പൊങ്കലിനോടനുബന്ധിച്ച് നടന്ന 'ജല്ലിക്കെട്ടില്‍ 50 പേര്‍ക്ക് പരിക്ക്

മധുര: തമിഴ്‌നാട്ടില്‍ പൊങ്കലിനോടനുബന്ധിച്ച് നടന്ന 'ജല്ലിക്കെട്ടിനിടയില്‍ കാഴ്ച്ചക്കാരുള്‍പെടെ 50 പേര്‍ക്ക് പരിക്ക്. ഇതില്‍ ഏഴുപേരുടെ നില ഗുരുതരമാണ്.  മധുരയിലെ അലങ്കന്നൂരിലാണ് സംഭവം. പരിക്കേറ്റവരെ മധുര രാജാജി ആശുപത്രിയില്‍ പ്രവേശിപ്പിച്ചിരിക്കയാണ്.

മധുരയ്ക്കടുത്ത ശിവഗംഗ, വിരുദുനഗര്‍, രമണതപുരം, തേനി എന്നീ ജില്ലകളില്‍ നിന്നുള്ള 552 കാളകളെയാണ് ജെല്ലിക്കെട്ടിനായി കൊണ്ടുവന്നത്.   തമിഴ്‌നാട് ജല്ലിക്കെട്ട് നിയന്ത്രണ നിയമത്തിന്റെയും സുപ്രീംകോടതിയുടെയും കര്‍ശന ഉപാധികളനുസരിച്ചാണ് കാലങ്ങളായി  മത്സരം സംഘടിപ്പിച്ചിരുന്നത്.

ജെല്ലിക്കെട്ടിനു കൊണ്ടുവരുന്ന കാളകളെ മെരുക്കുന്നവര്‍ ക്രൂരമായി ഉപദ്രവിക്കുന്നതിനാലും മത്സരത്തിനിടയില്‍ ജീവന്‍ അപായപ്പെടാന്‍ സാധ്യതയുള്ളതിനാലും മത്സരത്തിന് അനുമതി നല്‍കരുതെന്ന് സന്നദ്ധ സംഘടനകള്‍ ആവശ്യപ്പെട്ടിരുന്നു.

എന്നാല്‍ ഇതിനെതിരെ ജല്ലിക്കെട്ടനുകൂലികള്‍ സുപ്രീംകോടതിയെ സമീപിക്കുകയും കര്‍ശന ഉപാധികളോടെ ജല്ലിക്കെട്ടിന് കോടതി അനുമതി നല്‍കുകയുമായിരുന്നു.


മത്സരത്തിനു മുമ്പ് കാളകളെ വൈദ്യപരിശോധനയ്ക്ക്
വിധേയമാക്കണമെന്നും കാളകളെ മെരുക്കുന്നയാള്‍ മദ്യപിച്ചിട്ടില്ലെന്ന് ഉറപ്പ് വരുത്തണമെന്നും അതോറിറ്റിയുടെ നിര്‍ദ്ദേശങ്ങളില്‍ പറഞ്ഞിട്ടുണ്ട്. മധുരയിലും തിരുച്ചിറപ്പള്ളിയിലും കഴിഞ്ഞ ദിവസം നടന്ന ജല്ലിക്കെട്ടിനിടെ 90 പേര്‍ക്ക് പരിക്കേറ്റിരുന്നു. സംഭവത്തെ കുറിച്ച് അന്വേഷിക്കാന്‍ സര്‍ക്കാര്‍ ഉത്തരവിട്ടു.
ഷാര്‍ജയില്‍ മരിച്ച ബദറുദ്ദീന്റെ മൃതദേഹം വെള്ളിയാഴ്ച നാട്ടിലെത്തിക്കും