ദുബൈ: (KVARTHA) നിങ്ങൾക്ക് ദുബൈയിൽ ലഭിച്ച ട്രാഫിക് പിഴ തെറ്റാണെന്ന് തോന്നുന്നുണ്ടോ? എങ്കിൽ ഇനി അത് ഓൺലൈനായി ചോദ്യം ചെയ്യാവുന്നതാണ്. ദുബൈ പബ്ലിക് പ്രോസിക്യൂഷൻ വഴിയാണ് ഇതിനുള്ള സൗകര്യം ഒരുക്കിയിരിക്കുന്നത്. നിങ്ങളുടെ പക്കൽ ആവശ്യമായ രേഖകളും പിഴ തെറ്റാണെന്ന് തെളിയിക്കുന്ന രേഖകളും ഉണ്ടെങ്കിൽ  ഇതിനായി അപേക്ഷിക്കാം. വാദം ശരിയാണെന്ന് തെളിഞ്ഞാൽ പിഴ പൂർണ്ണമായോ ഭാഗികമായോ ഒഴിവാക്കി കിട്ടാൻ സാധ്യതയുണ്ട്.

ആർക്കൊക്കെ ചോദ്യം ചെയ്യാൻ സാധിക്കും?

ദുബൈ പോലീസ് ജനറൽ കമാൻഡ് ട്രാഫിക് കൺട്രോളർമാരുടെ സഹായത്തോടെ നൽകിയിട്ടുള്ള ട്രാഫിക് പിഴകൾക്കെതിരെയാണ്  ഒബ്ജക്ഷൻ സമർപ്പിക്കാൻ സാധിക്കുക.

ആവശ്യമായ രേഖകൾ എന്തൊക്കെ?

ട്രാഫിക് പിഴയെ ചോദ്യം ചെയ്യാൻ  ചില പ്രധാന രേഖകൾ സമർപ്പിക്കേണ്ടതുണ്ട്.  നേരിട്ടാണ് അപേക്ഷിക്കുന്നതെങ്കിൽ  എമിറേറ്റ്സ് ഐ.ഡി (യുഎഇ പൗരന്മാർക്കും താമസക്കാർക്കും) അല്ലെങ്കിൽ പാസ്പോർട്ട് വിവരങ്ങൾ (സന്ദർശകർക്ക്) എന്നിവയുടെ പകർപ്പ് ആവശ്യമാണ്. മറ്റൊരാളാണ് നിങ്ങൾക്കായി അപേക്ഷ സമർപ്പിക്കുന്നതെങ്കിൽ, അയാൾക്കുള്ള പവർ ഓഫ് അറ്റോർണി രേഖയുടെ പകർപ്പ് നൽകണം. കൂടാതെ, ട്രാഫിക് നിയമലംഘനത്തിന്റെ വിശദാംശങ്ങൾ, പിഴയുടെ നമ്പർ, പിഴ നൽകിയ തീയതി എന്നിവയും പ്രധാനമാണ്. 

ഏറ്റവും പ്രധാനമായി, നിങ്ങൾ പിഴയെ ചോദ്യം ചെയ്യാനുള്ള കാരണം വ്യക്തമാക്കുന്ന തെളിവുകൾ ഹാജരാക്കണം. ഇതിനായി ഡാഷ്‌ക്യാം ദൃശ്യങ്ങൾ ഉപയോഗിക്കുന്നത് അധികൃതർ പ്രോത്സാഹിപ്പിക്കുന്നു. എന്നാൽ ഈ ദൃശ്യങ്ങൾ സംഭവം കൃത്യമായി രേഖപ്പെടുത്തിയിട്ടുള്ളതായിരിക്കണം.

എങ്ങനെ ഓൺലൈനായി അപേക്ഷിക്കാം?

ട്രാഫിക് പിഴയെ ചോദ്യം ചെയ്യാൻ താഴെ പറയുന്ന നടപടിക്രമങ്ങൾ പിന്തുടരുക:

ആദ്യമായി ദുബൈ പബ്ലിക് പ്രോസിക്യൂഷൻ്റെ ഔദ്യോഗിക വെബ്സൈറ്റ് www(dot)dxbpp(dot)gov(dot)ae സന്ദർശിക്കുക. ഹോംപേജിൽ കാണുന്ന ‘Request to Object a Traffic Fine’ എന്ന ഓപ്ഷൻ തിരഞ്ഞെടുക്കുക. അതിനുശേഷം നിങ്ങളുടെ വ്യക്തിഗത വിവരങ്ങൾ നൽകുക. പാസ്പോർട്ടിലുള്ളത് പോലെയുള്ള നിങ്ങളുടെ മുഴുവൻ പേര്, നിങ്ങൾ യുഎഇ താമസക്കാരനാണോ അതോ സന്ദർശകനാണോ എന്നുള്ള വിവരം, രാജ്യം, ജനനത്തീയതി, ഇമെയിൽ വിലാസം എന്നിവ നൽകുക. ട്രാഫിക് പിഴയുടെ തരം ഡ്രോപ്പ്-ഡൗൺ മെനുവിൽ നിന്ന് തിരഞ്ഞെടുക്കുക.

അടുത്തതായി വാഹനത്തിൻ്റെ വിശദാംശങ്ങൾ നൽകുക. വാഹനത്തിൻ്റെ പ്ലേറ്റ് നമ്പർ, കോഡ്, എവിടെ രജിസ്റ്റർ ചെയ്തു, വാഹനത്തിൻ്റെ ടൈപ്പ് എന്നിവ നൽകണം. ഒപ്പം  ഡ്രൈവിംഗ് ലൈസൻസ് നമ്പറും നൽകുക. അതിനുശേഷം ലഭിച്ച ട്രാഫിക് പിഴയുടെ വിശദാംശങ്ങളായ പിഴയുടെ നമ്പറും അത് നൽകിയ തീയതിയും കൃത്യമായി രേഖപ്പെടുത്തുക.

തുടർന്ന് നിങ്ങളുടെ താമസസ്ഥലത്തിൻ്റെ വിവരങ്ങൾ നൽകണം. എമിറേറ്റ്, ഏരിയ, കെട്ടിടത്തിൻ്റെ പേര്, വില്ല നമ്പർ അല്ലെങ്കിൽ അപ്പാർട്ട്മെൻ്റ് നമ്പർ എന്നിവ കൃത്യമായി പൂരിപ്പിക്കുക.  എമിറേറ്റ്സ് ഐ.ഡിയിൽ രജിസ്റ്റർ ചെയ്തിട്ടുള്ള മൊബൈൽ നമ്പർ നൽകുക. ഈ നമ്പറിലേക്ക് ഒരു സ്ഥിരീകരണ സന്ദേശം വരുന്നതായിരിക്കും. ഇത് ലഭിച്ചതിന് ശേഷം മാത്രമേ  അപേക്ഷയുമായി മുന്നോട്ട് പോകാൻ സാധിക്കൂ.

ഇനി നിങ്ങൾ എന്തിനാണ് ട്രാഫിക് നിയമലംഘനത്തെ ചോദ്യം ചെയ്യുന്നത് എന്നുള്ള വിശദീകരണം നൽകണം. ഈ ഭാഗം അറബി ഭാഷയിൽ മാത്രമേ പൂരിപ്പിക്കാൻ പാടുള്ളൂ എന്നത് ശ്രദ്ധിക്കുക. ഇംഗ്ലീഷിലുള്ള അപേക്ഷകൾ സ്വീകരിക്കില്ല. നിങ്ങൾക്ക് അറബി ഭാഷയിൽ എഴുതാൻ ബുദ്ധിമുട്ടുണ്ടെങ്കിൽ ഒരു നിയമപരമായ അറബി വിവർത്തകന്റെ സഹായം തേടാവുന്നതാണ്. അതുപോലെ, ഒരു അഭിഭാഷകനെ നിയമിക്കുന്നതും ഈ പ്രക്രിയയിൽ സഹായകമായേക്കാം. അവർക്ക് നിങ്ങളെ ശരിയായ രീതിയിൽ നയിക്കാനും ഒരുപക്ഷേ പിഴ ഒഴിവാക്കാനോ കുറയ്ക്കാനോ സാധിച്ചേക്കും.

അവസാനമായി ആവശ്യമായ രേഖകൾ അപ്‌ലോഡ് ചെയ്യുക. ട്രാഫിക് നിയമലംഘന അറിയിപ്പിൻ്റെ പകർപ്പ്, എമിറേറ്റ്സ് ഐഡി കാർഡ്, ഡ്രൈവിംഗ് ലൈസൻസ്, വാഹനത്തിൻ്റെ ലൈസൻസ്, മറ്റ് എന്തെങ്കിലും തെളിവുകൾ എന്നിവ അപ്‌ലോഡ് ചെയ്യേണ്ടതാണ്. അപേക്ഷ സമർപ്പിക്കുന്നതിന് മുൻപ് നിങ്ങൾ ചില കാര്യങ്ങൾ ഉറപ്പുവരുത്തണം. ഈ ട്രാഫിക് നിയമലംഘനം ഇതിനുമുൻപ് മറ്റേതെങ്കിലും അതോറിറ്റിക്ക് മുന്നിൽ ചോദ്യം ചെയ്തിട്ടില്ലെന്നും പിഴ ഇതുവരെ അടച്ചിട്ടില്ലെന്നും നിങ്ങൾ നൽകിയിട്ടുള്ള വിവരങ്ങളെല്ലാം കൃത്യവും സത്യസന്ധവുമാണെന്നും ഉറപ്പാക്കുക.

അപേക്ഷയും അനുബന്ധ രേഖകളും സമർപ്പിച്ചുകഴിഞ്ഞാൽ ദുബൈ പബ്ലിക് പ്രോസിക്യൂഷനിലെ ട്രാഫിക് പ്രോസിക്യൂഷൻ വിഭാഗം ഇത് അവലോകനം ചെയ്യും. അതിനുശേഷം നിങ്ങളുടെ അപേക്ഷ സ്വീകരിക്കുകയോ നിരസിക്കുകയോ ചെയ്യും. അപേക്ഷ സ്വീകരിക്കുകയാണെങ്കിൽ, നിങ്ങൾ ട്രാഫിക് കോടതിയിൽ ഹാജരാകേണ്ടിവരും.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക. 

If you believe you have wrongly received a traffic fine in Dubai, you can now challenge it online through the Dubai Public Prosecution website. You need to provide necessary documents, including proof that the fine is incorrect (dashcam footage encouraged), personal and vehicle details, and the reason for objection in Arabic. If your claim is valid, the fine may be fully or partially waived after review and a possible court appearance.

#DubaiTrafficFine #OnlineObjection #DubaiLaw #TrafficRules #UAE #Dashcam