തിരുവനന്തപുരം: (KVARTHA) വെഞ്ഞാറമൂടിൽ അഞ്ച് ജീവനുകൾ അപഹരിച്ച കൂട്ടക്കൊലപാതക പരമ്പരയിലെ പ്രതി അഫാന്റെ അറസ്റ്റ് രേഖപ്പെടുത്തി. മുത്തശ്ശിയെ കൊലപ്പെടുത്തിയ കേസിലാണ് ആദ്യ അറസ്റ്റ്. ചികിത്സയിൽ കഴിയുന്ന മെഡിക്കൽ കോളജ് ആശുപത്രിയിൽ എത്തിയാണ് പൊലീസ് സംഘം അറസ്റ്റ് രേഖപ്പെടുത്തിയത്. മുത്തശ്ശിയെ കൊലപ്പെടുത്തിയ കേസ് പാങ്ങോട് സ്റ്റേഷൻ പരിധിയിലും ബാക്കി കേസുകൾ വെഞ്ഞാറമൂട് സ്റ്റേഷനിലുമാണ്.

സാമ്പത്തിക പ്രതിസന്ധി

അഫാൻ തന്റെ കാമുകി ഫർസാനയുടെ സ്വർണമാല പണയം വെച്ച് പകരം മുക്കുപണ്ടം നൽകിയതായി അന്വേഷണത്തിൽ കണ്ടെത്തി. മാല തിരികെ ആവശ്യപ്പെട്ടതിനെ തുടർന്നുള്ള തർക്കങ്ങളും കൊലപാതകത്തിലേക്ക് നയിച്ചതായി സംശയിക്കുന്നു. കുടുംബത്തിൻ്റെ സാമ്പത്തിക ബാധ്യതകളെക്കുറിച്ചും പണം കടം നൽകിയവരെക്കുറിച്ചും പൊലീസ് അന്വേഷണം ആരംഭിച്ചു. കടബാധ്യതയാണ് കൊലപാതകങ്ങൾക്ക് കാരണമായതെന്നാണ് അഫാന്റെ മൊഴി. ഇത് പൊലീസ് ഗൗരവത്തോടെയാണ് കാണുന്നത്.

അഫാന്റെ ഞെട്ടിക്കുന്ന മൊഴികൾ

അഫാന്റെ ഇളയ സഹോദരൻ അഫ്സാനെയും കാമുകി ഫർസാനയെയും താൻ കൊലപ്പെടുത്തിയത് അവർ തന്നില്ലാതെ ജീവിക്കില്ലെന്ന് വിശ്വസിച്ചതിനാലാണെന്ന് അഫാൻ പൊലീസിനോട് പറഞ്ഞു. അമ്മ ഷെമിയെയും ഇതേ കാരണത്താൽ കൊലപ്പെടുത്താൻ ശ്രമിച്ചു. അവർ മരിച്ചെന്ന് കരുതി എലിവിഷം കഴിച്ച് ആത്മഹത്യക്ക് ശ്രമിച്ചെന്നും മൊഴിയിൽ പറയുന്നു. 

ദമാമിലുള്ള പിതാവ് പണം അയക്കാത്തതും നിയമപരമായ പ്രശ്നങ്ങളാൽ നാട്ടിലേക്ക് വരാൻ കഴിയാത്തതും കുടുംബത്തിൻ്റെ സാമ്പത്തിക ഭാരം അഫാനിൽ എത്തിച്ചു. കടം വർധിച്ചതോടെ വീട്ടിലെത്തിയവർ കുടുംബത്തെ അപമാനിച്ചു. ഇതിൽ മനംനൊന്ത് ആത്മഹത്യ ചെയ്യാൻ തീരുമാനിച്ചെങ്കിലും, താനില്ലാതെ ജീവിക്കാൻ കഴിയില്ലെന്ന് വിശ്വസിച്ച സഹോദരനെയും രോഗിയായ അമ്മയെയും കൊല്ലാൻ തീരുമാനിക്കുകയായിരുന്നുവെന്നാണ് അഫാന്റെ മൊഴി.

സ്വർണാഭരണ തർക്കവും പ്രതികാരവും

ആവർത്തിച്ചാവശ്യപ്പെട്ടിട്ടും സ്വർണാഭരണം പണയം വെക്കാൻ നൽകാത്തതിനെ തുടർന്നാണ് മുത്തശ്ശി സൽമാ ബീവിയെ കൊലപ്പെടുത്തിയത്. ഫർസാനയെ വിവാഹം കഴിക്കാനുള്ള അഫാന്റെ തീരുമാനത്തെ എതിർക്കുകയും പരിഹസിക്കുകയും ചെയ്തതിലുള്ള പ്രതികാരമാണ് അമ്മാവൻ ലത്തീഫിനെ കൊലപ്പെടുത്താൻ കാരണം. പണവും സഹായവുമില്ലാതെ എങ്ങനെ വിവാഹം കഴിക്കുമെന്നും ആരാണ് അവളെ സംരക്ഷിക്കുകയെന്നും ലത്തീഫ് ചോദിച്ചിരുന്നു. തൻ്റെയും ഫർസാനയുടെയും സംരക്ഷണം ലത്തീഫിൻ്റെ ഉത്തരവാദിത്തമാണെന്നും അത് നിരസിച്ചതിലുള്ള പ്രതികാരവുമാണ് കൊലപാതകത്തിലേക്ക് നയിച്ചതെന്ന് അഫാൻ പൊലീസിനോട് പറഞ്ഞു.

ആസൂത്രിതമായ കൊലപാതക പരമ്പര

എലിവിഷം കലർത്താൻ മദ്യം വാങ്ങിയതായും വിഷം കഴിച്ച് പൊലീസ് സ്റ്റേഷനിലേക്ക് ബൈക്കിൽ പോകാനാണ് ആദ്യം തീരുമാനിച്ചതെന്നും അഫാൻ പറഞ്ഞു. എന്നാൽ, ദേഹാസ്വാസ്ഥ്യം അനുഭവപ്പെട്ടതോടെ ഓട്ടോറിക്ഷയിലാണ് സ്റ്റേഷനിലെത്തിയത്. ആറ് മണിക്കൂറിനുള്ളിൽ അഞ്ച് കൊലപാതകങ്ങൾ നടത്തിയതിനാൽ കൊലപാതകങ്ങൾ ആസൂത്രിതമായിരുന്നുവെന്നാണ് പൊലീസ് സംശയിക്കുന്നത്.

തുടക്കം മാതാവിൽ നിന്ന്

പൊലീസ് വൃത്തങ്ങൾ പറയുന്നത് ഇങ്ങനെ: 'പണത്തെച്ചൊല്ലി മാതാവ് ഷെമിയുമായി തിങ്കളാഴ്ച രാവിലെ തർക്കമുണ്ടായി. പണം നൽകാത്തതിനെ തുടർന്ന് ഷാൾ ഉപയോഗിച്ച് കഴുത്ത് ഞെരിക്കാൻ ശ്രമിച്ചെങ്കിലും പരാജയപ്പെട്ടു. തുടർന്ന് ചുറ്റിക കൊണ്ട് തലയ്ക്കടിച്ച് ബോധം കെടുത്തി. മരിച്ചെന്ന് കരുതി വീട് പൂട്ടി അമ്മയുടെ ഫോണുമായി മുത്തശ്ശിയുടെ വീട്ടിലേക്ക് പോയി. ഉച്ചയ്ക്ക് 12.30 ന് മുത്തശ്ശിയുടെ വീട്ടിലേക്ക് പോകുന്ന സിസിടിവി ദൃശ്യങ്ങൾ പൊലീസിന് ലഭിച്ചു. ഒറ്റയ്ക്ക് താമസിച്ചിരുന്ന മുത്തശ്ശിയോട് സ്വർണാഭരണങ്ങൾ ആവശ്യപ്പെട്ടപ്പോൾ നൽകാൻ വിസമ്മതിച്ചു. തുടർന്ന് അടുക്കളയിൽ വെച്ച് ചുറ്റിക കൊണ്ട് ആക്രമിച്ചു. 

നാല് പവൻ സ്വർണമാല തട്ടിയെടുത്ത ശേഷം ഒരു ധനകാര്യ സ്ഥാപനത്തിൽ പണയം വെച്ചു. മുത്തശ്ശി മുമ്പ് സ്വർണ്ണാഭരണം പണയം വെക്കാൻ വിസമ്മതിച്ചത് അഫാനിൽ കൂടുതൽ ദേഷ്യമുണ്ടാക്കി. സ്വർണമാല പണയം വെച്ച ശേഷം അഫാൻ വെഞ്ഞാറമൂട്ടിലേക്ക് മടങ്ങി. ഷെമിയെ വിളിച്ചിട്ട് ഫോൺ എടുക്കാത്തതിനെ തുടർന്ന് പിതാവിന്റെ സഹോദരൻ അബ്ദുൽ ലത്തീഫിന് സംശയം തോന്നി. അഫാനെ വിളിച്ചപ്പോൾ കൊലപാതകങ്ങൾ അദ്ദേഹം അറിഞ്ഞെന്ന് കരുതി. തുടർന്ന് എസ്എൻ പുരത്തെ ലത്തീഫിൻ്റെ വീട്ടിലെത്തി ലത്തീഫിനെയും ഭാര്യ ശാഹിദ ബീവിയെയും കൊലപ്പെടുത്തി.

സ്കൂൾ കഴിഞ്ഞ് വീട്ടിലെത്തിയ സഹോദരൻ അഫ്സാൻ വീട് പൂട്ടിയിട്ടിരിക്കുന്നത് കണ്ട് മാതാവിന്റെ ഫോണിലേക്ക് വിളിച്ചു. ഉടൻ വരാമെന്ന് ഫോൺ കയ്യിലുണ്ടായിരുന്ന അഫാൻ പറഞ്ഞു. വീട്ടിലെത്തിയ ശേഷം അഫ്സാനെ ഓട്ടോറിക്ഷയിൽ അടുത്തുള്ള കടയിലേക്ക് അയച്ചു. തുടർന്ന് കാമുകി ഫർസാനയെ കൂട്ടി വീട്ടിലെത്തി. ഫർസാനയെ മുകളിലത്തെ മുറിയിലിരുത്തി. ഹാളിൽ കട്ടിലിൽ കിടക്കുകയായിരുന്ന അഫ്സാനെ കൊലപ്പെടുത്തി. തുടർന്ന് മുകളിലെ മുറിയിലെത്തി ഫർസാനയെയും ചുറ്റിക കൊണ്ട് തലയ്ക്കടിച്ച് കൊലപ്പെടുത്തി. കൊലപാതകത്തിന് ശേഷം കുളിച്ച് വസ്ത്രം മാറി വൈകീട്ട് ആറ് മണിയോടെ ഓട്ടോറിക്ഷയിൽ വെഞ്ഞാറമൂട് പൊലീസ് സ്റ്റേഷനിൽ കീഴടങ്ങി'.

മൊഴി രേഖപ്പെടുത്തും

കൊലപാതകങ്ങൾക്ക് ഉപയോഗിച്ചത് ഒരേയൊരു ചുറ്റിക മാത്രമാണെന്ന് പൊലീസ് സ്ഥിരീകരിച്ചു. ചുറ്റിക വാങ്ങിയ കട പൊലീസ് കണ്ടെത്തിയിട്ടുണ്ട്. എന്നാൽ കൂടുതൽ വിവരങ്ങൾ പുറത്തുവിട്ടിട്ടില്ല. മാതാവ്  ഷെമിയുടെ മൊഴി പൊലീസ് രേഖപ്പെടുത്തും. ബുധനാഴ്ച ചേർന്ന മെഡിക്കൽ ബോർഡ് അഫാന് മാനസിക പ്രശ്നങ്ങളില്ലെന്ന് കണ്ടെത്തിയിരുന്നു. രക്തപരിശോധന ഫലങ്ങൾ സാധാരണ നിലയിലാണ്. ചികിത്സയോട് ആദ്യം സഹകരിക്കാതിരുന്ന അഫാൻ പിന്നീട് സഹകരിക്കാൻ തുടങ്ങി. കാലിലെ ഡ്രസ്സിംഗ് നീക്കം ചെയ്തു. ബുധനാഴ്ച കുടിവെള്ളം ആവശ്യപ്പെട്ടു. കാർഡിയോളജി യൂണിറ്റിന് അടുത്തുള്ള വാർഡിലാണ് അഫാനെ പ്രവേശിപ്പിച്ചിരിക്കുന്നത്. മുറിയിൽ രണ്ട് പൊലീസ് ഉദ്യോഗസ്ഥർ 24 മണിക്കൂറും നിരീക്ഷിക്കുന്നുണ്ട്.

ഈ വാർത്ത മറ്റുള്ളവരിലേക്ക് എത്തിക്കാൻ ഷെയർ ചെയ്യൂ. നിങ്ങളുടെ അഭിപ്രായങ്ങളും നിർദേശങ്ങളും കമൻ്റ് ചെയ്യൂ.

Afaan, the accused in the Venjaramoodu murder series, has been arrested. He confessed to killing five people, including his grandmother, brother, girlfriend, and aunt and uncle. He cited financial troubles, family disputes, and a belief that his loved ones couldn't live without him as motives. Police suspect the murders were premeditated.

#VenjaramooduMurder #CrimeNews #KeralaCrime #Arrest #MurderCase #PoliceInvestigation