UDF Kottayam | കോട്ടയത്ത് സജി മഞ്ഞക്കടമ്പിലിന് പകരം ഇ ജെ ആഗസ്തി യു ഡി എഫ് ജില്ലാ ചെയർമാൻ; മോൻസ് ജോസഫിന്റെ നോമിനിയെ പരിഗണിക്കാതെ കോൺഗ്രസ് ഇടപെടൽ; കേരള കോൺഗ്രസിലെ തർക്കത്തിൽ അതൃപ്തിയോ?

മോന്‍സ് ജോസഫ് എംഎല്‍എയോടുള്ള എതിര്‍പ്പ് പ്രകടിപ്പിച്ചാണ് സജി കഴിഞ്ഞ ദിവസം രാജി വെച്ചത്. മോൻസ് ജോസഫിന്റെ ഏകാധിപത്യ നിലപാടിൽ മനംനൊന്താണ് രാജിയെന്നും അദ്ദേഹം വ്യക്തമാക്കിയിരുന്നു. തിരഞ്ഞെടുപ്പ് പ്രചരണത്തിനിടക്ക് സജി മഞ്ഞക്കടമ്പനെ പ്രകോപിപ്പിച്ച് രാജിവെക്കുന്ന സാഹചര്യം സൃഷ്ടിക്കുകയും സജിക്ക് മറുപടി നൽകി രംഗം വഷളാക്കുന്ന സാഹചര്യം സൃഷ്ടിക്കുകയും ചെയ്ത മോൻസ് ജോസഫിന്റെ നടപടി പക്വത ഇല്ലാത്തതാണെന്നുള്ള വിമർശനം
കോൺ​ഗ്രസ് നേതൃത്വം പ്രകടിപ്പിച്ചിട്ടുണ്ട്.

25 വ​ർ​ഷം കേ​ര​ള കോ​ൺ​ഗ്ര​സ്​ എം ​ജി​ല്ല പ്ര​സി​ഡ​ണ്ടായി​രു​ന്ന ഇ ജെ ആഗസ്തി പിന്നീട് ജോസഫ് വിഭാഗത്തോടൊപ്പം ചേരുകയായിരുന്നു. മുൻ യുഡിഎഫ് ജില്ലാ ചെയർമാനും കൂടിയായ ഇദ്ദേഹം ആരോ​ഗ്യ കാരണങ്ങളാൽ സജീവ രാഷ്ട്രീയ പ്രവർത്തനങ്ങളിൽ നിന്നും മാറി നിൽക്കുകയായിരുന്നു. തിരുവഞ്ചൂർ രാധാകൃഷ്ണൻ മുൻകൈ എടുത്താണ് വീണ്ടും ആഗസ്തിയെ മുന്നണിയുടെ സുപ്രധാന പദവി ഇപ്പോൾ ഏൽപ്പിച്ചിരിക്കുന്നത്.

അഡ്വ. പ്രിൻസ് ലൂക്കോസിനെ പകരക്കാരനാക്കണം എന്നതായിരുന്നു മോൻസ് ജോസഫിന്റെ താൽപര്യമെന്നും പി ജെ ജോസഫ് അത് അം​ഗീകരിക്കുകയും ചെയ്തിരുന്നതായാണ് വിവരം. എന്നാൽ തിരഞ്ഞെടുപ്പ് അടുത്തിരിക്കെ ജോസഫ് ​വിഭാഗത്തിന്റെയോ മോൻസ് ജോസഫിന്റെയോ സമ്മർദങ്ങൾ മുഖവിലക്കെടുക്കാതെയുള്ള തീരുമാനമാണ് കോൺഗ്രസിന്റെ ഭാഗത്ത് നിന്നുണ്ടായിരിക്കുന്നത്.

രണ്ടാമത്തെ ചെയർമാൻകൂടി വിട്ടുപോയി എന്ന പേരുദോഷം കേൾപ്പിക്കാൻ താൽപര്യമില്ലാത്തതിനാണ് കോൺ​ഗ്രസിന്റെ ഇടപെടൽ എന്നാണ് ഒരു മുതിർന്ന നേതാവ് പ്രതികരിച്ചത്. സജി മഞ്ഞക്കടമ്പിലിന്റെ രാജിയുടെ അലയൊലികളും കേരള കോൺഗ്രസിലെ തർക്കവും തിരഞ്ഞെടുപ്പിനെ ബാധിക്കുമെന്ന ആശങ്ക യുഡിഎഫ് ഘടക കക്ഷികൾക്കുണ്ട്.