സുര്യനെല്ലിക്കേസിലെ മുഖ്യപ്രതി ധര്‍മ്മരാജന്‍ വിദേശത്തെന്ന് സൂച­ന

കോട്ടയം: സുര്യനെല്ലിക്കേസിലെ മുഖ്യപ്രതിയും അഭിഭാഷകനുമായ ധര്‍മ്മരാജന്‍ വ്യാജ പാസ്‌പോര്‍ട്ടില്‍ വിദേശത്തുകടന്നതായി അന്വേഷണ സംഘത്തിന് സൂചന ലഭിച്ചു. സ്വന്തം നാടായ പൊന്‍കുന്നത്ത് ബന്ധുക്കള്‍ ഇല്ലാത്തതിനാല്‍ കുറച്ചുനാള്‍ കര്‍ണാടകയിലും മറ്റും കറങ്ങിയ ശേഷം വ്യാജ പാസ്‌പോര്‍ട്ടില്‍ വിദേശത്തുകടന്നെന്നാണ് വിവ­രം.

സൂര്യനെല്ലിക്കേസില്‍ പ്രതിയായതോടെ ഇയാളുമായുള്ള വിവാഹ ബന്ധം ഭാര്യ ഉപേക്ഷിച്ചിരുന്നു. ഉറ്റബന്ധുക്കളും സഹായിക്കാനില്ലാത്ത സാഹചര്യത്തിലാണ് നാടുവിട്ടതെന്നും ധര്‍മ്മരാജന്‍ ഇനി നാട്ടിലേയ്ക്ക് തിരികെയെത്താനുള്ള സാധ്യത ഇല്ലെന്നുമാണ് അന്വേഷണ ഉദ്യോഗസ്ഥന്മാര്‍ നല്‍കുന്ന സൂ­ചന.

ഹൈക്കോടതി ശിക്ഷിച്ചതിനുശേഷം പരോളില്‍ കഴിയവേ ഇയാള്‍ മുങ്ങുകയായിരുന്നു. പരോളിലിറങ്ങി മുങ്ങിയ ധര്‍മ്മരാജനുവേണ്ടി എതാണ്ട് അന്വേഷണം അവസാനിപ്പിച്ച ഘട്ടത്തിലാണ് സുപ്രീംകോടതി വിധിയിലൂടെ വീണ്ടും സൂര്യനെല്ലിക്കേസ് സജീവമായിത്തീര്‍ന്നത്.