മദ്യപാനം ചോദ്യം ചെയ്ത വീട്ടമ്മയെ ഒമ്പതംഗ സംഘം വീട്ടില്‍ നിന്നും നഗ്നയാക്കി ആക്രമിച്ചു

ശാസ്താംകോട്ട: വീട്ടിനു മുന്നില്‍ വെച്ച് മദ്യപിക്കുന്നത് ചോദ്യം ചെയ്ത വീട്ടമ്മയെ ഒമ്പതംഗസംഘം നഗ്നയാക്കി പുറത്തേക്ക് വലിച്ചിഴച്ചുകൊണ്ടുപോയി ആക്രമിച്ചു. കൊല്ലം ശാസ്താംകോട്ടയിലാണ് സംഭവം.

കുന്നത്തൂര്‍ പൂതക്കുഴി സ്വദേശിനിയായ നാല്‍പ്പത്തിരണ്ടുകാരിയെയാണു ബൈക്കിലെത്തി  മദ്യപിക്കുകയായിരുന്ന സംഘം വീട്ടിനുള്ളില്‍ അതിക്രമിച്ചുകയറി വിവസ്ത്രയാക്കിയശേഷം ആക്രമിച്ചത്.

വീട്ടിനുവെളിയില്‍  വെച്ച് സ്ഥിരമായി മദ്യപിക്കുന്നതിനെ ചോദ്യം ചെയ്തതാണ് യുവാക്കളെ പ്രകോപിതരാക്കിയത്. വീട്ടമ്മയെ വിവസ്ത്രയാക്കി വലിച്ചു കൊണ്ടുപോകുന്നതുകണ്ട് തടയാന്‍ ചെന്ന ഇവരുടെ പതിനാലും പതിമൂന്നും വയസുള്ള ആണ്‍മക്കളേയും അക്രമി സംഘം ക്രൂരമായി മര്‍ദിച്ചു. ശരീരമാസകലം ഗുരുതരമായി  പരിക്കേറ്റ വീട്ടമ്മയെയും മക്കളെയും താലൂക്ക് ആശുപത്രിയില്‍ പ്രവേശിപ്പിച്ചു. ഇവര്‍ മാനസികമായി തകര്‍ന്ന നിലയിലാണ്.

പരിസരവാസികളായ സ്ത്രീകള്‍ വീട്ടമ്മയ്ക്ക് നേരെയുള്ള അക്രമണം തടയാന്‍ ശ്രമിച്ചെങ്കിലും സംഘം ഇവരെയും ഭീഷണിപ്പെടുത്തി.  വീട്ടമ്മയുടെ പരാതിയില്‍ പ്രദേശവാസികളായ മൂത്തേടത്ത് കുട്ടായി, കുറ്റിയില്‍ മുകളില്‍ വാവച്ചന്‍, ഷിബിന്‍, വിളയില്‍ശേരില്‍ ഹരീഷ്, അജി, പാണമ്പുറം കോളനി നിവാസികളായ സുബന്‍, രഞ്ജിത്, ബിനു എന്നിവര്‍ക്കെതിരെ പോലീസ് കേസെടുത്തു.

ഇവര്‍ ഒളിവിലാണ്. വീട്ടമ്മയ്ക്കു നേരെ അക്രമം നടക്കുന്ന സമയം  ഭര്‍ത്താവ് വീട്ടിലുണ്ടായിരുന്നില്ല. കുട്ടികളുടെ കണ്ണട അക്രമികള്‍ ഊരിയെടുത്ത് നിലത്തെറിഞ്ഞു പൊട്ടിച്ചു.
മുഖ്യമന്ത്രിക്ക് നേരെ അക്രമം: കോണ്‍ഗ്രസ് പ്രവര്‍ത്തകര്‍ പ്രതിഷേധ പ്രകടനം നടത്തി