യു.ഡി.എഫ്. സര്‍ക്കാരിനെ താഴെയിറക്കാന്‍ എല്‍.ഡി.എഫ്. തീരുമാനിച്ചു

തിരുവനന്തപുരം: യു.ഡി.എഫ്. സര്‍ക്കാരിനെ താഴെയിറക്കാനുള്ള സാധ്യതകള്‍ ഉപയോഗിക്കാന്‍ എല്‍.ഡി.എഫ്. യോഗത്തില്‍ ധാരണയായി. പ്രക്ഷോഭങ്ങള്‍ക്കൊപ്പം മറ്റു വഴികളും ഇക്കാര്യത്തില്‍ ആരായും. സി.പി.ഐയാണ് ഇത്തരത്തിലൊരു നിര്‍ദേശം മുന്നോട്ട് വെച്ചത്. ഇത് ഘടക കക്ഷികള്‍ അംഗീകരിക്കുകയും ചെയ്തു. സര്‍ക്കാരിന്റെ ജനദ്രോഹ നയങ്ങള്‍ക്കെതിരെ മാര്‍ച്ച് 25 ന് സംസ്ഥാന വ്യാപക പ്രതിഷേധം സംഘടിപ്പിക്കും. സര്‍ക്കാരിനെതിരെ നടത്തുന്ന സമരങ്ങള്‍ കൂടുതല്‍ ശക്തമാക്കും.

സൂര്യനെല്ലി പെണ്‍കുട്ടിയുടെ പുതിയ വെളിപ്പെടുത്തലുകളുടെ അടിസ്ഥാനത്തില്‍ പി.ജെ. കുര്യന്‍ രാജ്യസഭാ ഉപാധ്യക്ഷന്‍ സ്ഥാനം രാജിവെണമെന്നും യോഗം ആവശ്യപ്പെട്ടു. സര്‍ക്കാരിനെതിരെ കുതിരക്കച്ചവടം നടത്തി താഴെയിറക്കാനില്ലെന്നായിരുന്നു നിയമസഭാ തിരഞ്ഞെടുപ്പിന് ശേഷം ഇടതുമുന്നണി നേതാക്കള്‍ പറഞ്ഞത്. ടി.പി. ചന്ദ്രശേഖരന്‍ വധക്കേസ്, എം.എം. മണിക്കെതിരായ കേസ്, സൂര്യനെല്ലി പെണ്‍കുട്ടിയുടെ പുതിയ വെളപ്പെടുത്തലുകള്‍ എന്നിവയാണ് ഇടതുമുന്നണിയുടെ നിലപാട് മാറ്റത്തിന് പിന്നിലെന്നാണ് സൂചന. സര്‍ക്കാരിനെതിരെ ശക്തമായി ആഞ്ഞടിക്കാന്‍ ഇടതുമുന്നണി തീരുമാനിച്ചതോടെ വരും ദിവസങ്ങളില്‍ കേരളത്തിലെ രാഷ്ട്രീയത്തില്‍ സംഭവബഹുലമായ മാറ്റങ്ങള്‍ അരങ്ങേറുമെന്നുറപ്പായി.