PK Navas | പത്താം ക്ലാസ് പരീക്ഷയില്‍ മുഴുവന്‍ വിഷയത്തിലും എ പ്ലസ് കിട്ടിയിട്ടും പഠിക്കാന്‍ സീറ്റില്ല; വിദ്യാഭ്യാസ മന്ത്രിക്കെതിരെ പ്രതിഷേധിച്ച എം എസ് എഫ് വിദ്യാര്‍ഥികളെ കൈവിലങ്ങണിയിച്ച പൊലീസിനെതിരെ വിമര്‍ശനവുമായി പി കെ നവാസും പികെ ഫിറോസും

തിരുവനന്തപുരം: (www.kvartha.com) പത്താം ക്ലാസ് പരീക്ഷയില്‍ മുഴുവന്‍ വിഷയത്തിലും എ പ്ലസ് കിട്ടിയിട്ടും പഠിക്കാന്‍ സീറ്റില്ലാത്തതിനെ തുടര്‍ന്ന് വിദ്യാഭ്യാസ മന്ത്രിക്കെതിരെ പ്രതിഷേധിച്ച എം എസ് എഫ് വിദ്യാര്‍ഥികളെ കൈവിലങ്ങണിയിച്ച സംഭവത്തില്‍ പൊലീസിനെതിരെ വിമര്‍ശനവുമായി എം എസ് എഫ് കേരള കമിറ്റി പ്രസിഡന്റ് പി കെ നവാസ്. തന്റെ ഫേസ് ബുക് പോസ്റ്റിലൂടെയാണ് നവാസ് പൊലീസിനെതിരെ തിരിഞ്ഞത്.

രണ്ട് വിദ്യാര്‍ഥി നേതാക്കളെയാണ് കയ്യാമം വെച്ച് പൊലീസ് കൊണ്ടു പോവുന്നത്. അവര്‍ പരീക്ഷ എഴുതാതെ പാസായവരല്ല, വ്യാജ സര്‍ടിഫിക്കറ്റ് ഉണ്ടാക്കി ജോലി നേടാന്‍ നോക്കിയവരുമല്ല, പിന്‍വാതില്‍ വഴി ജോലിയില്‍ കേറിയവരുമല്ല. കുട്ടികള്‍ക്ക് പഠിക്കാന്‍ സീറ്റിന് വേണ്ടി സമരം ചെയ്തവരാണെന്നും നവാസ് പറയുന്നു.

വിദ്യാഭ്യാസ മന്ത്രിയെ കരിങ്കൊടി കാണിച്ചതിന് എംഎസ്എഫ് കോഴിക്കോട് ജില്ലാ വിംഗ് കണ്‍വീനര്‍ അഫ്രിന്‍, മണ്ഡലം സെക്രടറി ഫസീഹ് എന്നിവരെയാണ് പൊലീസ് അറസ്റ്റ് ചെയ്തത്.

തട്ടിപ്പും വെട്ടിപ്പും നടത്തുന്ന എസ് എഫ് ഐയുടെ കുട്ടി സഖാക്കളെ അറസ്റ്റ് ചെയ്തപ്പോള്‍ പൊലീസ് കാണിച്ച കരുതല്‍ കേരളം കണ്ടതാണ്. എന്നാല്‍ പഠിക്കാന്‍ സിറ്റില്ലാത്തതിനെ തുടര്‍ന്ന് പ്രതിഷേധിച്ച കുട്ടികളെയാണ് അറസ്റ്റ് ചെയ്തത്. ഇതിനെതിരെയാണ് നവാസ് പ്രതികരിച്ചത്. തെമ്മാടിത്തരത്തിന് മറുപടി പറയിപ്പിക്കുമെന്നും നവാസ് മുന്നറിയിപ്പുനല്‍കുന്നുണ്ട്.