മനസ്സില്‍ ബാപ്പൂജിയുമായി പുതിയ ഭാരതത്തിലേക്ക്; കുമ്മനം നയിക്കുന്ന ബിജെപി സങ്കല്‍പ്പ് പദയാത്ര ചൊവ്വാഴ്ച കണ്ണൂരില്‍

കണ്ണൂര്‍: (www.kvartha.com 25.11.2019) മഹാത്മാഗാന്ധിയുടെ 150-ാം ജന്മവാര്‍ഷികാചരണത്തിന്റെ ഭാഗമായി ബിജെപി ദേശീയാടിസ്ഥാനത്തില്‍ നടത്തുന്ന പ്രചാരണ പരിപാടികളുടെ ഭാഗമായി ബിജെപി ജില്ലാ കമ്മറ്റിയുടെ ആഭിമുഖ്യത്തില്‍ ചൊവ്വാഴ്ച കണ്ണൂരില്‍ ഗാന്ധി സങ്കല്‍പ്പ് പദയാത്ര നടത്തുമെന്ന് ജില്ലാ പ്രസിഡണ്ട് പി സത്യപ്രകാശ് വാര്‍ത്താ സമ്മേളനത്തില്‍ അറിയിച്ചു. മനസ്സില്‍ ബാപ്പൂജിയുമായി പുതിയ ഭാരതത്തിലേക്ക് എന്ന സന്ദേശവുമുയര്‍ത്തിയാണ് യാത്ര സംഘടിപ്പിക്കുന്നത്.


മുന്‍ സംസ്ഥാന പ്രസിഡന്റ് കുമ്മനം രാജശേഖരന്റെ നേതൃത്വത്തില്‍ ഉച്ചക്ക് 2.30 ന് പുതിയതെരുവില്‍ നിന്നാരംഭിക്കുന്ന പദയാത്ര പ്രമുഖ ഗാന്ധിയന്‍ വിപി അപ്പുക്കുട്ടപ്പൊതുവാള്‍ ദേശീയപതാക നല്‍കി ഉദ്ഘാടനം ചെയ്യും. വൈകുന്നേരം 5.30 ന് കണ്ണൂരില്‍ നടക്കുന്ന സമാപനപരിപാടിയില്‍ സംസ്ഥാന-ജില്ലാ നേതാക്കള്‍ പങ്കെടുക്കും. ആയിരങ്ങള്‍ പരിപാടിയില്‍ അണിചേരും. വാര്‍ത്താ സമ്മേളനത്തില്‍ സങ്കല്‍പ്പ് പദയാത്രാ സംഘാടക സമിതി ചെയര്‍മാന്‍ ഭാഗ്യശീലന്‍ ചാലാട്, ജനറല്‍ കണ്‍വീനര്‍ പി വനീഷ്ബാബു എന്നിവരും പങ്കെടുത്തു.