ന്യൂഡൽഹി:  (KVARTHA) ഇന്ത്യ പോസ്റ്റ് ഗ്രാമീൺ ഡാക് സേവക് (ജിഡിഎസ്) തസ്തികകളിൽ 21,413 ഒഴിവുകളിലേക്ക് അപേക്ഷ ക്ഷണിച്ചിരിക്കുകയാണ്. ബ്രാഞ്ച് പോസ്റ്റ് മാസ്റ്റർ (ബിപിഎം), അസിസ്റ്റൻ്റ് ബ്രാഞ്ച് പോസ്റ്റ് മാസ്റ്റർ (എബിപിഎം), ഡാക് സേവക് എന്നീ തസ്തികകളിലേക്കാണ് നിയമനം.  യോഗ്യരായ ഉദ്യോഗാർത്ഥികൾക്ക് indiapostgdsonline(dot)gov(dot)in എന്ന വെബ്സൈറ്റ് വഴി അപേക്ഷിക്കാം. അപേക്ഷ സമർപ്പിക്കാനുള്ള അവസാന തീയതി 2025 മാർച്ച് മൂന്ന് ആണ്.

ഒഴിവുകളുടെ വിശദാംശങ്ങൾ

ആന്ധ്രാപ്രദേശ്, ആസാം, ബിഹാർ, ഛത്തീസ്‌ഗഢ്, ഡൽഹി, ഗുജറാത്ത്, ഹരിയാന, ഹിമാചൽ പ്രദേശ്, ജമ്മു & കാശ്മീർ, ജാർഖണ്ഡ്, കർണാടക, കേരളം, മധ്യപ്രദേശ്, മഹാരാഷ്ട്ര, നോർത്ത് ഈസ്റ്റ്, ഒഡീഷ, പഞ്ചാബ്, തമിഴ്‌നാട്, തെലങ്കാന, ഉത്തർപ്രദേശ്, ഉത്തരാഖണ്ഡ്, പശ്ചിമ ബംഗാൾ എന്നീ സംസ്ഥാനങ്ങളിലാണ് ഒഴിവുകളുള്ളത്. ഉത്തർപ്രദേശിലാണ് ഏറ്റവും കൂടുതൽ ഒഴിവുകൾ ഉള്ളത്, തൊട്ടുപിന്നിൽ തമിഴ്‌നാടാണ്.

കേരളത്തിലെ ഒഴിവുകൾ 

കേരളത്തിൽ 1385 ഒഴിവുകളുണ്ട്. ഓരോ സർക്കിളിലും ഡിവിഷനുകൾ തിരിച്ചാണ് ഒഴിവുകൾ വിജ്ഞാപനംചെയ്‌തിരിക്കുന്നത്‌. കേരള സർക്കിളിലെ ഡിവിഷനുകൾ: ആലപ്പുഴ, ആലുവ, കാലിക്കറ്റ്, കണ്ണൂർ, ചങ്ങനാശ്ശേരി, എറണാകുളം, ഇടുക്കി, ഇരിങ്ങാലക്കുട, കാസർകോട്, കോട്ടയം, ലക്ഷദ്വീപ്, മഞ്ചേരി, മാവേലിക്കര, ഒറ്റപ്പാലം, പാലക്കാട്, പത്തനംതിട്ട, കൊല്ലം, ആർ.എം.എസ്.സി.ടി.- കോഴിക്കോട്, ആർ.എം.എസ്.ഇ.കെ. എറണാകുളം, ആർ.എം.എസ്.ടി.വി. തിരുവനന്തപുരം, തലശ്ശേരി, തിരൂർ, തിരുവല്ല, തൃശൂർ, തിരുവനന്തപുരം നോർത്ത്, തിരുവനന്തപുരം സൗത്ത്, വടകര.

യോഗ്യതാ മാനദണ്ഡം

ജിഡിഎസ് തസ്തികയിലേക്ക് അപേക്ഷിക്കുന്നവർ 18 നും 40 നും ഇടയിൽ പ്രായമുള്ളവരായിരിക്കണം. അംഗീകൃത ബോർഡിൽ നിന്ന് കണക്കും ഇംഗ്ലീഷും വിഷയങ്ങളായി പത്താം ക്ലാസ് പാസായിരിക്കണം.  പ്രാദേശിക ഭാഷ അറിയണം. അടിസ്ഥാന കമ്പ്യൂട്ടർ നൈപുണ്യവും ഉണ്ടായിരിക്കണം. സൈക്കിൾ ഓടിക്കാനുള്ള കഴിവ്, ഉപജീവനത്തിനുള്ള വരുമാനം എന്നിവയും നിർബന്ധമാണ്.

തിരഞ്ഞെടുപ്പ് പ്രക്രിയ

പരീക്ഷയില്ലാതെ, പത്താം ക്ലാസ്സിൽ നേടിയ മാർക്കിന്റെ അടിസ്ഥാനത്തിൽ തയ്യാറാക്കുന്ന മെറിറ്റ് ലിസ്റ്റ് വഴിയാണ് തിരഞ്ഞെടുപ്പ്.  ഷോർട്ട്‌ലിസ്റ്റ് ചെയ്യപ്പെടുന്ന ഉദ്യോഗാർത്ഥികൾ രേഖാമൂലമുള്ള പരിശോധനയും ആവശ്യമെങ്കിൽ അടിസ്ഥാന മെഡിക്കൽ ഫിറ്റ്നസ് ടെസ്റ്റും പൂർത്തിയാക്കണം.

ശമ്പളം: 

ഡാക് സേവകായി നിയമിക്കപ്പെടുന്നവർക്ക് ടൈം റിലേറ്റഡ് കണ്ടിന്വിറ്റി അലവൻസും (ടി.ആർ.സി.എ.) ഡിയർനെസ് അലവൻസുമാണ് നൽകുക. ബ്രാഞ്ച് പോസ്റ്റ്മാസ്റ്റർക്ക് 12,000-29,380 രൂപയും അസിസ്റ്റന്റ് ബ്രാഞ്ച് പോസ്റ്റ്മാസ്റ്റർ/ഡാക് സേവകിന് 10,000-24,470 രൂപയുമാണ് ടി.ആർ.സി.എ.

എങ്ങനെ അപേക്ഷിക്കാം?

● indiapostgdsonline(dot)gov(dot)in എന്ന വെബ്സൈറ്റ് വഴി സന്ദർശിക്കുക.
● 'Register' ടാബിൽ ക്ലിക്ക് ചെയ്ത് പേര്, ജനനത്തീയതി, ഇമെയിൽ ഐഡി, മൊബൈൽ നമ്പർ തുടങ്ങിയ വിശദാംശങ്ങൾ നൽകുക.
● നൽകിയിട്ടുള്ള ക്രെഡൻഷ്യൽസ് ഉപയോഗിച്ച് ലോഗിൻ ചെയ്ത് വ്യക്തിഗത, വിദ്യാഭ്യാസ, വിശദാംശങ്ങൾ പൂരിപ്പിക്കുക.
● ഫോട്ടോ, ഒപ്പ്, വിദ്യാഭ്യാസ സർട്ടിഫിക്കറ്റുകൾ എന്നിവയുടെ സ്കാൻ ചെയ്ത പകർപ്പുകൾ അപ്‌ലോഡ് ചെയ്യുക.
● ഓൺലൈൻ വഴി പണമടയ്ക്കൽ പ്രക്രിയ പൂർത്തിയാക്കുക.
● ഭാവി ഉപയോഗത്തിനായി അപേക്ഷയുടെ പകർപ്പ് സൂക്ഷിക്കുക.
● കൂടുതൽ വിവരങ്ങൾക്കും അപ്‌ഡേറ്റുകൾക്കുമായി ഔദ്യോഗിക വെബ്സൈറ്റ് സന്ദർശിക്കുക.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

India Post announces 21,000 job vacancies for GDS, BPM, and ABPM positions with no exams or interviews. Apply before March 3, 2025.

#IndiaPost #JobVacancies #GDSJobs #BPMJobs #ABPMJobs #PostalJobs