പ്രമുഖ യുവനടി മരിച്ചതായി വാട്‌സ് ആപില്‍ വ്യാജ പ്രചരണം

കോഴിക്കോട്: പ്രമുഖ യുവനടി മരിച്ചതായി ഒരു പ്രമുഖ ചാനലിന്റെ ലോഗോ ഉപയോഗിച്ച് വ്യാജ പ്രചരണം. അടുത്തിടെ വിവാഹം നിശ്ചയിക്കപ്പെട്ട യുവനടി മരിച്ചതായാണ് ചിലര്‍ വ്യാപകമായി വാട്‌സ് ആപില്‍ പ്രചരിപ്പിച്ചിരിക്കുന്നത്. വട്ടപ്പൊയിലിലെ ബൂത്തില്‍ മരിച്ചനിലയില്‍ നടിയെ കണ്ടെത്തിയെന്നാണ് ഇമേജ് തയ്യാറാക്കി വാര്‍ത്ത ഷെയര്‍ചെയ്തത്.

ചാനലിന്റെ ലോഗോയും ഫേസ് ബുക്ക് ലിങ്കും ചാനലിന്റെ ലോഗ് ഓണ്‍ അഡ്രസും ഇമേജില്‍ നല്‍കിയിട്ടുണ്ട്. നിരവധിപേര്‍ ഈ ഇമേജ് പരസ്പരം സുഹൃത്തുക്കള്‍ക്കും ഗ്രൂപ്പുകളിലേക്കും ഷെയര്‍ ചെയ്യുന്നുണ്ട്. കഴിഞ്ഞ ദിവസം കാസര്‍കോട്ടെ ഒരു പ്രമുഖ ലീഗ് നേതാവ് മരിച്ചതായും ഫേസ് ബുക്കിലും വാട്‌സ് ആപിലും ഇത്തരത്തില്‍ വ്യാജ പ്രചരണം അഴിച്ചുവിട്ടിരുന്നു. ഇതുസംബന്ധിച്ച് പോലീസ് അന്വേഷണം നടത്തിയെങ്കിലും എവിടെയും എത്തിയിരുന്നില്ല. ഇതിനിടയിലാണ് പ്രമുഖ നടി മരിച്ചതായുള്ള പ്രചരണവും ഉണ്ടായിരിക്കുന്നത്.

ഇതിന് മുമ്പും ഇതേ ചാനലിന്റെ ലോഗോ ഉപയോഗിച്ച് ചിലര്‍ വ്യാചപ്രചരണം നടത്തിയിരുന്നു. സംഭവത്തില്‍ കുറ്റക്കാര്‍ക്കെതിരെ നല്‍കിയ പരാതിയില്‍ പോലീസ് കേസെടുക്കുകയും ചെയ്തിരുന്നു.