ബാംഗലൂരു കേന്ദ്രമാക്കി ഓണ്‍ലൈന്‍ പെണ്‍വാണിഭം; പത്തനംത്തിട്ട യുവതിയെ പോലീസ് തിരയുന്നു

കൊച്ചി: വിദേശ യുവതികളെ ഉപയോഗിച്ച് ഓണ്‍ലൈന്‍ പെണ്‍വാണിഭം നടത്തുന്നതായി അന്വേഷണ സംഘത്തിന് വിവരം ലഭിച്ചു.  കൊച്ചിന്‍ എസ്‌കോര്‍ട്‌സ് ഉടമ പത്തനംതിട്ട സ്വദേശിനിയായ ഒരു യുവതിയാണ് പെണ്‍വാണിഭത്തിനു പിന്നിലെന്നും അന്വേഷണ സംഘത്തിന് വിവരം ലഭിച്ചിട്ടുണ്ട്. ബംഗ്ലാദേശില്‍ നിന്നും നേപ്പാളില്‍ നിന്നുമാണ് പ്രധാനമായും പെണ്‍വാണിഭത്തിന് യുവതികളെ എത്തിക്കുന്നത്.

വന്‍കിട ഹോട്ടലുകളിലേയ്ക്കും വിദേശ യുവതികളെ എസ്‌കോട്ടായി എത്തിച്ചുകൊടുക്കുന്നുണ്ട്. ബംഗലൂരു കേന്ദ്രമാക്കിയാണ്  സൈറ്റിന്റെ പ്രവര്‍ത്തനം. പെണ്‍കുട്ടികളെ ആവശ്യമുണ്ടെങ്കില്‍ മുന്‍കൂട്ടി അറിയിക്കുന്നതിനായി ഫോണ്‍ നമ്പറും ഓണ്‍ലൈനിലൂടെ നല്‍കാറുണ്ട്.

നേരത്തെ കൊച്ചിയില്‍ പെണ്‍വാണിഭം തകൃതിയായി നടന്നിരുന്നു. ഒടുവില്‍ നാട്ടുകാര്‍ പരാതിയുമായി രംഗത്തുവന്നതോടെ സൈബര്‍സെല്ലിന്റെ സഹായത്തോടെ നടത്തിപ്പുകാരെ പോലീസ് അറസ്റ്റ് ചെയ്യുകയായിരുന്നു. എന്നാല്‍ ഇപ്പോള്‍ ഇതേ സംഘം ബാംഗലൂരു കേന്ദ്രീകരിച്ച് പെണ്‍വാണിഭം നടക്കുന്നതായാണ്  വിവരം ലഭിച്ചിരിക്കുന്നത്.

ബംഗ്ലാദേശി യുവതിയെ പീഡിപ്പിച്ചശേഷം പെണ്‍വാണിഭ സംഘത്തിന് വില്‍പന നടത്തിയ കേസില്‍ അറസ്റ്റിലായ തൃശൂര്‍ ഫാത്ത്വിമ മാതാ പള്ളിക്ക് സമീപം താമസിക്കുന്ന അഖില്‍ പി വിജയനില്‍ നിന്നുമാണ് പോലീസിന് പുതിയ വിവരങ്ങള്‍ ലഭിച്ചത്. വിവരത്തിന്റെ അടിസ്ഥാനത്തില്‍ പോലീസ് അന്വേഷണം അതീവ രഹസ്യമായി പുരോഗമിക്കുകയാണ്.

കിഴക്കേ കൊടുങ്ങല്ലൂര്‍ ചാറ്റുകുളം ക്ഷേത്രത്തിനു സമീപം വാടകയ്ക്ക് വീടെടുത്ത് ബംഗ്ലാദേശി യുവതിയെ തടങ്കലിലാക്കി പെണ്‍വാണിഭം നടത്തിവരുന്നതിനിടെ കഴിഞ്ഞ ജനുവരിയിലാണ് അഖില്‍ പി.വിജയന്‍ അറസ്റ്റിലായത്.

കമിതാക്കളായ കാഞ്ഞിരപ്പള്ളി സ്വദേശി ഷെറിന്‍ മാത്യു, തിരുവനന്തപുരം സ്വദേശിനി രജനി എന്നിവരെ പോലീസ് സംഭവ സ്ഥലത്തുനിന്നും അറസ്റ്റ് ചെയ്തിരുന്നു. പെണ്‍വാണിഭ സംഘത്തില്‍പെട്ട മറ്റ് 12 പേരെയും  അന്വേഷണത്തിലൂടെ പിടികൂടിയിരുന്നു.

തീപ്പെട്ടി കമ്പനിയില്‍ ജോലി വാഗ്ദാനം ചെയ്ത് ബന്ധുക്കളാണ് ബംഗ്ലാദേശി യുവതിയെ കൊല്‍ക്കത്തയില്‍ എത്തിച്ചത്. അവിടെ നിന്നും ബാറിലെ ഡാന്‍സ് ട്രൂപ്പില്‍ എത്തുകയും പിന്നീട് ബന്ധുക്കള്‍ പെണ്‍കുട്ടിയെ ആലുവ സ്റ്റേഷനില്‍ വെച്ച് അഖിലിന് കൈമാറുകയായിരുന്നു.

യുവതിയെ കൈയ്യില്‍ കിട്ടിയ അഖില്‍ അങ്കമാലിയിലെ ഹോട്ടലില്‍ വെച്ച് പീഡിപ്പിച്ചശേഷം 30,000 രൂപയ്ക്ക് ഷെറീന് കൈമാറുകയായിരുന്നു. യുവതിയെ പെണ്‍വാണിഭ സംഘത്തിനു വിറ്റ സംഭവത്തെ തുടര്‍ന്ന് ഒളിവില്‍ പോയ അഖിലിനെ രഹസ്യ വിവരം ലഭിച്ചതിനെ തുടര്‍ന്ന് എറണാകുളത്തുവെച്ച് പോലീസ് അറസ്റ്റ് ചെയ്യുകയായിരുന്നു.
ആര്‍എസ്എസിന്റെ അക്രമം അവസാനിപ്പിക്കുക: ഡി.വൈ.എഫ്.ഐ