുമായ സാന്ദ്ര തോമസിനെ പ്രൊഡ്യൂസേഴ്‌സ് അസോസിയേഷനിൽ നിന്ന് പുറത്താക്കിയത്. അച്ചടക്ക ലംഘനമാണ് പുറത്താക്കലിന് കാരണമെന്ന് അസോസിയേഷൻ അറിയിച്ചു.

ഹേമ കമ്മിറ്റി റിപ്പോർട്ട് പുറത്തുവന്നതിനു ശേഷം മലയാള സിനിമയിൽ ഉണ്ടായ വിവാദങ്ങളുടെ പശ്ചാത്തലത്തിൽ പ്രൊഡ്യൂസേഴ്‌സ് അസോസിയേഷനിലും ഭിന്നതകൾ ഉണ്ടായിരുന്നു. സംഘടനയ്ക്കെതിരെ സാന്ദ്ര തോമസ് രംഗത്തെത്തിയിരുന്നു. സിനിമ നിർമാണ മേഖല സ്ത്രീവിരുദ്ധമാണെന്നും സംഘടനയിൽ പവർ ഗ്രൂപ്പുകൾ ശക്തമാണെന്നും സാന്ദ്ര ആരോപിച്ചിരുന്നു.

പിന്നീട്, അസോസിയേഷനിലെ പത്തു നിർമാതാക്കൾക്കെതിരെ സാന്ദ്ര നൽകിയ പരാതിയിൽ പോലീസ് കേസെടുത്തിരുന്നു. പ്രൊഡ്യൂസേഴ്‌സ് അസോസിയേഷൻ ഫിയോക്കിന് വേണ്ടി നിലകൊള്ളുന്ന സംഘടനയാണെന്നും പ്രശ്‌നം പരിഹരിക്കാൻ വിളിച്ച യോഗത്തിൽ വച്ച് അപമാനിക്കപ്പെട്ടുവെന്നും സാന്ദ്ര ആരോപിച്ചിരുന്നു.

നേരിട്ട് അപമാനിക്കപ്പെട്ടതിന്റെ മാനസികാഘാതത്തിൽ നിന്ന് ഇപ്പോഴും പൂർണമായും മോചിതയായിട്ടില്ലെന്നും തനിക്കുണ്ടായ ദുരനുഭവം അസോസിയേഷനിലെ പല ഭാരവാഹികളെയും വിളിച്ചറിയിച്ചിട്ടും യാതൊരു നടപടിയോ പരിഹാരമോ ഉണ്ടായില്ലെന്നും പ്രസിഡന്റും സെക്രട്ടറിയും രാജി വയ്ക്കണമെന്നും സാന്ദ്ര ആവശ്യപ്പെട്ടിരുന്നു.

#SandraThomas #ProducersAssociation #MalayalamCinema #Controversy #WomenInCinema #FilmIndustry