Assaulted | കടം നല്‍കിയ പണം തിരികെ ചോദിച്ചതിന്റെ പേരില്‍ പത്താംക്ലാസ് വിദ്യാര്‍ഥിയെ സഹപാഠികള്‍ വിവസ്ത്രനാക്കി വടികൊണ്ടും ബെല്‍റ്റ് ഉപയോഗിച്ചും മര്‍ദിച്ചുവെന്നും നിര്‍ബന്ധിച്ച് മദ്യം കുടിപ്പിച്ചെന്നും പരാതി

സംഭവത്തെ കുറിച്ച് പൊലീസ് പറയുന്നത്:

തിങ്കളാഴ്ചയാണ് പരാതിക്കിടയാക്കിയ സംഭവം നടന്നത്. സഹപാഠികള്‍ കാറില്‍ കടത്തിക്കൊണ്ടുപോയി മര്‍ദിക്കുകയായിരുന്നു. നിര്‍ബന്ധിച്ച് മദ്യം കുടിപ്പിച്ചെന്നും വിവസ്ത്രനാക്കി വടികൊണ്ടും ബെല്‍റ്റ് ഉപയോഗിച്ചും മര്‍ദിച്ചെന്നും പരാതിയില്‍ പറയുന്നു.

സഹപാഠിയായ ഒരു വിദ്യാര്‍ഥിക്ക് 16-കാരന്‍ നേരത്തെ 200 രൂപ കടംനല്‍കിയിരുന്നു. ഏറെനാള്‍ കഴിഞ്ഞിട്ടും ഇത് തിരികെ നല്‍കാതിരുന്നതോടെ 16-കാരന്‍ പണം ചോദിച്ചു. ഇതേച്ചൊല്ലി രണ്ടുമാസം മുന്‍പ് ഇരുവരും തമ്മില്‍ തര്‍ക്കമുണ്ടായി. തിങ്കളാഴ്ചയും പണം ചോദിച്ചു. ഇതോടെ 16-കാരനെ പണം വാങ്ങിയ വിദ്യാര്‍ഥിയും മറ്റുസഹപാഠികളും ചേര്‍ന്ന് മര്‍ദിക്കുകയായിരുന്നു.

പരാതിക്കാരന്‍ സുഹൃത്തിനൊപ്പം പാര്‍കിലിരിക്കുന്നതിനിടെയാണ് സഹപാഠികളായ നാലുപേര്‍ കാറിലെത്തിയത്. പണം കടംവാങ്ങിയ സഹപാഠിയും ഇക്കൂട്ടത്തിലുണ്ടായിരുന്നു. കാറില്‍ വിളിച്ചുകയറ്റിയ 16-കാരനെ സൈനികരുടെ ഷൂടിങ് പരിശീലനം കാണാമെന്ന് പറഞ്ഞ് സമീപത്തെ വനമേഖലയിലേക്ക് കൊണ്ടുപോവുകയായിരുന്നു. വനമേഖലയില്‍ കാര്‍ നിര്‍ത്തിയപ്പോള്‍ അവിടെ രണ്ടുപേര്‍ കൂടി കാത്തുനില്‍പ്പുണ്ടായിരുന്നു.

മദ്യലഹരിയിലായിരുന്ന ഇവര്‍ 16-കാരനെ മദ്യം കുടിക്കാന്‍ നിര്‍ബന്ധിച്ചു. പിന്നാലെ വടികള്‍ കൊണ്ടും ബെല്‍റ്റ് ഉപയോഗിച്ചും മര്‍ദിച്ചു. വസ്ത്രങ്ങളും അഴിച്ചുമാറ്റി. വെറുതെ വിടണന്നെ് കരഞ്ഞുപറഞ്ഞിട്ടും പ്രതികള്‍ കൂട്ടാക്കിയില്ല. നിരന്തരം മുഖത്തടിച്ചു. തുടര്‍ന്ന് ഈ രംഗങ്ങളെല്ലാം മൊബൈലില്‍ പകര്‍ത്തിയെന്നും പരാതിയില്‍ പറയുന്നുണ്ട്.

പൊലീസില്‍ പരാതി നല്‍കിയാല്‍ കൊല്ലുമെന്നും പ്രതികള്‍ ഭീഷണിപ്പെടുത്തിയിരുന്നു. എന്നാല്‍, സംഭവത്തിന്റെ വീഡിയോ വ്യാപകമായി പ്രചരിച്ചതോടെ അസ്വസ്ഥനായ വിദ്യാര്‍ഥി വീട്ടില്‍നിന്ന് പുറത്തിറങ്ങാന്‍പോലും മടിച്ചു. ഇതോടെയാണ് കുടുംബം 16-കാരനുമായെത്തി പൊലീസില്‍ പരാതി നല്‍കിയത്.