അബുദബി: (KVARTHA) യുഎഇയിൽ ഉപയോഗിച്ച കാർ വാങ്ങുന്നവർക്ക് ഏറെ ശ്രദ്ധയും ജാഗ്രതയും ആവശ്യമാണ്. കേടായ കാറുകൾ വിൽക്കുന്നവരുടെ തട്ടിപ്പുകളിൽ നിന്ന് രക്ഷ നേടാനും ഉപഭോക്താക്കളുടെ അവകാശങ്ങൾ സംരക്ഷിക്കാനുമുള്ള നിയമങ്ങളെക്കുറിച്ച് അവബോധം ഉണ്ടായിരിക്കേണ്ടത് അത്യന്താപേക്ഷിതമാണ്. യുഎഇയിൽ നിലവിലുള്ള ശക്തമായ ഉപഭോക്തൃ സംരക്ഷണ നിയമങ്ങൾ ഉപയോഗിച്ച കാർ വാങ്ങുന്നവരുടെ താൽപ്പര്യങ്ങൾ സംരക്ഷിക്കുന്നു. ഈ നിയമങ്ങളെക്കുറിച്ചും ഉപയോഗിച്ച കാർ വാങ്ങുമ്പോൾ ശ്രദ്ധിക്കേണ്ട കാര്യങ്ങളെക്കുറിച്ചും വിശദമായി.

ഉപയോഗിച്ച കാർ വാങ്ങുമ്പോൾ ശ്രദ്ധിക്കേണ്ട കാര്യങ്ങൾ

ഉപയോഗിച്ച കാർ വാങ്ങുമ്പോൾ അതിന്റെ സാങ്കേതിക വശങ്ങളെക്കുറിച്ച് നല്ല ധാരണ ഉണ്ടായിരിക്കണം. കാറിൻ്റെ എഞ്ചിൻ, ട്രാൻസ്മിഷൻ, ബ്രേക് സിസ്റ്റം തുടങ്ങിയ പ്രധാന ഭാഗങ്ങൾ വിദഗ്ധ മെക്കാനിക്കിനെക്കൊണ്ട് പരിശോധിപ്പിക്കുന്നത് ഭാവിയിൽ ഉണ്ടാകാവുന്ന അറ്റകുറ്റപ്പണികളുടെ ചെലവ് കുറയ്ക്കാൻ സഹായിക്കും. വിൽപ്പനക്കാരൻ കാറിനെക്കുറിച്ച് നൽകുന്ന വിവരങ്ങൾ പൂർണമായി വിശ്വസിക്കാതെ സ്വയം പരിശോധന നടത്തുന്നത് ഉചിതമാണ്. 

ഉപഭോക്തൃ സംരക്ഷണ നിയമവും നിയമപരമായ സംരക്ഷണവും

യുഎഇയിലെ ഉപഭോക്തൃ സംരക്ഷണ നിയമം, ഉപയോഗിച്ച കാർ വാങ്ങുന്നവർക്ക് ശക്തമായ നിയമപരമായ സംരക്ഷണം നൽകുന്നുണ്ട്. വിൽപ്പനക്കാരൻ ഉൽപ്പന്നത്തെക്കുറിച്ച് കൃത്യവും വ്യക്തവുമായ വിവരങ്ങൾ നൽകണം. ഉപഭോക്താവിനെ തെറ്റിദ്ധരിപ്പിക്കാൻ പാടില്ല. 2020 ലെ ഫെഡറൽ നിയമം നമ്പർ 15, 2023 ലെ ഭേദഗതി ചെയ്ത ഫെഡറൽ ഡിക്രി-നിയമം നമ്പർ 5, 2023 ലെ മന്ത്രിസഭ തീരുമാനം നമ്പർ 66 എന്നിവ ഉപഭോക്തൃ അവകാശങ്ങൾ സംരക്ഷിക്കുന്ന പ്രധാന നിയമങ്ങളാണ്. 

ഈ നിയമങ്ങൾ പ്രകാരം, ഉൽപ്പന്നത്തിന്റെ വിവരണം, ഗുണമേന്മ, ഉത്ഭവം, വാറന്റി തുടങ്ങിയ കാര്യങ്ങളിൽ തെറ്റായ വിവരങ്ങൾ നൽകുന്നത് നിയമലംഘനമാണ്. ഇത് ഉപഭോക്താവിന് നിയമപരമായി മുന്നോട്ട് പോകാനുള്ള വഴി തുറക്കുന്നു.

വിൽപ്പനക്കാരൻ്റെ നിയമപരമായ ബാധ്യതകൾ

ഒരു സെക്കൻഡ് ഹാൻഡ് ഉൽപ്പന്നം വിൽക്കുമ്പോൾ അതിന്റെ യഥാർത്ഥ അവസ്ഥ വ്യക്തമായി പറയേണ്ടത് വിൽപ്പനക്കാരന്റെ നിയമപരമായ ബാധ്യതയാണ്. ഉൽപ്പന്നത്തെക്കുറിച്ചുള്ള പരസ്യം ഉപഭോക്താവിനെ തെറ്റിദ്ധരിപ്പിക്കുന്ന രീതിയിലാകരുത്. കേടായ ഉൽപ്പന്നം വിറ്റാൽ ഉപഭോക്താവിന് വിൽപ്പനക്കാരനിൽ നിന്ന് നഷ്ടപരിഹാരം ആവശ്യപ്പെടാം. കൂടാതെ, വാറന്റിയുള്ള ഉൽപ്പന്നമാണെങ്കിൽ അതിന്റെ എല്ലാ വിശദാംശങ്ങളും രേഖാമൂലം നൽകണം. വാറണ്ടിയുടെ കാലാവധി, കവറേജ് എന്നിവയെക്കുറിച്ചെല്ലാം വ്യക്തമായ ധാരണ ഉപഭോക്താവിന് ഉണ്ടായിരിക്കണം.

ഉപഭോക്താവിൻ്റെ അവകാശങ്ങളും പരാതി നൽകേണ്ട രീതിയും

കേടായ കാർ വിൽക്കുന്ന വിൽപ്പനക്കാരന് 100,000 ദിർഹം വരെ പിഴ ചുമത്താൻ നിയമത്തിൽ വ്യവസ്ഥയുണ്ടെന്ന് ഖലീജ് ടൈംസ് റിപ്പോർട് ചെയ്‌തു. ഉപഭോക്താവിന് യുഎഇ സാമ്പത്തിക മന്ത്രാലയത്തിലോ അതത് എമിറേറ്റിലെ ബന്ധപ്പെട്ട അതോറിറ്റിയിലോ പരാതി നൽകാവുന്നതാണ്. കാറിന്റെ അവസ്ഥ മറച്ചുവെച്ച് ഉപഭോക്താവിനെ തെറ്റിദ്ധരിപ്പിച്ചാൽ വിൽപ്പനക്കാരനെതിരെ നിയമനടപടി സ്വീകരിക്കാൻ ഉപഭോക്താവിന് അവകാശമുണ്ട്. 

വാറന്റിയുള്ള കാറാണെങ്കിൽ, വാറന്റി കാലയളവിനുള്ളിൽ ഉണ്ടാകുന്ന തകരാറുകൾക്ക് വിൽപ്പനക്കാരൻ ഉത്തരവാദി ആയിരിക്കും. ഓരോ കേസിന്റെയും സാഹചര്യങ്ങൾ വ്യത്യസ്തമായിരിക്കാം. അതിനാൽ, സമാനമായ പ്രശ്നങ്ങൾ നേരിടുന്നവർ ഒരു നിയമ വിദഗ്ധന്റെ ഉപദേശം തേടുന്നത് ഉചിതമാണ്. ഇത് അവകാശങ്ങൾ സംരക്ഷിക്കാൻ സഹായിക്കും.

#UAEcars #UsedCars #ConsumerRights #UAELaw #CarFraud #DubaiCars