തട്ടിക്കൊണ്ടുപോയ എല്‍.കെ.ജി.വിദ്യാര്‍ത്ഥിനിയെ നാടകീയമായി കണ്ടെത്തി

ചാലക്കുടി: തട്ടിക്കൊണ്ടുപോയ കാടുകുറ്റി ആംഗ്ലോ ഇന്ത്യന്‍ സ്‌കൂളിലെ എല്‍.കെ.ജി.വിദ്യാര്‍ത്ഥിനിയായ നാലുവയസുകാരി അനുശ്രീയെ കണ്ടെത്തി. വെള്ളിയാഴ്ച രാവിലെ 9.45 ഓടെ വാനില്‍ സ്‌കൂളിലെത്തിയ കുട്ടിയെ മാരുതി കാറിലെത്തിയ ഒരാള്‍  തട്ടിക്കൊണ്ടുപോകുകയായിരുന്നു. സഹപാഠികളാണ് കുട്ടിയെ തട്ടിക്കൊണ്ടുപോയ വിവരം അധികൃതരെ അറിയിച്ചത്.

തൃശൂര്‍ അന്നമനാട് വിളക്കത്തുപറമ്പില്‍ മധുവിന്റെ മകള്‍ അനുഷയെയാണ് കാറിലെത്തിയ സംഘം തട്ടിക്കൊണ്ടുപോയത്. തുടര്‍ന്ന് കുട്ടിയുടെ പിതാവിനെ ഫോണില്‍ വിളിച്ച് 15 ലക്ഷം രൂപ തന്നാല്‍ കുട്ടിയെ മോചിപ്പിക്കാമെന്നു പറഞ്ഞു. കുറച്ചുകഴിഞ്ഞ് തുക ഏഴുലക്ഷമായി കുറച്ചു.

കുട്ടിയെ തേടിയുള്ള അന്വേഷണം ഊര്‍ജിതമാക്കിയതോടെ അക്രമികള്‍ കുട്ടിയെ സെന്റ് ജോര്‍ജ് സ്‌കൂളിനു സമീപം ഉപേക്ഷിച്ച് കടന്നുകളയുകയായിരുന്നു. ചാലക്കുടി ഡി.വൈ.എസ്.പി, പി.കെ.തോമസ് , സി.ഐ, വി.ടി. ഷാജന്‍ എന്നിവരുടെ നേതൃത്വത്തില്‍ പോലീസ് അന്വേഷണം ആരംഭിച്ചു.