Renjith Israel | ദുരന്തഭൂമിയിലെ രക്ഷകൻ! ആരാണ് രഞ്ജിത്ത് ഇസ്രായേൽ? ഷിരൂർ മണ്ണിടിച്ചിലിൽ ഉറ്റുനോക്കുന്നത് ഈ മലയാളിയെ 

ഷിരൂർ: (KVARTHA) ഉത്തരകന്നഡ ജില്ലയിലെ ഷിരൂരിൽ ഉണ്ടായ മണ്ണിടിച്ചിലിൽ കുടുങ്ങിയ മലയാളി ഡ്രൈവർ അർജുനെ രക്ഷിക്കാനുള്ള ദൗത്യത്തിൽ പ്രതീക്ഷയുടെ പ്രതീകമായി മാറിയിരിക്കുകയാണ് രഞ്ജിത്ത് ഇസ്രായേൽ. ദുരന്തങ്ങളിൽ ജീവൻ രക്ഷിക്കാനായി ഓടിയെത്തുന്ന ഈ 'ദുരന്ത ഭൂമിയിലെ രക്ഷകൻ', തന്റെ അസാധാരണമായ ധൈര്യവും സേവനബോധവും കൊണ്ട് എല്ലാവരെയും വിസ്മയിപ്പിക്കുകയാണ്.

രക്ഷാപ്രവർത്തനത്തിന്റെ നേതൃത്വം ഏറ്റെടുത്ത രഞ്ജിത്തിന്റെ കരുതലും തന്ത്രവും ഈ ദുഷ്കരമായ സാഹചര്യത്തിൽ പ്രതീക്ഷയുടെ കിരണങ്ങൾ നൽകുന്നു. തിരയൽ ദൗത്യം ഊർജ്ജിതമാക്കുകയും, സഹായ സംഘങ്ങളെ ഏകോപിപ്പിക്കുകയും ചെയ്യുന്നതിൽ അദ്ദേഹം മുൻകൈയെടുക്കുന്നു.

ആരാണ് രഞ്ജിത്ത് ഇസ്രായേൽ? 

രാജ്യത്തിന്റെ വിവിധ കോണുകളിൽ പ്രകൃതി ദുരന്തങ്ങളുണ്ടാകുമ്പോൾ, ആപത്ഘട്ടത്തിൽ ജീവൻ രക്ഷിക്കാനായി ഓടിയെത്തുന്ന മലയാളി, അതാണ് രഞ്ജിത്ത് ഇസ്രായേൽ. 'ഈ സൂപ്പർ മാൻ' സാധാരണക്കാരനാണ്. പക്ഷേ, ദുരന്തങ്ങളിൽപ്പെട്ട് ജീവൻ അപകടത്തിലാകുമ്പോൾ രക്ഷാപ്രവർത്തനത്തിനായി ഓടിയെത്തുന്ന അസാധാരണമായ മനസ്സുള്ള വ്യക്തിയാണ്.

സൈന്യത്തിൽ ചേരാൻ ആഗ്രഹിച്ച രഞ്ജിത്ത്, പ്രായപരിധി കാരണം അവസരം നഷ്ടപ്പെട്ടു. സൈനിക സ്വപ്‌നങ്ങള്‍ തകര്‍ത്തത് 21-ാം വയസില്‍ തലച്ചോറിനെ ബാധിച്ച ഗുരുതര രോഗമായിരുന്നു. പിന്നീട് അസുഖം ഭേദമായപ്പോഴും പ്രായം അതിക്രമിച്ചു. പക്ഷേ, സേവനമെന്ന ആഗ്രഹം അദ്ദേഹത്തിന്റെ ഹൃദയത്തിൽ ബാക്കിയായി. അങ്ങനെയാണ് ദുരന്തങ്ങളിൽ ജീവൻ രക്ഷിക്കാനുള്ള പരിശീലനം നേടി രഞ്ജിത്ത് രംഗത്തെത്തുന്നത്. 

ഉത്തരാഖണ്ഡിലെ മേഘവിസ്ഫോടനം, കേരളത്തിലെ പ്രളയം, കവളപ്പാറയിലെയും ഇടുക്കിയിലെയും ഉരുൾപൊട്ടൽ, തപോവൻ തുരങ്ക ദുരന്തം  ഇങ്ങനെ അനവധി ദുരന്തങ്ങളിൽ രക്ഷാപ്രവർത്തനത്തിൽ പങ്കെടുത്ത രഞ്ജിത്ത് ഇസ്രായേൽ ഏവരുടെയും മനസ്സിൽ അഭിമാനം നിറയ്ക്കുന്ന മലയാളിയാണ്. 
പ്രതിഫലം പ്രതീക്ഷിക്കാതെ, സ്വന്തം ജീവൻ പണയംവെച്ച് ദുരിതത്തിലുള്ളവരെ കൈത്താങ്ങുന്ന ഈ മലയാളിയുടെ കഥ കേൾക്കുമ്പോൾ നമ്മുടെ മനസിൽ അഭിമാനത്തിന്റെ പൂക്കൾ വിടരും. 

സ്വകാര്യ ജീവിതം 

33 വയസുള്ള രഞ്ജിത്ത് ഇസ്രായേൽ, തിരുവനന്തപുരം സ്വദേശിയാണ്. വിതുര ഗോകിൽ എസ്‌റ്റേറ്റിൽ ജോർജ് ജോസഫ്-ഐവ ജോർജ് ദമ്പതികളുടെ മകനാണ് അദ്ദേഹം.  ചെറുപ്പത്തിൽ തന്നെ കായിക മേഖലയിൽ താല്പര്യം കാണിച്ച രഞ്ജിത്ത് മൂന്നു തവണ ജൂനിയർ മിസ്റ്റർ തിരുവനന്തപുരം പദവി നേടിയിട്ടുണ്ട്. ഗോവ നാഷണൽ ഇൻസ്റ്റിറ്റ്യൂട്ടിൽ നിന്ന് ജീവൻ രക്ഷാ സാങ്കേതിക വിദ്യകളിൽ പരിശീലനം നേടിയിട്ടുണ്ട്. മികവാര്‍ന്ന സേവനത്തിന് അധികൃതർ നൽകിയിട്ടുള്ള അനുമോദന സര്‍ട്ടിഫിക്കറ്റുകള്‍ മാത്രമാണ് ജീവിതത്തിലെ സമ്പാദ്യം.