ഷുഹൈബ് വധക്കേസ് സി ബി ഐ അന്വേഷിക്കേണ്ടതില്ലെന്ന് വാദിക്കാന്‍ സര്‍ക്കാര്‍ ഖജനാവില്‍ നിന്നുമെടുത്തത് 34 ലക്ഷം; ഒരു കേസില്‍ മാത്രമായി ഈ സര്‍ക്കാര്‍ നല്‍കുന്ന ഏറ്റവും ഉയര്‍ന്ന അഭിഭാഷക ഫീസ് എന്ന് വിമര്‍ശനം; പ്രതിക്കൂട്ടിലായി കണ്ണൂരിലെ സിപിഎം നേതൃത്വം

തിരുവനന്തപുരം: (www.kvartha.com 07.11.2019) കോണ്‍ഗ്രസ് പ്രവര്‍ത്തകന്‍ ഷുഹൈബ് കൊല്ലപ്പെട്ട സംഭവം സിബിഐ അന്വേഷിക്കേണ്ടതില്ലെന്നു വാദിക്കാന്‍ സംസ്ഥാന സര്‍ക്കാര്‍ 34 ലക്ഷം രൂപ ചെലവിട്ടതായുള്ള വാര്‍ത്ത പുറത്തുവന്നതോടെ വ്യാപകമായ വിമര്‍ശനമാണ് ഉയര്‍ന്നിരിക്കുന്നത് . ഈ സര്‍ക്കാര്‍ ഒരു കേസില്‍ നല്‍കുന്ന ഏറ്റവും ഉയര്‍ന്ന അഭിഭാഷക ഫീസ് ആണ് ഇത്. ഇതോടെ ഈ കേസില്‍ പ്രതിക്കൂട്ടിലായിരിക്കയാണ് കണ്ണൂരിലെ സിപിഎം നേതൃത്വം .

ഷുഹൈബിന്റെ പിതാവ് സി പി മുഹമ്മദാണു സിബിഐ അന്വേഷണം ആവശ്യപ്പെട്ട് ഹൈക്കോടതിയില്‍ ഹര്‍ജി നല്‍കിയത്. ഇതിനെ എതിര്‍ക്കാനാണു വിജയ് ഹന്‍സാരിയ, അമരേന്ദ്ര ശരണ്‍ എന്നീ അഭിഭാഷകരെ പുറത്തുനിന്നു കൊണ്ടുവന്നത്. വിജയ് ഹന്‍സാരിയയ്ക്ക് വാദിക്കാനായി 12.2 ലക്ഷം രൂപ നല്‍കി. അമരേന്ദ്ര ശരണിന് അനുവദിച്ച 22 ലക്ഷം രൂപ കൈമാറിയിട്ടില്ല.


സര്‍ക്കാര്‍ ഏറ്റവും കൂടുതല്‍ തുക ചെലവാക്കിയ കേസ് ഏതെന്ന സണ്ണി ജോസഫിന്റെ ചോദ്യത്തിനാണു നിയമസഭയില്‍ മന്ത്രി എ കെ ബാലന്‍ രേഖാമൂലം മറുപടി നല്‍കിയത്. എന്നാല്‍ ഇതില്‍ ഷുഹൈബിന്റെ പേര് ഒഴിവാക്കി. കേസ് നമ്പര്‍ അല്ലാതെ മറ്റു വിശദാംശങ്ങള്‍ മറുപടിയില്‍ വ്യക്തമാക്കിയുമില്ല.