മട്ടുപ്പാവ് കൃഷിയില്‍ യുവാവിന് പുരസ്‌കാരം: അവാര്‍ഡ് ലഭിച്ചത് സംസ്ഥാന കൃഷിവകുപ്പിന്റെ ജൈവ പച്ചക്കറി കൃഷിക്ക്

പയ്യന്നൂര്‍: (www.kvartha.com 05.12.2019) മട്ടുപ്പാവില്‍ ജൈവ പച്ചക്കറി കൃഷിചെയ്ത് സംസ്ഥാന കൃഷിവകുപ്പിന്റെ പുരസ്‌കാരം കാറമേല്‍ പുതിയങ്കാവ് സ്വദേശി എ വി ധനഞ്ജയന് ലഭിച്ചു. ആയിരം ചതുരശ്ര അടിയിയില്‍ ഗ്രോ ബാഗുകളിലാണ് കൃഷിയൊരുക്കിയിരിക്കുന്നത്. എല്ലാവിധ പച്ചക്കറികളും യുവാവ് കൃഷി ചെയ്യുന്നു. നാടന്‍ പയര്‍ മുതല്‍ വിദേശ ഫലങ്ങളായ പീനട്ട്, നോമ്പി, ഡ്രാഗണ്‍ ഫ്രൂട്ട് വരെയുണ്ട്. ചീര, ചേമ്പ്, പ്രഷര്‍ ചീര, പൊന്നാരി വീരന്‍, ബസളി ചീര തുടങ്ങി പത്തോളം ഇലച്ചെടികളും ചങ്ങളം പിരണ്ട, കസ്തൂരിമഞ്ഞള്‍, പനികൂര്‍ക്ക തുടങ്ങി പതിനഞ്ചോളം ഔഷധച്ചെടികളും വളര്‍ത്തുന്നു. കോളി ഫ്‌ളവര്‍, കാബേജ്, വെണ്ട, വെള്ളരി, പാവയ്ക്ക, പപ്പായ തുടങ്ങിയ പച്ചക്കറികളും തോട്ടത്തിലുണ്ട്.


കേരളത്തിനകത്തും പുറത്തും വിദേശത്തുമുള്ളവരെ ഉള്‍പ്പെടുത്തി തുടങ്ങിയ കൃഷിത്തോട്ടം ഗ്രൂപ്പ് എന്ന ഫെയ്‌സ് ബുക്ക് കൂട്ടായ്മയിലൂടെയാണ് ജൈവ പച്ചക്കറി കൃഷി രംഗത്തേക്ക് ധനഞ്ജയന്‍ എത്തിയത്. കൂട്ടായ്മയോടൊപ്പം ജില്ലയില്‍ തുടങ്ങിയ വിത്ത് ബാങ്കിന്റെ ചുമതലയും ഇദ്ദേഹത്തിനാണ്.