കൊച്ചി: (KVARTHA) നടൻ ഷൈൻ ടോം ചാക്കോ പ്രതിയായ ലഹരി മരുന്ന് കേസിൽ അന്വേഷണം ഊർജിതമാക്കി പോലീസ്. തെളിവ് ശേഖരണത്തിന്റെ ഭാഗമായി കൂടുതൽ ആളുകളുടെ മൊഴിയെടുക്കാൻ പ്രത്യേക അന്വേഷണ സംഘം തീരുമാനിച്ചു. ഷൈൻ ടോം ചാക്കോ താമസിച്ചിരുന്ന എറണാകുളത്തെ വേദാന്ത ഹോട്ടലിൽ അന്ന് എത്തിയ രണ്ട് യുവതികൾ, ഷൈനിനെ നക്ഷത്ര ഹോട്ടലിലേക്ക് എത്തിച്ച ബൈക്ക് യാത്രികൻ എന്നിവരുടെ വിശദമായ മൊഴി രേഖപ്പെടുത്തും.

ലഹരി ഇടപാടുകാരനായ സജീർ ഹോട്ടലിൽ എത്തിച്ചേർന്നതായി അന്വേഷണത്തിൽ കണ്ടെത്തിയതിനെ തുടർന്ന് ഹോട്ടൽ ജീവനക്കാരുടെയും വിശദമായ മൊഴിയെടുക്കാൻ പോലീസ് തീരുമാനിച്ചിട്ടുണ്ട്. ഈ വിവരങ്ങൾ ശേഖരിച്ച ശേഷം ഷൈൻ ടോം ചാക്കോയെ വീണ്ടും ചോദ്യം ചെയ്യും. കഴിഞ്ഞ ദിവസം കൊച്ചി സിറ്റി പോലീസ് കമ്മീഷണർ പുട്ട വിമലാദിത്യയുടെ നേതൃത്വത്തിൽ അന്വേഷണ സംഘം സുപ്രധാനമായ യോഗം ചേർന്നു. കേസിന്റെ പുരോഗതിയും തുടർനടപടികളും യോഗത്തിൽ വിലയിരുത്തി.

അതേസമയം, ലഹരി കേസിൽ ഇതുവരെ കൃത്യമായ തെളിവുകൾ ലഭിച്ചിട്ടില്ലെന്ന് കമ്മീഷണർ പി. വിമലാദിത്യ മാധ്യമങ്ങളോട് പറഞ്ഞു. വിവരങ്ങൾ ശേഖരിച്ച ശേഷം ആവശ്യമെങ്കിൽ ഷൈൻ ടോം ചാക്കോയെ വീണ്ടും ചോദ്യം ചെയ്യും. ഷൈൻ സ്ഥിരമായി ലഹരി ഉപയോഗിക്കുന്നുണ്ടെന്ന് ഇപ്പോൾ ഔദ്യോഗികമായി സ്ഥിരീകരിക്കാൻ സാധിച്ചിട്ടില്ല. സിനിമാ മേഖലയിലെ മറ്റുള്ളവർ ലഹരി ഉപയോഗിക്കുന്നുണ്ടെന്ന തരത്തിലുള്ള വിവരങ്ങളൊന്നും ഷൈൻ പോലീസിന് നൽകിയിട്ടില്ലെന്നും കമ്മീഷണർ വ്യക്തമാക്കി. 

സജീർ ഉൾപ്പെടെയുള്ള ലഹരി വിൽപനക്കാരെ പോലീസ് നിരീക്ഷിച്ചു വരികയാണ്. കേസിൽ കൂടുതൽ വകുപ്പുകൾ ചേർക്കണോ എന്ന കാര്യം ഇപ്പോൾ പറയാൻ സാധിക്കില്ലെന്നും അദ്ദേഹം കൂട്ടിച്ചേർത്തു. അന്വേഷണ സംഘം ഹോട്ടലിൽ എത്തിയപ്പോൾ ഷൈൻ ഓടി രക്ഷപ്പെട്ടത് ഗുണ്ടകളെ കണ്ടിട്ടാണെന്നുള്ള മൊഴി വിശ്വസിക്കാൻ സാധ്യമല്ലെന്നും കമ്മീഷണർ അഭിപ്രായപ്പെട്ടു.

കഴിഞ്ഞ ദിവസം ഷൈൻ ടോം ചാക്കോയുടെ ശരീരത്തിൽ നിന്ന് ശേഖരിച്ച രക്തം, മുടി തുടങ്ങിയ സാമ്പിളുകൾ രാസപരിശോധനയ്ക്കായി ഉടൻതന്നെ കോടതിയിൽ സമർപ്പിക്കും. ഷൈനിൻ്റെ മൊബൈൽ ഫോൺ ഫോറൻസിക് പരിശോധനയ്ക്ക് അയക്കുന്നതിനായി പോലീസ് കോടതിയിൽ അപേക്ഷ നൽകും. ഷൈൻ ടോം ചാക്കോ സാമ്പത്തിക ഇടപാടുകൾ നടത്തിയവരുമായി ബന്ധപ്പെട്ട വിവരശേഖരണവും പുരോഗമിക്കുകയാണ്. ഇതിലൂടെ ലഹരി ഇടപാടുകളുമായി എന്തെങ്കിലും ബന്ധമുണ്ടോയെന്നും പോലീസ് അന്വേഷിക്കുന്നുണ്ട്.

അതിനിടെ, ഷൈൻ ടോം ചാക്കോയ്ക്കെതിരെ നിയമപരമായി മുന്നോട്ട് പോകില്ലെന്ന് നടി വിൻ സി അലോഷ്യസ് അറിയിച്ചു. സിനിമാ സംഘടനകളുടെ അന്വേഷണവുമായി പൂർണ്ണമായും സഹകരിക്കുമെന്നും എന്നാൽ തന്റെ പരാതി പിൻവലിക്കില്ലെന്നും വിൻ സി വ്യക്തമാക്കി. സിനിമ മേഖലയിൽ മാറ്റങ്ങൾ വരേണ്ടത് അത്യാവശ്യമാണെന്നും അവർ കൂട്ടിച്ചേർത്തു. 

സിനിമാ സെറ്റിൽ ലഹരി ഉപയോഗിച്ച് നടൻ ഷൈൻ ടോം ചാക്കോ തന്നോട് മോശമായി പെരുമാറിയെന്നായിരുന്നു വിൻ സി അലോഷ്യസിൻ്റെ പ്രധാന പരാതി. ഈ വിഷയത്തിൽ ഇന്റേണൽ കംപ്ലൈന്റ്സ് കമ്മിറ്റി (ആഭ്യന്തര പരാതി പരിഹാര സമിതി) വിശദമായ മൊഴിയെടുപ്പ് നടത്തും. സൂത്രവാക്യം സിനിമയുടെ സെറ്റിലെ അണിയറ പ്രവർത്തകരിൽ നിന്നാണ് കമ്മിറ്റി വിവരങ്ങൾ ശേഖരിക്കുക.

ഷൈൻ ടോം ചാക്കോയ്ക്കെതിരായ ലഹരി ആരോപണത്തിൽ സിനിമയുടെ നിർമ്മാതാവ് ശ്രീകാന്തും നിലപാട് മാറ്റി രംഗത്തെത്തി. ലൊക്കേഷനിൽ തനിക്ക് മോശം അനുഭവം നേരിട്ടതായി വിൻ സി തന്നോട് പറഞ്ഞിട്ടുണ്ടെന്ന് ശ്രീകാന്ത് വെളിപ്പെടുത്തി. വിൻ സിക്ക് ലൊക്കേഷനിൽ നേരിട്ട മോശം അനുഭവത്തെക്കുറിച്ച് അണിയറ പ്രവർത്തകർക്ക് അറിയാമായിരുന്നുവെന്നും അദ്ദേഹം കൂട്ടിച്ചേർത്തു. നേരത്തെ ഈ പ്രശ്നത്തെക്കുറിച്ച് തനിക്ക് അറിവില്ലായിരുന്നുവെന്നായിരുന്നു ശ്രീകാന്തിന്റെ ആദ്യ പ്രതികരണം. ഈ വിഷയത്തിൽ കൂടുതൽ അന്വേഷണങ്ങൾ പുരോഗമിക്കുകയാണ്.

ഈ വാർത്തയെക്കുറിച്ചുള്ള അഭിപ്രായങ്ങളും ഇത് സംബന്ധിച്ച് നിങ്ങൾ അറിയുന്ന മറ്റ് കാര്യങ്ങളും കമന്റ് ബോക്സിൽ പങ്കുവെക്കുക. സുഹൃത്തുകൾക്ക് ഈ വിവരങ്ങൾ എത്താനായി ഷെയർ ചെയ്യാനും മറക്കരുത്.

Summary: Police intensify investigation in the Shine Tom Chacko drug case, planning to record more testimonies and send his phone for forensic analysis. Witnesses include hotel staff, two women who visited him, and a bike rider. His blood and hair samples will be sent for chemical testing.

#ShineTomChacko #DrugCase #KeralaPolice #ForensicAnalysis #WinciAloshious #KeralaNews #Cinema