മയ്യിൽ: (KVARTHA) പറശിനിക്കടവിനടുത്തെ കോൾമൊട്ട ജുമാ മസ്ജിദിന്റെ ഭണ്ഡാരം തകർത്ത് പണം കവർന്ന സംഭവത്തിൽ തളിപ്പറമ്പ് പോലീസ് അന്വേഷണം ശക്തമാക്കി. കോൾതുരുത്തി പാലത്തിന് സമീപമുള്ള കോടല്ലൂർ മുഹ്‌യുദ്ദീൻ ജുമാ മസ്ജിദിലെ ഭണ്ഡാരമാണ് ചൊവ്വാഴ്ച രാത്രിയിൽ തകർത്തത്. 

ബുധനാഴ്ച പുലർച്ചെ സുബ്ഹ് നമസ്കാരത്തിന് എത്തിയവരാണ് ഭണ്ഡാരത്തിന്റെ പൂട്ടുകൾ തകർത്ത നിലയിൽ കണ്ടത്. നഷ്ടപ്പെട്ട പണം എത്രയാണെന്ന് ഇപ്പോഴും വ്യക്തമായിട്ടില്ല. കമ്മിറ്റി ഭാരവാഹികൾ എല്ലാ മാസവും ഭണ്ഡാരം തുറന്ന് പണം എടുക്കാറുണ്ടെന്ന് പോലീസിന് മൊഴി നൽകിയിട്ടുണ്ട്.

കഴിഞ്ഞ മാസത്തെ പണം വെള്ളിയാഴ്ച എടുക്കാനിരിക്കെയാണ് കവർച്ച നടന്നത്. സാധാരണയായി മാസത്തിൽ രണ്ടായിരം രൂപയോളമാണ് ഭണ്ഡാരത്തിൽ ഉണ്ടാകാറുള്ളത്. എന്നാൽ റംസാൻ മാസത്തിൽ കൂടുതൽ സംഭാവനകൾ വരാറുള്ളതിനാൽ വലിയ തുക നഷ്ടപ്പെട്ടിരിക്കാമെന്നാണ് കരുതുന്നത്. 

കഴിഞ്ഞ വർഷവും ഇതേ ഭണ്ഡാരം കവർച്ച ചെയ്യപ്പെട്ടിരുന്നു. ഇതിനെത്തുടർന്ന് രണ്ട് പൂട്ടുകളാണ് ഭണ്ഡാരത്തിന് സ്ഥാപിച്ചത്. ഈ രണ്ട് പൂട്ടുകളും തകർത്താണ് വീണ്ടും പണം കവർന്നിരിക്കുന്നത്. തളിപ്പറമ്പ് പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. പോലീസ് നായയും ഫോറൻസിക് വിദഗ്ധരും സ്ഥലത്ത് പരിശോധന നടത്തി.

മഹല്ല് പ്രസിഡന്റ് ഹംസ ഹാജിയുടെ പരാതിയിലാണ് തളിപ്പറമ്പ് പോലീസ് അന്വേഷണം ആരംഭിച്ചത്. എസ്.ഐ ദിനേശൻ കൊതേരിയുടെ നേതൃത്വത്തിൽ പോലീസ് സ്ഥലത്ത് പരിശോധന നടത്തി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

A mosque treasury in Parassinikadavu was broken into and money was stolen, likely targeting increased Ramadan donations. This is the second such incident at the same mosque. Police have registered a case and are investigating with forensic experts and a dog squad.

#KeralaNews, #MosqueTheft, #Ramadan, #Crime, #Parassinikadavu, #PoliceInvestigation