ന്യൂഡൽഹി: (KVARTHA) കൃത്യ സമയത്ത് ഭക്ഷണം കഴിക്കാത്തതിന്റെ ദോഷവശങ്ങളെക്കുറിച്ച് പലപ്പോഴും  കേൾക്കാറുണ്ട്. പ്രഭാത ഭക്ഷണം ഒഴിവാക്കുന്നതിനെക്കുറിച്ചും അതിന്റെ അനന്തരഫലങ്ങളെക്കുറിച്ചും നിരവധി പഠനങ്ങൾ പുറത്തുവന്നിട്ടുണ്ട്. എന്നാൽ, മറ്റു നേരങ്ങളിലെ ഭക്ഷണം ഒഴിവാക്കിയാലും ഇത് ആരോഗ്യത്തെ ദോഷകരമായി ബാധിക്കുമോ? പ്രത്യേകിച്ചും തലച്ചോറിന്റെ പ്രവർത്തനത്തെ ഇത് എങ്ങനെ ബാധിക്കുമെന്നുള്ള കാര്യങ്ങൾ പലർക്കും അറിവുണ്ടാവില്ല. ഈ വിഷയത്തെക്കുറിച്ച് ഒരു ന്യൂറോളജിസ്റ്റ് നൽകുന്ന വിശദീകരണങ്ങൾ താഴെ നൽകുന്നു.

ഗ്ലൂക്കോസും തലച്ചോറിന്റെ പ്രവർത്തനവും

മുംബൈയിലെ വോക്ക്‌ഹാർഡ് ഹോസ്പിറ്റൽസിലെ കൺസൾട്ടന്റ് ന്യൂറോളജിസ്റ്റായ ഡോ. ശീതൾ ഗോയൽ പറയുന്നത് തലച്ചോറിന്റെ പ്രധാന ഊർജ സ്രോതസ്സ് ഗ്ലൂക്കോസ് ആണെന്നാണ്. ഭക്ഷണം ഒഴിവാക്കുമ്പോൾ രക്തത്തിലെ ഗ്ലൂക്കോസിന്റെ അളവ് കുറയുകയും തലച്ചോറിന്റെ പ്രവർത്തനത്തെ പ്രതികൂലമായി ബാധിക്കുകയും ചെയ്യും. 

ഇത് ഏകാഗ്രതക്കുറവ്, ഓർമ്മക്കുറവ്, മാനസികാവസ്ഥയിലുള്ള മാറ്റങ്ങൾ എന്നിവയിലേക്ക് നയിച്ചേക്കാം. ദീർഘകാലം ഗ്ലൂക്കോസിന്റെ കുറവുണ്ടായാൽ കോർട്ടിസോൾ പോലുള്ള സ്ട്രെസ് ഹോർമോണുകൾ ഉത്പാദിപ്പിക്കപ്പെടുകയും ഇത് മാനസിക പ്രവർത്തനങ്ങളെ കൂടുതൽ ദുർബലപ്പെടുത്തുകയും ഉത്കണ്ഠ, ദേഷ്യം പോലുള്ള അവസ്ഥകളിലേക്ക് എത്തിക്കുകയും ചെയ്യും. ചില അവസരങ്ങളിൽ തലച്ചോർ ഊർജ്ജത്തിനായി കീറ്റോണുകൾ ഉപയോഗിക്കാൻ ശ്രമിക്കും. ഈ മാറ്റം മാനസിക മന്ദതക്ക് കാരണമാവുകയും ചെയ്യാം.

വിശപ്പും തലവേദനയും തമ്മിലുള്ള ബന്ധം

വെറും വയറുമായി കൂടുതൽ നേരം ഇരിക്കുമ്പോൾ തലവേദന അനുഭവപ്പെടാറുണ്ട്. ഇതിന് കാരണം രക്തത്തിലെ പഞ്ചസാരയുടെ അളവ് കുറയുന്നതുമായി (ഹൈപ്പോഗ്ലൈസീമിയ) ബന്ധപ്പെട്ടാണ്. ഗ്ലൂക്കോസിന്റെ കുറവ് കോർട്ടിസോൾ, അഡ്രിനാലിൻ പോലുള്ള ഹോർമോണുകളുടെ ഉത്പാദനത്തിന് കാരണമാവുകയും ഇത് രക്തക്കുഴലുകൾ ചുരുങ്ങുന്നതിനും വികസിക്കുന്നതിനും ഇടയാക്കുകയും ചെയ്യുന്നു. ഈ പ്രതിഭാസമാണ് തലവേദനയിലേക്ക് നയിക്കുന്നത്. 

കൂടാതെ, വിശപ്പ് കാരണം പേശികളിലുണ്ടാകുന്ന പിരിമുറുക്കവും അസ്വസ്ഥത വർദ്ധിപ്പിക്കാൻ സാധ്യതയുണ്ട്. രക്തത്തിലെ പഞ്ചസാരയുടെ അളവിലുള്ള വ്യതിയാനങ്ങളോടുള്ള തലച്ചോറിന്റെ അമിതമായ സംവേദനക്ഷമത ഇത്തരം ലക്ഷണങ്ങൾക്ക് ഒരു പ്രധാന കാരണമാണ്.

ഭക്ഷണങ്ങൾക്കിടയിലെ ഇടവേള എത്രയായിരിക്കണം?

തലവേദന ഒഴിവാക്കാൻ ഭക്ഷണങ്ങൾക്കിടയിൽ എത്ര സമയം ഇടവേള നൽകണം എന്ന ചോദ്യത്തിന് കൃത്യമായ ഒരുത്തരം നൽകാൻ സാധിക്കുകയില്ല. എന്നിരുന്നാലും, മിക്ക വിദഗ്ദ്ധരും 4 മുതൽ 6 മണിക്കൂർ വരെ ഇടവേള നൽകാം എന്ന് അഭിപ്രായപ്പെടുന്നു. ഇത് രക്തത്തിലെ പഞ്ചസാരയുടെ അളവ് സ്ഥിരമായി നിലനിർത്താൻ സഹായിക്കും. 

ആറ് മണിക്കൂറിൽ കൂടുതൽ ഭക്ഷണം കഴിക്കാതെ ഇരുന്നാൽ രക്തത്തിലെ പഞ്ചസാരയുടെ അളവ് കുറയുകയും വിശപ്പ് മൂലമുള്ള തലവേദന ഉണ്ടാകാനുള്ള സാധ്യത വർദ്ധിപ്പിക്കുകയും ചെയ്യും. പ്രോട്ടീനുകളും കോംപ്ലക്സ് കാർബോഹൈഡ്രേറ്റുകളും അടങ്ങിയ സമീകൃത ആഹാരം കഴിക്കാൻ ഡോക്ടർമാർ പ്രത്യേകം നിർദ്ദേശിക്കുന്നു. ഇത് ശരീരത്തിന് ആവശ്യമായ ഊർജ്ജം നൽകാനും രക്തത്തിലെ പഞ്ചസാരയുടെ അളവ് സ്ഥിരമായി നിലനിർത്താനും സഹായിക്കും.

കൂടുതൽ ആരോഗ്യ സംബന്ധമായ സംശയങ്ങൾക്ക് ഡോക്ടറെ സമീപിക്കാൻ മടിക്കരുത്.

#BrainFunction #MealSkipping #HealthImpact #NeurologistAdvice #Headache #Glucose