കഴക്കൂട്ടം റെയില്‍വെ പാളത്തില്‍ വിള്ളല്‍: ട്രെയിനുകള്‍ വൈകി ഓടുന്നു

തിരുവനന്തപുരം: കഴക്കൂട്ടം ലെവല്‍ ക്രോസിലെ റെയില്‍വെ പാളത്തില്‍ വിള്ളല്‍ . വിള്ളല്‍ കണ്ടെത്തിയതിനെ തുടര്‍ന്ന്   ഇതുവഴിയുള്ള റെയില്‍ ഗതാഗതം നിറുത്തിവെച്ചു. ഒരുമണിക്കൂര്‍ നേരത്തെ അറ്റകുറ്റപ്പണികള്‍ക്ക് ശേഷം വ്യാഴാഴ്ച രാവിലെ എട്ടുമണിയോടെയാണ്    ഗതാഗതം താല്‍ക്കാലികമായി പുനഃസ്ഥാപിച്ചത്.

വ്യാഴാഴ്ച രാവിലെ 6.30 മണിയോടെ വെട്ടുറോഡ് പുത്തന്‍വീട്ടില്‍ കെ.ദിവാകരനാണ് പാളത്തില്‍ വിള്ളല്‍ കണ്ടത്. ദിവാകരന്‍  ഉടന്‍ തന്നെ ലെവല്‍ ക്രോസിലെ ജീവനക്കാരനെ വിവരം അറിയിക്കുകയായിരുന്നു. ആ സമയം അതുവഴി തിരുവനന്തപുരത്ത് നിന്ന് വന്ന ചെന്നൈ മെയില്‍ കടന്നുപോകേണ്ടതായിരുന്നു.

ലെവല്‍ ക്രോസില്‍ നിന്നും വിവരം  ലഭിച്ചതിന്റെ അടിസ്ഥാനത്തില്‍ ട്രെയിനുകള്‍ കഴക്കൂട്ടം റെയില്‍വെ സ്‌റ്റേഷനിലും കൊച്ചുവേളി റെയില്‍വെ സ്‌റ്റേഷനിലും നിര്‍ത്തിയിടുകയായിരുന്നു.

കൊച്ചുവേളിയില്‍ നിന്ന് ജീവനക്കാരെത്തി വിള്ളല്‍ പ്രശ്‌നം താല്‍ക്കാലികമായി പരിഹരിച്ചതിനുശേഷമാണ് ഗതാഗതം പുന:സ്ഥാപിച്ചത്. വിള്ളലിന്റെ
കാരണം വ്യക്തമല്ല. അധികൃതര്‍ അന്വേഷണം ആരംഭിച്ചിട്ടുണ്ട്.
എസ്.എന്‍.ഡി.പി യോഗം വേണ്ടിവന്നാല്‍ രാഷ്ട്രീയത്തില്‍ ഇടപെടും: തുഷാര്‍ വെള്ളാപ്പള്ളി