Booked | ട്രെയിനില്‍ ചായമറിഞ്ഞ് ഏഴുവയസുകാരന് പൊളളലേറ്റ സംഭവത്തില്‍ കേസെടുത്തതായി ബാലാവകാശ കമിഷന്‍ ചെയര്‍മാന്‍ അഡ്വ കെ വി മനോജ് കുമാര്‍

തലശ്ശേരി: (KVARTHA) കണ്ണൂരില്‍ ട്രെയിന്‍ യാത്രയ്ക്കിടെ ചായ വീണ് ഏഴ് വയസുകാരന് പൊള്ളലേറ്റ സംഭവത്തില്‍ കേസെടുത്തതായി ബാലവകാശ കമിഷന്‍ ചെയര്‍മാന്‍ അഡ്വ കെ വി മനോജ് കുമാര്‍ അറിയിച്ചു.

സംഭവത്തില്‍ പാലക്കാട് ഡിവിഷനല്‍ മാനേജരോടും, റെയില്‍വേ, കണ്ണൂര്‍ പൊലീസിനോടും ബാലാവകാശ കമീഷന്‍ അടിയന്തര റിപോര്‍ട് തേടിയിട്ടുണ്ട്. റെയില്‍വേ സുരക്ഷയെ ബാധിക്കുന്നതാണ് ഈ വിഷയമെന്നാണ് വിലയിരുത്തല്‍. ജനുവരി മൂന്നിനായിരുന്നു സംഭവം. തലശ്ശേരി സ്വദേശിയായ ഏഴുവയസുകാരനാണ് കാലിലും കയ്യിലും പൊള്ളലേറ്റത്.


ട്രെയിനില്‍ അമ്മയ്ക്കൊപ്പം യാത്ര ചെയ്യുകയായിരുന്നു കുട്ടി. ട്രെയിന്‍ കണ്ണൂരിലെത്തിയപ്പോഴാണ് സഹയാത്രികന്റെ കയ്യില്‍ നിന്ന് ചായവീണ് കുട്ടിയുടെ കാലിലും കയ്യിലും പൊള്ളലേറ്റത്. ഈ വിവരം ടിടിആറിനെ അറിയിച്ചപ്പോള്‍ സ്റ്റേഷന്‍ മാസ്റ്ററെ കാണാനാണ് പറഞ്ഞത്. തുടര്‍ന്ന് അമ്മയും മകനും ഉള്ളാളത്തിറങ്ങി സ്റ്റേഷന്‍ മാസ്റ്ററോട് വിവരം പറയുകയായിരുന്നു.

സംഭവത്തില്‍ ബാലാവകാശ കമീഷന്‍ സ്വമേധയാ ഇടപെടുകയായിരുന്നു. ബാലാവകാശ കമീഷന്‍ കേസെടുത്തെങ്കിലും സഹയാത്രികന്‍ സ്ഥലത്ത് നിന്നും കടന്നുകളഞ്ഞു. സംഭവത്തില്‍ കേസെടുത്ത ബാലാവകാശ കമീഷന്‍ പാലക്കാട് ഡിവിഷനല്‍ മാനേജരോടും റെയില്‍വേ, കണ്ണൂര്‍ സിറ്റി പൊലീസ് കമിഷണറോടും അടിയന്തര റിപോര്‍ട് തേടിയിട്ടുണ്ട്.