പഞ്ചായത്ത് പ്രസിഡന്റിന്റെ നഷ്ടപ്പെട്ട പണം കണ്ടെത്താന്‍ തൂപ്പുകാരിയുടെ വസ്ത്രമഴിച്ച് പരിശോധിച്ചു

പാലോട് : കാണാതായ പഞ്ചായത്ത് പ്രസിഡന്റിന്റെ പണമടങ്ങിയ ഡയറി കണ്ടെത്താനായി  വാര്‍ഡ് അംഗം പാര്‍ട്ട് ടൈം തൂപ്പുകാരിയുടെ വസ്ത്രമഴിച്ച് പരിശോധിച്ചു. ബുധനാഴ്ച രാവിലെയാണ് സംഭവം. പഞ്ചായത്ത് പ്രസിഡന്റിന്റെ  11,650 രൂപ ഓഫീസില്‍ വെച്ച് കാണാതാവുകയായിരുന്നു.

ഇതേതുടര്‍ന്ന് പോലീസില്‍ വിവരമറിയിച്ചതിനെ തുടര്‍ന്ന് പോലീസ് സ്ഥലത്തെത്തി ആരെയും ചോദ്യം ചെയ്യുകയോ പരിശോധിക്കുകയോ ചെയ്തിരുന്നില്ല.

ഒടുവില്‍ പോലീസ് മടങ്ങിപ്പോയതിനു ശേഷം ഒരു വനിതാ വാര്‍ഡ് അംഗമെത്തി ഓഫീസ് പാര്‍ട്ട് ടൈം സ്വീപ്പറെ സ്‌റ്റെയര്‍കെയ്‌സിനടിയില്‍ കൊണ്ടുപോയി ദേഹപരിശോധന നടത്തി അപമാനിക്കുകയായിരുന്നു.  എന്നാല്‍, ഇവരില്‍ നിന്നും നഷ്ടപ്പെട്ട തുക കണ്ടെത്താനായില്ല.

കഴിഞ്ഞ 20 വര്‍ഷമായി പഞ്ചായത്ത് ഓഫീസില്‍ സ്വീപ്പര്‍ ജോലി ചെയ്തുവരുന്ന ഡാളി എന്ന സ്ത്രീയെയാണ് വസ്ത്രമഴിച്ച് അപമാനിച്ചത്. ഇവര്‍ മൂന്നു വര്‍ഷം മുന്‍പാണ് സ്ഥിരപ്പെട്ടത്.

 കാണാതായ പണം കണ്ടെത്താനായി ഓഫീസ് മുഴുവനും  പരിശോധിച്ചിട്ടും പണം കണ്ടെത്താനാകാത്തതിനാല്‍ ഉച്ചയോടെ ജോലികഴിഞ്ഞ് പോകാനിറങ്ങിയ ഡാളിയുടെ ബാഗ് ഒരു മുന്‍ വാര്‍ഡ് അംഗം പിടിച്ചുവാങ്ങി പരിശോധിക്കുകയും തുടര്‍ന്ന് സ്‌റ്റെയര്‍കേസിനടിയില്‍ കൊണ്ടുപോയി ശരീര പരിശോധന നടത്തുകയുമായിരുന്നു.


അതേസമയം പഞ്ചായത്ത് ഓഫീസുമായി ഇപ്പോള്‍ യാതൊരു
ബന്ധവുമില്ലാത്ത ആള്‍ ജീവനക്കാര്‍ക്കും പൊതുജനങ്ങള്‍ക്കും മുന്നില്‍ വെച്ച് ബാഗ് പിടിച്ചെടുത്ത് പരിശോധിച്ചതിനും ദേഹപരിശോധന നടത്തിയതിനും എതിരെ  പരാതി നല്‍കാന്‍ ഒരുങ്ങുകയാണ് ഡാളി.

രണ്ട് മാസം മുന്‍പും ഓഫീസിലെ ഒരു വനിതാ ക്ലാര്‍ക്കിന്റെ 6,000 രൂപ നഷ്ടപ്പെട്ടിരുന്നു. എന്നാല്‍ ഇവര്‍ പരാതി നല്‍കിയിരുന്നില്ല.
വിലക്കയറ്റം: സിപിഎം സമരം