ബീജിംഗ്: (KVARTHA) ചൈന ലോകത്തിലെ ആദ്യത്തെ ഉപഗ്രഹ അധിഷ്ഠിത, വിദൂര ശസ്ത്രക്രിയകൾ വിജയകരമായി നടത്തി ചരിത്രം കുറിച്ചു. ഇത് ആരോഗ്യരംഗത്ത് ഒരു നിർണായക മുന്നേറ്റമാണ്, പ്രത്യേകിച്ച് യുദ്ധം പോലുള്ള അപകടകരമായ സാഹചര്യങ്ങളിൽപ്പെടുന്നവർക്കുള്ള ചികിത്സാരംഗത്ത് ഈ കണ്ടുപിടുത്തം വലിയ മാറ്റങ്ങൾ കൊണ്ടുവരും. ഭൂമിയിൽ നിന്ന് 36,000 കിലോമീറ്റർ അകലെ സ്ഥിതി ചെയ്യുന്ന അപ്‌സ്റ്റാർ-6ഡി ബ്രോഡ്‌ബാൻഡ് കമ്മ്യൂണിക്കേഷൻ സാറ്റലൈറ്റ് ഉപയോഗിച്ചാണ് ഈ ശസ്ത്രക്രിയകൾ നടത്തിയതെന്ന് സൗത്ത് ചൈന മോർണിംഗ് പോസ്റ്റിന്റെ റിപ്പോർട്ട് ചെയ്‌തു.

പീപ്പിൾസ് ലിബറേഷൻ ആർമി ജനറൽ ഹോസ്പിറ്റലിലെ ഡോക്ടർമാർ ടിബറ്റിലെ ലാസ, യുണാനിലെ ഡാലി, ഹൈനാനിലെ സന്യ എന്നിവിടങ്ങളിൽ നിന്ന് വിദൂരമായി അഞ്ച് ശസ്ത്രക്രിയകളാണ് വിജയകരമായി പൂർത്തിയാക്കിയത്. ബീജിംഗിൽ ഉണ്ടായിരുന്ന രോഗികൾക്ക് കരൾ, പിത്തസഞ്ചി, പാൻക്രിയാസ് എന്നിവയിൽ തദ്ദേശീയമായി വികസിപ്പിച്ച റോബോട്ടിക് സർജിക്കൽ സംവിധാനത്തിന്റെ സഹായത്തോടെയാണ്  ശസ്ത്രക്രിയ നടത്തിയത്. എല്ലാ രോഗികളും സുഖം പ്രാപിക്കുകയും അടുത്ത ദിവസം ഡിസ്ചാർജ് ചെയ്യുകയും ചെയ്തുവെന്ന് സ്റ്റേറ്റ് ബ്രോഡ്കാസ്റ്റർ സിസിടിവി റിപ്പോർട്ട് ചെയ്തു.

ഓരോ ശസ്ത്രക്രിയാ നടപടികൾക്കുമുള്ള ഡാറ്റ ഏകദേശം 150,000 കിലോമീറ്റർ ദൂരം സഞ്ചരിച്ചു എന്നതാണ് പ്രത്യേകത. 'തദ്ദേശീയ ഉപഗ്രഹ സാങ്കേതികവിദ്യകളും റോബോട്ടിക് സംവിധാനങ്ങളും ഉപയോഗിച്ച് സങ്കീർണമായ ദീർഘദൂര ശസ്ത്രക്രിയകൾ നടത്താനുള്ള സാധ്യതയും സുരക്ഷയും ഫലപ്രാപ്തിയും ഈ വിദൂര ശസ്ത്രക്രിയകൾ തെളിയിച്ചു', എന്ന് സിസിടിവി റിപ്പോർട്ട് ചെയ്തു.

എന്താണ് അപ്‌സ്റ്റാർ-6ഡി?

2020 ൽ വിക്ഷേപിച്ച അപ്‌സ്റ്റാർ-6ഡി ഉപഗ്രഹം ഈ നേട്ടത്തിൽ നിർണായക പങ്ക് വഹിച്ചു. സെക്കൻഡിൽ 50 ഗിഗാ ബൈറ്റ് വരെ വേഗതയും 15 വർഷത്തെ പ്രവർത്തനക്ഷമതയുമുള്ള ഇത് ഏഷ്യ-പസഫിക് മേഖലയിൽ, പ്രത്യേകിച്ച് വ്യോമ, കടൽ മാർഗങ്ങളിൽ, വിപുലമായ കവറേജ് നൽകുന്നു. വിമാനങ്ങൾക്കും കപ്പലുകൾക്കും വിദൂര പ്രദേശങ്ങൾക്കും ബ്രോഡ്‌ബാൻഡ് കണക്റ്റിവിറ്റി നൽകുന്നതിനായി ആസൂത്രണം ചെയ്തിട്ടുള്ള മൂന്നോ നാലോ ജിയോസ്റ്റേഷണറി ഉപഗ്രഹങ്ങളുടെ ഒരു കൂട്ടായ്മയിലെ ആദ്യത്തേതാണ് അപ്‌സ്റ്റാർ-6ഡി.

ലിവർ ട്യൂമർ നീക്കം ചെയ്യൽ

ലാസയിൽ നിന്ന് ഡോക്ടർ ലിയു റോങ്, ദൂരെ ബീജിംഗിൽ കിടക്കുന്ന ഒരു രോഗിയുടെ കരളിലെ ട്യൂമർ നീക്കം ചെയ്ത ശസ്ത്രക്രിയയും ഇതിൽ ഉൾപ്പെടുന്നു. ആധുനിക സാങ്കേതിക വിദ്യകളായ ഡാറ്റ ക്ലാസിഫിക്കേഷൻ, ക്വാളിറ്റി ഓഫ് സർവീസ് കൺട്രോൾ, ട്രാഫിക് മാനേജ്മെന്റ് എന്നിവയുടെ സഹായത്തോടെയാണ് ഈ ശസ്ത്രക്രിയയുടെ വിജയം സാധ്യമായത്. ഇത് ആശയവിനിമയം കൂടുതൽ കൃത്യവും വേഗതയുള്ളതുമാക്കി. അതുകൊണ്ട് തന്നെ, ദൂരം കാരണം ഉണ്ടാകുന്ന താമസം വളരെ കുറച്ചു, ആശയവിനിമയത്തിന്റെ പരിധികൾ ഉപഗ്രഹം ഉപയോഗിച്ച് മറികടന്നു.

ഉപഗ്രഹങ്ങളെ ഉപയോഗിച്ച് ശസ്ത്രക്രിയകൾ ചെയ്യുന്നത് വളരെ വലിയൊരു മാറ്റമാണ്. ഇതിലൂടെ എവിടെയായാലും ഒരു രോഗിക്ക് നല്ല ചികിത്സ ലഭിക്കാൻ വഴിയൊരുക്കും. ഉദാഹരണത്തിന്, വിദൂര  ഗ്രാമത്തിലോ കടലിൽ ദ്വീപിലോ ആർക്കെങ്കിലും അസുഖമായാൽ, അവർക്ക് ഉടനെ ഒരു നല്ല ഡോക്ടറെയും ചികിത്സയും കിട്ടും. ഇതിന് കാരണം ഉപഗ്രഹങ്ങൾ വളരെ വേഗത്തിൽ വിവരങ്ങൾ കൈമാറാൻ സഹായിക്കുന്നു എന്നതാണ്. ഒരു ഡോക്ടർക്ക് ഒരു രോഗിയെ ദൂരത്തു നിന്ന് പരിശോധിക്കാനും മികച്ച രീതിയിൽ ചികിത്സിക്കാനും കഴിയും.

നവംബറിൽ, ചൈന തങ്ങളുടെ ഉപഗ്രഹ ആശയവിനിമയ സാങ്കേതികവിദ്യ കൂടുതൽ മുന്നോട്ട് കൊണ്ടുപോയി, രാജ്യത്തെ ആദ്യത്തെ ഓൾ-ഇലക്ട്രിക് പ്രൊപ്പൽഷൻ കമ്മ്യൂണിക്കേഷൻ സാറ്റലൈറ്റായ അപ്‌സ്റ്റാർ-6ഇ ഇന്തോനേഷ്യക്ക് കൈമാറിയിരുന്നു. ഉപഗ്രഹ സാങ്കേതികവിദ്യ വളരെ വേഗത്തിൽ വളർന്നുകൊണ്ടിരിക്കുകയാണ്. ഇത് ഭാവിയിൽ ആരോഗ്യ രംഗത്ത് വലിയ മാറ്റങ്ങൾക്ക് കാരണമാകുമെന്നാണ് പ്രതീക്ഷിക്കുന്നത്.

#SatelliteSurgery #RemoteSurgery #ChinaTech #Telemedicine #HealthcareInnovation #Upstar6D