റാഞ്ചിയിലെ ഹോട്ടലില്‍ നിന്നും 27 ബോംബുകള്‍ കണ്ടെടുത്തു

റാഞ്ചി: ഝാര്‍ഖണ്ഡിന്റെ തലസ്ഥാന നഗരമായ റാഞ്ചിയിലെ ഒരു ചെറുകിട സ്വകാര്യ ഹോട്ടലില്‍ നിന്നും 27 ബോംബുകള്‍ കണ്ടെടുത്തു. എന്‍ഐഎയും ഝാര്‍ഖണ്ഡ് പോലീസും സംയുക്തമായി നടത്തിയ തെരച്ചിലിലാണ് ബോംബുകള്‍ കണ്ടെത്തിയത്. പട്‌ന സ്‌ഫോടനക്കേസിലെ പ്രധാന പ്രതി ഹൈദര്‍ അലി താമസിച്ചിരുന്ന മുറിയില്‍ നടത്തിയ പരിശോധനയിലാണ് ബോംബുകള്‍ കണ്ടെടുത്തത്.

സംഭവവുമായി ബന്ധപ്പെട്ട് നാലു പേരെ പോലീസ് കസ്റ്റഡിയിലെടുത്തു. അതേസമയം കണ്ടെടുക്കപ്പെട്ട ബോംബുകള്‍ നിര്‍വീര്യമാക്കുന്നതിനുള്ള നടപടി ആരംഭിച്ചിട്ടുണ്ട്. കണ്ടെടുത്തവയില്‍ ഏറെയും പൈപ്പ് ആകൃതിയിലുള്ള ബോംബുകളാണ് .പട്‌നയില്‍ നിന്നും കണ്ടെടുത്ത ബോംബുകള്‍ക്ക് സമാനമായ ബോംബുകളാണ് കണ്ടെടുത്തിട്ടുള്ളതെന്ന് പോലീസ് പറഞ്ഞു.

കഴിഞ്ഞ മാസം നരേന്ദ്രമോഡി പങ്കെടുത്ത റാലിക്കിടെയാണ് പട്‌നയില്‍ സ്‌ഫോടന പരമ്പര അരങ്ങേറിയത്. സ്‌ഫോടനത്തില്‍ ആറു പേര്‍ കൊല്ലപ്പെടുകയും 83 പേര്‍ക്ക് പരിക്കേല്‍ക്കുകയും ചെയ്തിരുന്നു. ഇന്ത്യന്‍ മുജാഹിദ്ദീന്റെ റാഞ്ചി ശാഖയാണ് സ്‌ഫോടനത്തിന് പിന്നിലെന്ന് എന്‍.ഐ.എ വ്യക്തമാക്കിയിരുന്നുവെങ്കിലും അവര്‍ ഇതുവരെ ഉത്തരവാദിത്തം ഏറ്റെടുത്തിട്ടില്ല.