കൊടുങ്ങല്ലൂർ: (KVARTHA) ഹിന്ദുത്വ വർഗീയവാദികൾക്കെതിരായ കേസുകൾ കേരളത്തിൽ ഒതുക്കിത്തീർക്കുന്നതിന്റെ ഉത്തമ ഉദാഹരണമാണ് ആകാശവാണി മുൻ ജീവനക്കാരി കെ ആർ ഇന്ദിരക്കെതിരായ കേസിൽ കൊടുങ്ങല്ലൂർ പോലീസ് സ്വീകരിച്ച നടപടിയെന്ന് ആരോപണം. 2019 സെപ്റ്റംബർ ഒന്നിന് കെ ആർ ഇന്ദിര ഫേസ്ബുക്കിൽ നടത്തിയ അത്യന്തം പ്രകോപനപരവും വംശീയ വിദ്വേഷം ജനിപ്പിക്കുന്നതുമായ കമന്റ് സംബന്ധിച്ച കേസ് പോലീസ് കെട്ടിപ്പൂട്ടി അട്ടിമറിച്ചെന്നാണ് എഴുത്തുകാരൻ മുഹമ്മദലി കിനാലൂരിന്റെ ഫേസ്ബുക്ക് പോസ്റ്റിലൂടെ പുറത്തുവരുന്നത്.

വിവാദ പ്രസ്താവനയും കേസും

താത്തമാർ പന്നി പെറും പോലെ പെറ്റുകൂട്ടുക തന്നെ ചെയ്യും. എങ്ങനെയെങ്കിലും പെരുത്ത് ലോകം പിടിച്ചടക്കേണ്ടതാണല്ലോ. പൈപ്പ് വെള്ളത്തിൽ ഗർഭ നിരോധന മരുന്ന് കലർത്തി വിടുകയോ മറ്റോ വേണ്ടി വരും നിങ്ങളിൽ നിന്ന് ഈ ഭൂമി രക്ഷപ്പെടാൻ' എന്നായിരുന്നു ഇന്ദിരയുടെ വിവാദ പ്രസ്താവന. ഇതിനെതിരെ പിറ്റേന്ന് മനുഷ്യാവകാശ പ്രവർത്തകനായ വിപിൻ‌ദാസ് കൊടുങ്ങല്ലൂർ പോലീസിൽ പരാതി നൽകി. പോലീസ് ഇന്ത്യൻ ശിക്ഷാ നിയമത്തിലെ 153 എ (കലാപം സൃഷ്ടിക്കണമെന്ന ലക്ഷ്യത്തോടെയുള്ള പ്രസ്താവന), കേരള പോലീസ് ആക്ടിലെ 120 ഒ എന്നീ ജാമ്യമില്ലാ വകുപ്പുകൾ പ്രകാരം എഫ് ഐ ആർ രജിസ്റ്റർ ചെയ്തു.

പോലീസിന്റെ നിഷ്ക്രിയത്വം

എന്നാൽ, പ്രതിയെ അറസ്റ്റ് ചെയ്യുകയോ, അവരുടെ ഫോൺ, ലാപ്ടോപ്പ് തുടങ്ങിയ ഇലക്ട്രോണിക് ഉപകരണങ്ങൾ പിടിച്ചെടുത്ത് ഫോറൻസിക് പരിശോധനയ്ക്ക് അയക്കുകയോ, ഫേസ്ബുക്കിൽ നിന്ന് വിവരങ്ങൾ തേടുകയോ ചെയ്യുന്നതിന് പകരം പോലീസ് പരാതിക്കാരനായ വിപിൻദാസിനെ വേട്ടയാടുകയായിരുന്നുവെന്ന് മുഹമ്മദലി കിനാലൂർ ആരോപിക്കുന്നു. വിപിൻദാസിനെ നിരന്തരമായി ഫോണിൽ വിളിച്ച് വിവിധ തീവ്രവാദി സംഘടനകളെക്കുറിച്ച് അന്വേഷിക്കുകയും അദ്ദേഹത്തിന് ആ സംഘടനകളുമായുള്ള ബന്ധത്തെക്കുറിച്ച് ചോദിച്ചുകൊണ്ടിരിക്കുകയും ചെയ്തു. വിദ്വേഷ പരാമർശം നടത്തിയ ഇന്ദിരയെ പിടികൂടാനോ തെളിവുകൾ ശേഖരിക്കാനോ പോലീസ് ശ്രമിച്ചില്ലെന്നും കിനാലൂർ കുറ്റപ്പെടുത്തി.

വിവരാവകാശ അപേക്ഷയും പോലീസിന്റെ മറുപടിയും

പോലീസ് തങ്ങളുടെ ഫോൺകോളുകൾ റെക്കോർഡ് ചെയ്ത് അവർക്ക് തന്നെ അയച്ചുകൊടുക്കുകയും, ഇത് പുറത്തുവന്നാലുണ്ടാകുന്ന ഭവിഷ്യത്ത് ഭയന്നാകണം പിന്നീട് വിപിൻദാസിനെതിരായ നീക്കങ്ങൾ അവസാനിപ്പിക്കുകയും ചെയ്തു. എന്നാൽ വിപിൻ‌ദാസ് കേസ് പിൻവലിക്കാൻ തയ്യാറായില്ല.

കേസിൽ യാതൊരു പുരോഗതിയും കാണാതിരുന്നതിനെ തുടർന്ന് രണ്ടു വർഷത്തിനു ശേഷം വിപിൻ‌ദാസ് വിവരാവകാശ നിയമപ്രകാരം കേസിന്റെ ഇപ്പോഴത്തെ അവസ്ഥയെക്കുറിച്ച് അന്വേഷിച്ച് അപേക്ഷ നൽകി. 2021 ഡിസംബർ രണ്ടിന് കൊടുങ്ങല്ലൂർ പോലീസ് നൽകിയ മറുപടിയിൽ പ്രതിയെ അറസ്റ്റ് ചെയ്തിട്ടില്ലെന്നും, അന്വേഷണം പൂർത്തിയായിട്ടില്ലെന്നും, മൊബൈൽ പിടിച്ചെടുത്തിട്ടില്ലെന്നും, ഫോറൻസിക് പരിശോധനയ്ക്ക് അയച്ചിട്ടില്ലെന്നും, ഫേസ്ബുക്ക് അധികൃതരിൽ നിന്ന് മറുപടി കിട്ടാനുണ്ടെന്നും വ്യക്തമാക്കി.

കേസ് ഒടുവിൽ 'undetected' വിഭാഗത്തിൽ

ഇപ്പോൾ ആറ് വർഷം പിന്നിടുമ്പോഴും കേസിൽ യാതൊരു നടപടിയുമുണ്ടായിട്ടില്ല. കഴിഞ്ഞ ദിവസം സിറാജ് റിപ്പോർട്ടർ സ്റ്റേഷനിൽ ബന്ധപ്പെട്ടപ്പോൾ ലഭിച്ച വിവരം കേസ് 'undetected' വിഭാഗത്തിൽപ്പെടുത്തി അന്വേഷണം അവസാനിപ്പിച്ചു എന്നാണ്. ലഘുലേഖ കണ്ടെത്തിയതിന്റെ പേരിൽ കോഴിക്കോട്ടെ അലൻ ഷുഐബിനെയും താഹാ ഫസലിനെയും ആഴ്ചകളോളം ജയിലിലിട്ട പോലീസ്, വർഗീയ വിദ്വേഷം പരത്തിയ ഒരു വ്യക്തിയുടെ കേസ് ഇത്തരത്തിൽ അവസാനിപ്പിക്കുന്നത് നീതികരിക്കാനാവില്ലെന്ന് കിനാലൂർ ചൂണ്ടിക്കാട്ടി. പ്രതി ഇന്ദിര ഉന്നതകുലജാതയും സംഘപരിവാർ അനുഭാവിയുമായതിനാലാണ് പോലീസ് ഇത്രയും നിഷ്ക്രിയത്വം കാണിക്കുന്നതെന്നും അദ്ദേഹം ആരോപിച്ചു.

തുടർന്നും വിദ്വേഷ പ്രസ്താവനകൾ

ഇന്ദിര ഇപ്പോഴും സമൂഹമാധ്യമങ്ങളിൽ വിദ്വേഷം നിറഞ്ഞ പ്രസ്താവനകൾ തുടരുകയാണെന്നും, ഹിന്ദുക്കൾ ആയുധമെടുക്കാനും ആഞ്ഞുവെട്ടാനും പഠിക്കണമെന്ന അവരുടെ പുതിയ കമന്റ് ഇതിന് ഉദാഹരണമാണെന്നും കിനാലൂർ പറഞ്ഞു.

നിയമനടപടിക്ക് ഒരുങ്ങി പരാതിക്കാരൻ

കൊടുങ്ങല്ലൂർ പോലീസ് കേസ് അവസാനിപ്പിക്കാൻ തീരുമാനിച്ച സാഹചര്യത്തിൽ ഹൈക്കോടതിയിൽ ഹർജി ഫയൽ ചെയ്യാൻ വിപിൻ‌ദാസ് ഒരുങ്ങുകയാണ്. ഇതിനായി ഏതെങ്കിലും അഭിഭാഷകൻ സഹായിക്കുമെങ്കിൽ കേസിൽ മുന്നോട്ട് പോകാൻ അദ്ദേഹം തയ്യാറാണ്. മതസ്പർധ വളർത്താൻ ശ്രമിക്കുന്നവരെ സംരക്ഷിക്കുന്ന പോലീസ് നടപടി അവസാനിപ്പിക്കണമെന്നും, കുറ്റക്കാർക്ക് അർഹമായ ശിക്ഷ നൽകണമെന്നും കിനാലൂർ ആവശ്യപ്പെട്ടു. ചിലരെ കാണുമ്പോൾ കവാത്ത് മറക്കുന്ന പോലീസ് ഉദ്യോഗസ്ഥരെ പിരിച്ചുവിടാൻ ആഭ്യന്തര മന്ത്രി കൂടിയായ പിണറായി വിജയൻ തയ്യാറാകണമെന്നും അദ്ദേഹം കൂട്ടിച്ചേർത്തു.

മുഹമ്മദലി കിനാലൂരിൻ്റെ ഫേസ് ബുക്ക് പോസ്റ്റിൻ്റെ പൂർണരൂപം:

ഹിന്ദുത്വ വർഗീയവാദികൾക്ക് എതിരായ കേസുകൾ കേരളത്തിൽ എങ്ങനെയാണു മാഞ്ഞുപോകുന്നത് എന്നതിന്റെ മികച്ച ഉദാഹരണമാണ് ആകാശവാണി മുൻജീവനക്കാരി കെ ആർ ഇന്ദിരക്കെതിരായ കേസ് കൊടുങ്ങല്ലൂർ പോലീസ് കെട്ടിപ്പൂട്ടി അട്ടത്തിട്ട സംഭവം. 2019 സെപ്റ്റംബർ ഒന്നിനാണ് കെ ആർ ഇന്ദിര അത്യന്തം പ്രകോപനപരവും വംശീയവിദ്വേഷം ജനിപ്പിക്കുന്നതുമായ ഒരു കമെന്റ് ഫേസ്ബുക്കിലിടുന്നത്.

'താത്തമാർ പന്നി പെറും പോലെ പെറ്റുകൂട്ടുക തന്നെ ചെയ്യും. എങ്ങനെയെങ്കിലും പെരുത്ത് ലോകം പിടിച്ചടക്കേണ്ടതാണല്ലോ. പൈപ്പ് വെള്ളത്തിൽ ഗർഭ നിരോധന മരുന്ന് കലർത്തി വിടുകയോ മറ്റോ വേണ്ടി വരും നിങ്ങളിൽ നിന്ന് ഈ ഭൂമി രക്ഷപ്പെടാൻ' എന്നായിരുന്നു ഇന്ദിരയുടെ പ്രസ്താവന. പിറ്റേന്ന് അഥവാ സെപ്റ്റംബർ രണ്ടിന് മനുഷ്യാവകാശ പ്രവർത്തകനായ വിപിൻ‌ദാസ് ഇന്ദിരക്കെതിരെ കേസെടുക്കണം എന്നാവശ്യപ്പെട്ട് കൊടുങ്ങല്ലൂർ പോലീസിൽ പരാതിനൽകി. ഐപിസി 153 എ, കേരള പോലീസ് ആക്ട് 120 ഒ എന്നീ വകുപ്പുകൾ ചേർത്ത് പോലീസ് എഫ് ഐ ആർ ഇട്ടു. ഐപിസി 153 എ കലാപം സൃഷ്ടിക്കണം എന്ന ലക്ഷ്യത്തോടെ നടത്തുന്ന പ്രസ്താവനകളിൽ/ ഇടപെടലുകളിൽ ചുമത്തുന്ന, ജാമ്യമില്ലാത്ത വകുപ്പാണ്.  അനന്തരം നടക്കേണ്ടത് പ്രതിയെ അറസ്റ്റ് ചെയ്യുന്നത് ഉൾപ്പെടെ നടപടികളാണ്. അവരുടെ ഫോൺ, ലാപ്ടോപ്പ് ഉൾപ്പെടെ പിടിച്ചെടുത്ത് ഫോറൻസിക് ലാബിൽ പരിശോധനക്ക് അയക്കുകയും ഫേസ്ബുക്കിൽ നിന്ന് വിവരങ്ങൾ തേടുകയും അതിന്റെ അടിസ്ഥാനത്തിൽ തുടർനടപടികൾ സ്വീകരിക്കുകയുമാണ് പോലീസ് ചെയ്യേണ്ടിയിരുന്നത്. പക്ഷേ പോലീസ് ചെയ്‌തത് അതല്ല.

കഴിഞ്ഞ ദിവസം പരാതിക്കാരനായ വിപിൻദാസുമായി ഞാൻ ഫോണിൽ സംസാരിച്ചിരുന്നു. അദ്ദേഹം പറഞ്ഞതുപ്രകാരം, ആ പരാതി നൽകിയതിന് പിറകെ പോലീസ് അദ്ദേഹത്തെ വേട്ടയാടി എന്നാണ്. നിരന്തരമെന്നോണം അദ്ദേഹത്തെ ഫോണിൽ വിളിച്ച് വിവിധ തീവ്രവാദി സംഘടനകളെ കുറിച്ച് അനേഷിക്കുകയും ആ സംഘടനകളുമായി വിപിൻദാസിനുള്ള ബന്ധത്തെ കുറിച്ച് ചോദിക്കുകയും ചെയ്‌തുകൊണ്ടിരുന്നു. അഥവാ വിദ്വേഷപരാമർശം നടത്തിയ ഇന്ദിരയെ പിടികൂടാനോ അവരുടെ കയ്യിലുള്ള ഇലക്ട്രോണിക് ഉപകരണങ്ങൾ പിടിച്ചെടുക്കാനോ ആയിരുന്നില്ല പോലീസിന്റെയും രഹസ്യാന്വേഷണ വിഭാഗത്തിന്റെയും തിടുക്കം. മറിച്ച് പരാതിക്കാരനെ എങ്ങനെ 'പെടുത്താം' എന്നായിരുന്നു അവരുടെ ആലോചന. അവരുടെ ഫോൺകോളുകൾ റെക്കോർഡ് ചെയ്ത് അവർക്ക് തന്നെ അയച്ചുകൊടുക്കുകയും ആ സംഭാഷണങ്ങൾ പുറത്തുവന്നാലുണ്ടാകുന്ന ഭവിഷ്യത്ത് ഭയന്നാകണം പോലീസ് വിപിൻദാസിനെതിരായ നീക്കങ്ങൾ പോലീസ് അവസാനിപ്പിക്കുകയും ചെയ്‌തു. മറ്റാരെങ്കിലുമായിരുന്നുവെങ്കിൽ കേസും പുകിലും വേണ്ടെന്നു വെച്ച് പരാതി പിൻവലിച്ച് തടി കാത്തേനെ. വിപിൻ‌ദാസ് അങ്ങനെ നിരാശനായില്ല. കേസ് പിൻവലിച്ചതുമില്ല.

പക്ഷേ കേസിൽ അനക്കമൊന്നും കാണാതിരുന്നതിനെ തുടർന്ന് രണ്ടു വർഷത്തിന് ശേഷം കേസിന്റെ സ്റ്റാറ്റസ് അന്വേഷിച്ചുകൊണ്ട് വിവരാവകാശ നിയമപ്രകാരം വിപിൻ‌ദാസ് അപേക്ഷ നൽകി. 2021 ഡിസംബർ രണ്ടിന് കൊടുങ്ങല്ലൂർ പോലീസ് ആ അപേക്ഷയിൽ നൽകിയ മറുപടി ഇങ്ങനെ:

-പ്രതിയെ അറസ്റ്റ് ചെയ്തിട്ടില്ല

-അന്വേഷണം പൂർത്തിയായിട്ടില്ല

-മൊബൈൽ പിടിച്ചെടുത്തിട്ടില്ല

-ഫോറൻസിക് പരിശോധനക്ക് അയച്ചിട്ടില്ല

-ഫേസ്ബുക് അധികൃതരിൽ നിന്ന് മറുപടി കിട്ടാനുണ്ട്.

ഇപ്പോൾ വർഷം ആറായി. കഴിഞ്ഞ ദിവസം സിറാജ് റിപോർട്ടർ സ്റ്റേഷനിൽ ബന്ധപ്പെട്ടപ്പോൾ കിട്ടിയ വിവരം കേസ്  undetected വിഭാഗത്തിൽ പെടുത്തി അന്വേഷണം അവസാനിപ്പിച്ചു എന്നാണ്. നോക്കണേ, ജാമ്യമില്ലാ വകുപ്പ് ചുമത്തി രജിസ്റ്റർ ചെയ്ത ഒരു കേസിന്റെ ഗതിയാണിത്. ലഘുലേഖ കണ്ടെത്തിയതിന്റെ പേരിൽ കോഴിക്കോട്ടെ രണ്ട് ചെറുപ്പക്കാരെ ആഴ്ചകളോളം ജയിലിലിട്ട പോലീസിന്റെ നാടാണ് കേരളം. ചായ കുടിക്കാൻ പോയതിനല്ലല്ലോ അറസ്റ്റ് ചെയ്തത് എന്ന് ആഭ്യന്തരമന്ത്രി പോലീസ് നടപടിക്ക് ന്യായം പറഞ്ഞതും മറക്കരുത്. അവരുടെ പേര് അലൻ ശുഐബ്‌  എന്നും താഹാ ഫസൽ എന്നുമായിരുന്നു. ഇവിടെ പ്രതിയുടെ പേര് ഇന്ദിര എന്നാണ്, ഉന്നതകുല ജാതയാണ്, സംഘിയാണ്, കടുത്ത മുസ്ലിം വിരോധിയാണ്. അതുകൊണ്ട് അറസ്റ്റില്ല, അന്വേഷണമില്ല, ഫോൺ പരിശോധയില്ല, ഒടുക്കം കേസ് തന്നെ ഇല്ല. അതുകൊണ്ട് എന്തുണ്ടായി? ഇന്ദിരക്ക് ആരെയും പേടിക്കാതെ തുടർന്നും വെറുപ്പ് ഛർദിക്കാം എന്ന നിലവന്നു. ഇക്കഴിഞ്ഞ ദിവസം പോലും ആ സ്ത്രീ അത് ചെയ്‌തു. ഹിന്ദുക്കൾ ആയുധമെടുക്കാനും ആഞ്ഞുവെട്ടാനും പഠിക്കണം എന്നാണ് അവരുടെ പുതിയ കമന്റ്. ആരെ ലക്ഷ്യമിട്ടാണ് ആഞ്ഞുവെട്ടേണ്ടത് എന്ന് പ്രത്യേകം പറയേണ്ടല്ലോ.

കൊടുങ്ങല്ലൂർ പോലീസ് കേസ് അവസാനിപ്പിക്കാൻ തീരുമാനിച്ച സ്ഥിതിക്ക് ഹൈക്കോടതിയിൽ ഹരജി ഫയൽ ചെയ്യാൻ ഉദ്ദേശിക്കുന്നുണ്ട് വിപിൻ‌ദാസ്. ഏതെങ്കിലും അഭിഭാഷകൻ സഹായിക്കുമെങ്കിൽ അദ്ദേഹം കേസുമായി മുന്നോട്ടുപോകാൻ തയ്യാറാണ്. മതസ്പർധ വളർത്താൻ ശ്രമിക്കുന്നവരെ ഈവിധം സംരക്ഷിക്കുന്ന ഏർപ്പാട് പോലീസും ആഭ്യന്തരവകുപ്പും അവസാനിപ്പിക്കണം. അവർക്ക് അർഹിക്കുന്ന ശിക്ഷ വാങ്ങിക്കൊടുക്കണം. ഹിന്ദുത്വരെ കാണുമ്പോൾ കവാത്ത് മറക്കുന്ന, അവരെ എങ്ങനെ കേസിൽ നിന്ന് രക്ഷപ്പെടുത്താം എന്നാലോചിക്കുന്ന പോലീസ് ഉദ്യോഗസ്ഥരുണ്ടെങ്കിൽ അവരെ ചെവിക്ക് പിടിച്ച് പുറത്തിടാൻ ആഭ്യന്തര മന്ത്രി കൂടിയായ പിണറായി വിജയന് കഴിയേണ്ടതാണ്. പാർട്ടിയിലെ വിവേകശാലികൾ അദ്ദേഹത്തെ അക്കാര്യം ഉണർത്തേണ്ടതാണ്. മുഖ്യമന്ത്രിയുടെ മാസ്സ് ഡയലോഗ് കേട്ട് പേടിച്ച് ഒരു പോലീസുകാരനും നന്നായ ചരിത്രമില്ല.

-മുഹമ്മദലി കിനാലൂർ

ഈ വാർത്ത ഷെയർ ചെയ്യൂ! നിങ്ങളുടെ അഭിപ്രായങ്ങളും താഴെ കമന്റ് ചെയ്യൂ! 

Article Summary: Allegations arise that Kodungallur police sabotaged a hate speech case against K.R. Indira, a former Akashvani employee, by not arresting her and instead harassing the complainant. The case, registered in 2019 for inflammatory comments, was allegedly closed as 'undetected' after years of inaction. 

#HateSpeechCase, #KeralaPolice, #Kodungallur, #KRIIndira, #MuhammedaliKinaloor, #HumanRights