ന്യൂഡൽഹി: (KVARTHA) മാരകമായ എയ്ഡ്സ് (അക്വയേർഡ് ഇമ്മ്യൂണോഡെഫിഷ്യൻസി സിൻഡ്രോം) എന്ന രോഗത്തെക്കുറിച്ചുള്ള അവബോധം വർധിപ്പിക്കുന്നതിനും അതിന്റെ ആഘാതത്തെക്കുറിച്ച് പഠിപ്പിക്കുന്നതിനുമായി ഡിസംബർ ഒന്ന് ലോക എയ്ഡ്സ് ദിനമായി ആചരിക്കുന്നു. ലൈംഗിക ബന്ധമില്ലാതെ എയ്ഡ്സ് വരുന്നോ എന്ന ചോദ്യം പലരെയും അലട്ടുന്ന ഒന്നാണ്. ഈ ചോദ്യത്തിനുള്ള ഉത്തരം വിദഗ്ധരുടെ അഭിപ്രായത്തിൽ നിന്ന് മനസിലാക്കാം. 

എയ്ഡ്സ് എങ്ങനെ പകരുന്നു?

● എച്ച്ഐവി (ഹ്യൂമൻ ഇമ്മ്യൂണോഡെഫിഷ്യൻസി വൈറസ്) മൂലമാണ് എയ്ഡ്സ് ഉണ്ടാകുന്നത്. ലൈംഗിക ബന്ധമാണ് ഏറ്റവും സാധാരണമായ രീതിയാണെങ്കിലും, മറ്റ് രീതികളിലൂടെയും എയ്ഡ്സ് പകരും. 

ലൈംഗിക ബന്ധമില്ലാതെ എയ്ഡ്സ് വരുന്ന മറ്റ് മാർഗങ്ങൾ:

● രക്തത്തിലൂടെ: എച്ച്ഐവി പോലുള്ള രോഗങ്ങൾ രക്തത്തിലൂടെ വളരെ എളുപ്പത്തിൽ പകരും. ലൈംഗികമായി പകരുന്ന രോഗങ്ങളുമായി താരതമ്യപ്പെടുത്തുമ്പോൾ, രക്തം മുഖേനയുള്ള പകർച്ച വളരെ വേഗത്തിലും എളുപ്പത്തിലും സംഭവിക്കാം. അതിനാൽ, രക്തദാനം ചെയ്യുന്നതിന് മുൻപ് പൂർണമായും ആരോഗ്യവാനാണെന്ന് ഉറപ്പുവരുത്തുകയും, രക്തത്തിന്റെ സുരക്ഷയെക്കുറിച്ച് ബോധവാന്മാരായിരിക്കുകയും ചെയ്യേണ്ടത് വളരെ പ്രധാനമാണ്.

● അമ്മയിൽ നിന്ന് കുഞ്ഞിലേക്ക്: എച്ച്ഐവി ബാധിതയായ അമ്മയ്ക്ക് വഴി കുഞ്ഞിലേക്ക് ഈ രോഗം പകരാൻ സാധ്യതയുണ്ട്. എച്ച്ഐവി പോസിറ്റീവ് ഗർഭിണിയായ സ്ത്രീയിൽ നിന്ന് ഗർഭകാലത്തും പ്രസവസമയത്തും മുലയൂട്ടുന്ന സമയത്തും എച്ച്ഐവി കുഞ്ഞിലേക്ക് പകരാം. 

● മുറിവുകളുമായുള്ള സമ്പർക്കം: ഒരു അണുബാധയുള്ള മുറിവിൽ നിന്നുള്ള രക്തം മറ്റൊരു തുറന്ന മുറിവുമായി സമ്പർക്കത്തിൽ വന്നാൽ എച്ച്ഐവി പകരാമെന്ന് അഭിപ്രായപ്പെടുന്നവരുണ്ട്. എന്നിരുന്നാലും മുറിവിലൂടെയുള്ള രക്തസ്രാവം വഴി എച്ച്ഐവി പകരുന്നത് വളരെ അപൂർവമായ ഒരു സംഭവമാണ്. ഇതിന് കാരണം, എച്ച്ഐവി വൈറസ് പുറത്തെ അന്തരീക്ഷത്തിൽ വളരെ വേഗത്തിൽ നശിക്കപ്പെടും എന്നതാണ്. എന്നിരുന്നാലും, ഏത് തരത്തിലുള്ള മുറിവും വൃത്തിയായി സൂക്ഷിക്കുന്നത് വളരെ പ്രധാനമാണ്. മുറിവിൽ അണുബാധ ഉണ്ടാകുന്നത് തടയാൻ ഇത് സഹായിക്കും.

● അണുബാധിത ഉപകരണങ്ങൾ: സൂചികൾ, പച്ചകുത്തി ഉപകരണങ്ങൾ, ബോഡി പിയേഴ്‌സിംഗ് ഉപകരണങ്ങൾ എന്നിവ പോലുള്ള വൈദ്യകാര്യങ്ങൾക്കോ ​​വിനോദത്തിനോ ഉപയോഗിക്കുന്ന ഉപകരണങ്ങൾ വൃത്തിയാക്കാതെ ഉപയോഗിച്ചാൽ അത് വലിയ അപകടമാണ്. ഇത്തരം ഉപകരണങ്ങൾ വഴി എയ്ഡ്സ് പോലുള്ള ഗുരുതരമായ രോഗങ്ങൾ പകരാനുള്ള സാധ്യത വളരെ കൂടുതലാണ്. അതുകൊണ്ട്, ഇത്തരം ഉപകരണങ്ങൾ ഉപയോഗിക്കുന്ന സ്ഥാപനങ്ങളിൽ ഉപകരണങ്ങൾ നന്നായി വൃത്തിയാക്കുന്നുവെന്നും അണുവിമുക്തമാക്കുന്നുവെന്നും ഉറപ്പുവരുത്തേണ്ടത് വളരെ പ്രധാനമാണ്."

സ്നേഹം പകരാം 

ഒരു ചിരി, ഒരു കെട്ടിപ്പിടിക്കൽ, ഒരു ചുംബനം... ഇവയൊക്കെ ജീവിതത്തെ സുന്ദരമാക്കുന്ന നിമിഷങ്ങളല്ലേ? എന്നാൽ എച്ച്ഐവി പകരുന്നത് ഇത്തരം സ്നേഹത്തിന്റെ സ്പർശങ്ങളിലൂടെയല്ല എന്നത് അറിയുക. ശാസ്ത്രീയമായി തെളിയിക്കപ്പെട്ട ഒരു വസ്തുതയാണിത്. അതുകൊണ്ട് ഭയമില്ലാതെ സ്നേഹം പകരാം, പക്ഷേ എച്ച്ഐവി പകരുന്ന മാർഗങ്ങളെക്കുറിച്ച് അവബോധം ഉണ്ടായിരിക്കുകയും വേണം. എച്ച്ഐവി ഒരു രോഗമാണ്, അതിനെ കുറിച്ച് അറിയുക, ജാഗ്രത പാലിക്കുക എന്നത് ഉത്തരവാദിത്വമാണ്.

എയ്ഡ്സ് ബാധയ്ക്കുള്ള സാധ്യതയുണ്ടെന്ന് സംശയിക്കുന്നയാൾ എത്രയും വേഗം വൈദ്യസഹായം തേടണം. നേരത്തെ രോഗനിർണയം നടത്തി ചികിത്സ ആരംഭിക്കുന്നത് എയ്ഡ്സിനെ ഫലപ്രദമായി നിയന്ത്രിക്കാൻ സഹായിക്കും.

#AIDSAwareness, #HIVTransmission, #NonSexualTransmission, #HealthEducation, #AIDSPrevention, #HIVPrevention