കൊല്ലം: (KVARTHA) തിങ്കളാഴ്ച കൊല്ലത്തെ നടുക്കിയ കൊലപാതകവും ആത്മഹത്യയുമായി ബന്ധപ്പെട്ട  അന്വേഷണം പൊലീസ് ഊർജിതമാക്കി. സംഭവത്തിൽ കൂടുതൽ വിവരങ്ങൾ പുറത്തുവന്നു. ഫാത്തിമ മാതാ നാഷണൽ കോളജിലെ രണ്ടാം വർഷ ബിരുദ വിദ്യാർഥിയായ ഫെബിൻ ജോർജ് ഗോമസ് (21) ആണ് തേജസ് രാജിന്റെ (23) കുത്തേറ്റ് മരിച്ചത്. ഫെബിനെ കൊലപ്പെടുത്തിയ ശേഷം പിതാവ് ഗോമസിനെ ആക്രമിച്ച തേജസ് പിന്നീട് ട്രെയിനിന് മുന്നിൽ ചാടി ജീവനൊടുക്കി. കൊല്ലം ജില്ലാ ക്രൈം റെക്കോർഡ്സ് ബ്യൂറോയിലെ ഗ്രേഡ് എസ്ഐ തെക്കേടത്ത് രാജുവിന്റെ മകനാണ് തേജസ്.

ഫെബിന്റെ സഹോദരിയെ വിവാഹം കഴിക്കാൻ വിസമ്മതിച്ചതിലുള്ള പ്രതികാരമായാണ് തേജസ് ഈ കൃത്യം ആസൂത്രണം ചെയ്തതെന്ന് പൊലീസ് വൃത്തങ്ങൾ പറഞ്ഞു. തേജസും ഫെബിന്റെ സഹോദരിയും കോളജ് കാലം മുതൽ പ്രണയത്തിലായിരുന്നു. ഇരു കുടുംബാംഗങ്ങളും വിവാഹത്തിന് സമ്മതിച്ചെങ്കിലും, യുവതിക്ക് ബാങ്കിൽ ജോലി ലഭിച്ചതിന് ശേഷം പെട്ടെന്ന് ബന്ധം അവസാനിപ്പിക്കുകയായിരുന്നു. ഈ തീരുമാനത്തിൽ തേജസ് അസ്വസ്ഥനായിരുന്നുവെന്ന് പൊലീസ് പറഞ്ഞു. 

യുവതി തേജസിനെ പൂർണമായും അവഗണിക്കുകയും ഫോൺ കോളുകൾക്ക് മറുപടി നൽകാൻ വിസമ്മതിക്കുകയും ചെയ്തു. തേജസ് വീണ്ടും പ്രണയം പുതുക്കാൻ ശ്രമിച്ചപ്പോൾ, യുവതിയുടെ കുടുംബം ഇടപെട്ട് തേജസിന് മുന്നറിയിപ്പ് നൽകുകയും ബന്ധം പുനഃസ്ഥാപിക്കുന്നത് തടയുകയും ചെയ്തു. ഇതിൽ പ്രകോപിതനായ തേജസ് യുവതിയുടെ വീട്ടിലെത്തി ആക്രമണം നടത്തുകയായിരുന്നുവെന്നാണ് പൊലീസ് വ്യക്തമാക്കുന്നത്.

തിങ്കളാഴ്ച വൈകുന്നേരം 6.45 ഓടെയാണ് സംഭവം നടന്നത്. വീട്ടിലേക്ക് അതിക്രമിച്ച് കയറിയ തേജസ് സഹോദരിയെ ലക്ഷ്യമിട്ടാണ് എത്തിയതെന്നാണ് പൊലീസിന്റെ പ്രാഥമിക നിഗമനം. വാതിൽ തുറന്ന ഫെബിന്റെ പിതാവിനെ ആദ്യം ആക്രമിച്ച ശേഷം തേജസ് ഫെബിന്റെ നെഞ്ചിൽ കുത്തുകയായിരുന്നു.  പർദ ധരിച്ച് വെളുത്ത കാറിലാണ് തേജസ് ഫെബിന്റെ വീട്ടിലെത്തിയത്. അവിടെ ഫെബിനും പിതാവും മാത്രമാണ് ഉണ്ടായിരുന്നത്. 

ആദ്യം ഫെബിന്റെ പിതാവിനെ ആക്രമിച്ച ശേഷം ഫെബിനെ ആവർത്തിച്ച് കുത്തുകയായിരുന്നു. ഒന്നിലധികം തവണ കുത്തേറ്റിട്ടുണ്ട്. ഫെബിൻ പുറത്തേക്ക് ഓടി രക്ഷപ്പെടാൻ ശ്രമിച്ചെങ്കിലും വീടിന് സമീപത്തെ മതിലിന് അടുത്ത് തളർന്നുവീണു. പിന്നീട് ഓട്ടോറിക്ഷയിലാണ് ഫെബിനെ ആശുപത്രിയിൽ എത്തിച്ചത്. നെഞ്ചിൽ ആഴത്തിലുള്ള മുറിവുകളുണ്ടായിരുന്ന ഫെബിൻ ആശുപത്രിയിലേക്ക് കൊണ്ടുപോകും വഴി മരിച്ചു.

കൊലപാതകത്തിന് ശേഷം അതേ കാറിൽ തേജസ് സംഭവസ്ഥലത്തുനിന്ന് രക്ഷപ്പെട്ടു. ഏകദേശം മൂന്ന്  കിലോമീറ്റർ അകലെയുള്ള ചെമ്മാൻമുക്ക് റെയിൽവേ പാലത്തിൽ എത്തിയ ശേഷം കാർ പാലത്തിനടിയിൽ പാർക്ക് ചെയ്ത തേജസ്, കൈ ഞരമ്പ് മുറിച്ച് ട്രെയിനിന് മുന്നിൽ ചാടി ജീവനൊടുക്കുകയായിരുന്നു. തേജസിന്റെ കാറിൽ നിന്ന് പെട്രോളിന്റെ ഒരു കുപ്പിയും പൊലീസ് കണ്ടെത്തി. വാഹനത്തിനകത്തും പുറത്തും തേജസിന്റെ കൈ ഞരമ്പ് മുറിച്ചതിന്റെ രക്തക്കറകളും കണ്ടെത്തിയിട്ടുണ്ട്. സിറ്റി പൊലീസ് കമ്മീഷണർ, കൊല്ലം എസിപി, ഈസ്റ്റ് പൊലീസ് എന്നിവർ സ്ഥലത്തെത്തി പരിശോധന നടത്തി.

ശ്രദ്ധിക്കുക: ആത്മഹത്യ ഒന്നിനും ഒരു പരിഹാരമല്ല. ജീവിതം വിലമതിക്കേണ്ടതാണ്. ആത്മഹത്യ ചിന്തകൾ ഉണ്ടെങ്കിൽ ദിശ ഹെല്പ് ഡെസ്കിൽ സഹായം തേടുക, നമ്പർ: 1056, അല്ലെങ്കിൽ iCALL- നമ്പർ: 9152987821.  നിങ്ങളുടെ പ്രശ്നങ്ങൾക്ക് പരിഹാരമുണ്ട്.

ഈ വാർത്തയെ കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.

Love frustration led to the murder of a young man of the assailant in Kollam. The assailant, Tejas Raj, killed Febin George Gomas after being rejected by Febin's sister. He then died by jumping in front of a train.

#KollamCrime, #LoveFrustration, #Murder, #KeralaNews, #CrimeNews