Arrested | വളപട്ടണത്ത് പൂട്ടിയിട്ട വീടുകുത്തിതുറന്ന് കവര്‍ച്ച: ഓട്ടോറിക്ഷ ഡ്രൈവര്‍മാര്‍ ഉള്‍പ്പെടെ മൂന്ന് പേര്‍ അറസ്റ്റില്‍

കണ്ണൂര്‍: (KVARTHA) വളപട്ടണത്ത് വീടുകുത്തിതുറന്ന് പത്തുപവന്റെ സ്വര്‍ണാഭരണം കവര്‍ച്ച ചെയ്തകേസിലെ മുഖ്യ ആസൂത്രകനായ തളിപറമ്പ് സ്വദേശിയുള്‍പ്പെടെ രണ്ടു പേരെ കൂടി പൊലിസ് അറസ്റ്റു ചെയ്തു. കെ സന്തോഷ്(37), കുമാരന്‍ (48) എന്നിവരെയാണ് വളപട്ടണം എസ്‌ഐ നിധിന്‍ എയുടെ നേതൃത്വത്തില്‍ അറസ്റ്റു ചെയ്തത്.
  
ഈ കേസില്‍ കെ പി ജിതേഷിനെ(46) നേരത്തെ പൊലിസ് അറസ്റ്റു ചെയ്തിരുന്നു. പിടിയിലായ സന്തോഷ് ഇപ്പോള്‍ കണ്ണൂര്‍ നഗരത്തിലെ ചെട്ടിപ്പീടികയ്ക്കു സമീപത്താണ് താമസിക്കുന്നത്. നേരത്തെ അറസ്റ്റിലായ ജിതേഷിനെ ചോദ്യം ചെയ്തപ്പോഴാണ് കവര്‍ച്ചയില്‍ സന്തോഷിന് പങ്കുണ്ടെന്ന് വ്യക്തമായത്.

സന്തോഷിനെ ചോദ്യം ചെയ്തപ്പോള്‍ മോഷ്ടിച്ച സ്വര്‍ണാഭരണങ്ങള്‍ കണ്ണൂര്‍, തലശേരി എന്നിവടങ്ങളിലെ ജ്വല്ലറികളില്‍ വില്‍പന നടത്തിയതായി മൊഴി നല്‍കിയിരുന്നു. ഈ ജ്വല്ലറികളില്‍ നിന്നും പൊലിസ് തൊണ്ടി മുതല്‍ കണ്ടെത്തടുത്തിട്ടുണ്ട്. പോള കുമാരനാണ് കവര്‍ച്ച ആസൂത്രണം ചെയ്തെന്നാണ് പൊലിസ് പറയുന്നത്. ഇതേ തുടര്‍ന്നാണ് തളിപറമ്പ് മുക്കുന്നിലെത്തി കുമാരനെ പിടികൂടിയത്. ഇയാളുടെ താമസസ്ഥലത്തു നിന്നും കവര്‍ച്ചയ്ക്കു ഉപയോഗിച്ച കമ്പിപാരയും മറ്റും കണ്ടെത്തിയിട്ടുണ്ട്.