IBPS Clerk | ബാങ്ക് ജോലിക്ക് ബംപർ അവസരം! 6,128 ഒഴിവുകളിലേക്ക് അപേക്ഷ ക്ഷണിച്ചു; വിശദാംശങ്ങൾ

ന്യൂഡെൽഹി: (KVARTHA) ബാങ്ക് ജോലികൾ തേടുന്ന യുവാക്കൾക്ക് സന്തോഷ വാർത്ത. ഇൻസ്റ്റിറ്റ്യൂട്ട് ഓഫ് ബാങ്കിംഗ് പേഴ്‌സണൽ സെലക്ഷൻ (IBPS) 6,128 തസ്തികകളിലേക്ക് അപേക്ഷ ക്ഷണിച്ചു. താൽപര്യവും യോഗ്യതയുമുള്ള ഉദ്യോഗാർത്ഥികൾക്ക് ഔദ്യോഗിക വെബ്സൈറ്റായ ibps(dot)in സന്ദർശിച്ച് പ്രാഥമിക പരീക്ഷയ്ക്ക് അപേക്ഷ സമർപ്പിക്കാവുന്നതാണ്. അപേക്ഷ സമർപ്പിക്കാനുള്ള അവസാന തീയതി ജൂലൈ 21 ആണ്. ഐബിപിഎസ് ക്ലർക്ക് പ്രിലിമിനറി പരീക്ഷ ഓഗസ്റ്റിലും മെയിൻ പരീക്ഷ ഒക്ടോബറിലും നടക്കും. ബാങ്ക് ക്ലർക്ക്, പിഒ, ഓഫീസ് അസിസ്റ്റൻ്റ് തുടങ്ങിയ തസ്തികകളിലേക്കാണ് ബമ്പർ റിക്രൂട്ട്മെൻ്റ് നടത്തുന്നത്.

ആർക്കൊക്കെ അപേക്ഷിക്കാം?

ഉദ്യോഗാർത്ഥികൾ അംഗീകൃത സർവകലാശാലയിൽ നിന്ന് ബിരുദം നേടിയിരിക്കണം. അപേക്ഷകർ 2024 ജൂലൈ ഒന്നിന് 20-നും 28-നും ഇടയിൽ പ്രായമുള്ളവരായിരിക്കണം, അതായത് 1996 ജൂലൈ രണ്ടിനും 2004 ജൂലൈ ഒന്നിനും ഇടയിൽ ജനിച്ചവരായിരിക്കണം. സംവരണ വിഭാഗക്കാർക്ക് നിയമപ്രകാരം ഉയർന്ന പ്രായപരിധിയിൽ ഇളവ് ലഭിക്കും. 

പരീക്ഷ 

ഐബിപിഎസ് ക്ലർക്ക് റിക്രൂട്ട്‌മെൻ്റ് പരീക്ഷയ്ക്കുള്ള പ്രീ-എക്സാമിനേഷൻ പരിശീലനം 2024 ഓഗസ്റ്റ് 12 മുതൽ 17 വരെ സംഘടിപ്പിക്കും. ഇതിനുശേഷം പ്രിലിമിനറി പരീക്ഷയ്ക്കുള്ള കോൾ ലെറ്റർ നൽകും. പ്രിലിമിനറി പരീക്ഷ ഓഗസ്റ്റിൽ നടക്കും. എന്നാൽ, അതിൻ്റെ തീയതി ഇതുവരെ പ്രഖ്യാപിച്ചിട്ടില്ല. പ്രിലിമിനറി പരീക്ഷയുടെ ഫലം സെപ്റ്റംബറിൽ പ്രസിദ്ധീകരിക്കും. ഇതിനുശേഷം മെയിൻ പരീക്ഷ സെപ്റ്റംബറിലോ ഒക്ടോബറിലോ നടത്തും. മെയിൻ പരീക്ഷയ്ക്ക് ശേഷം പ്രൊവിഷണൽ അലോട്ട്‌മെൻ്റ് ലിസ്റ്റ് 2025 ഏപ്രിലിൽ പ്രസിദ്ധീകരിക്കും. 100 മാർക്കിൻ്റെ 100 ചോദ്യങ്ങൾ അടങ്ങുന്ന ഇംഗ്ലീഷ് ലാംഗ്വേജ്, ന്യൂമറിക്കൽ എബിലിറ്റി, റീസണിംഗ് എബിലിറ്റി എന്നീ വിഭാഗങ്ങൾ ഉൾപ്പെടുന്നതായിരിക്കും പ്രാഥമിക പരീക്ഷ.

അപേക്ഷാ പ്രക്രിയ

* ഔദ്യോഗിക വെബ്‌സൈറ്റ് ibps(dot)in സന്ദർശിക്കുക. 
* CRP - Clerks - XIV-ൽ ക്ലിക്ക് ചെയ്യുക. അപേക്ഷിക്കുന്നതിനുള്ള ലിങ്കിൽ ക്ലിക്കുചെയ്യുക. ലോഗിൻ ക്രെഡൻഷ്യലുകൾ ലഭിക്കുന്നതിന് അക്കൗണ്ട് സൃഷ്ടിക്കുക.
* ലോഗിൻ ചെയ്ത് അപേക്ഷാ ഫോം പൂരിപ്പിക്കുക. ആവശ്യമായ സ്കാൻ ചെയ്ത രേഖകൾ അപ്‌ലോഡ് ചെയ്ത് പണമടയ്ക്കുക. ശേഷം അപേക്ഷാ ഫോം സമർപ്പിക്കുക.

അപേക്ഷാ ഫീസ്

പൊതുവിഭാഗം: 850 രൂപ (ജിഎസ്ടി ഉൾപ്പെടെ) 
എസ് സി, എസ് ടി, പിഡബ്ല്യുബിഡി, ഇഎസ്എം, ഡിഇഎസ്എം വിഭാഗങ്ങൾ: 175 രൂപ