യുഎഇയും കടലും തമ്മിലുള്ള ബന്ധമറിയാം; സന്ദർശകർക്കായി ദുബൈ എക്സ്പോയിൽ വ്യത്യസ്ത കാഴ്ചയൊരുങ്ങി

ദുബൈ: (www.kvartha.com 26.09.2021) എക്സ്‌പോയിൽ യു എ ഇയുടെ സമ്പുഷ്ടമായ സമുദ്ര ആവാസവ്യവസ്ഥയുടെ ഊഷ്മളമായ കഥപറയുന്ന പ്രത്യേക പദ്ധതിയുമായി ഒരുകൂട്ടമാളുകൾ. കമ്യൂനിറ്റി ആർട് പദ്ധതിയുടെ ഭാഗമായി സമുദ്ര ആവാസവ്യവസ്ഥ, ജലജീവികൾ, കാലാവസ്ഥ, വെല്ലുവിളികൾ എന്നിവയെല്ലാം ചിത്രങ്ങളുടെയും മറ്റ് അവതരണങ്ങളിലൂടെയും സന്ദർശകരുമായി പങ്കുവെക്കുന്ന മഹത്തായ ഒരു സംരംഭത്തിന്
തിരശീലയുയരുന്നു.
  മീൻ പിടുത്തവുമായി ബന്ധപ്പെട്ട് പ്രവർത്തിക്കുന്നവർ, ഗവേഷകർ, ശാസ്ത്രജ്ഞർ, കലാകാരന്മാർ, വിദ്യാർഥികൾ, യു എ ഇ ആസ്ഥാനമായി പ്രവർത്തിക്കുന്ന സാമൂഹ്യ സംഘടനകൾ എന്നിവയെല്ലാം സംയുക്തമായാണ് പരിപാടികൾ അവതരിപ്പിക്കുന്നത്. ‘ഹമൂർ ഹൗസ്’ എന്നപേരിൽ സുസ്ഥിരതയുടെ സന്ദേശമാണ് ഇത് സന്ദർശകരോട് പങ്കുവെക്കുക. പുനരുപയോഗ വസ്തുക്കൾ ചേർത്ത് നിർമിക്കുന്ന സൃഷ്ടിയായ പവിഴപ്പുറ്റ് പദ്ധതിയുടെ ഭാഗമാകാനും ഇതിലൂടെ സന്ദർശകർക്ക് അവസരം കൈവരും. ഇൻസ്റ്റലേഷനുകളും ഇതിന്റെ ഭാഗമായി ഒരുക്കിയിട്ടുണ്ട്.



സമുദ്രജീവിതമെന്ന ആശയത്തിൽ നടന്ന ശില്പശാലയിൽ യു എ ഇ സഹിഷ്ണുത, സഹവർത്തിത്വ മന്ത്രിയും എക്‌സ്‌പോ 2020 കമീഷനർ ജനറലുമായ ശൈഖ് നഹ്യാൻ ബിൻ മുബാറക് ആലു നഹ്യാൻ വിദ്യാർഥികൾക്കൊപ്പം ഭാഗമായി. 118 സ്കൂളുകളിൽനിന്നുള്ള 2,835 വിദ്യാർഥികൾ ഒരുക്കിയ 608 കലാസൃഷ്ടികളും പദ്ധതിയുടെ ഭാഗമായി പ്രദർശിപ്പിക്കും.