Floral Tribute | 'രാഷ്ട്ര നിര്‍മാണത്തിനായി ജീവിതം ഉഴിഞ്ഞുവച്ച വ്യക്തിത്വം'; അടല്‍ ബിഹാരി വാജ്പേയിയുടെ ജന്മവാര്‍ഷികത്തില്‍ സദൈവ് അടലിലെത്തി പ്രധാനമന്ത്രി നരേന്ദ്രമോദി പുഷ്പച്ചക്രം സമര്‍പിച്ചു

ന്യൂഡെല്‍ഹി: (KVARTHA) മുന്‍ പ്രധാനമന്ത്രി അടല്‍ ബിഹാരി വാജ്പേയിയുടെ ജന്മദിനമായ ഡിസംബര്‍ 25 ദേശീയ സദ്ഭരണ ദിനമായാണ് രാജ്യം ആചരിക്കുന്നത്. നയതന്ത്രജ്ഞന്‍, സ്വാതന്ത്ര്യസമര സേനാനി, ഭരണജ്ഞന്‍ എന്നീ നിലകളില്‍ വ്യക്തിമുദ്ര പതിപ്പിച്ച നേതാവായിരുന്നു അദ്ദേഹം.

1924ല്‍ മധ്യപ്രദേശിലെ ഗ്വാളിയാറിലാണ് വാജ്പേയി ജനിച്ചത്. വിദ്യാര്‍ഥി സംഘടന പ്രവര്‍ത്തനങ്ങളില്‍ സജീവമായിരുന്ന വാജ്പേയി, ക്വിറ്റ് ഇന്‍ഡ്യാ സമരത്തില്‍ ഉള്‍പെടെ പങ്കെടുത്ത് സ്വാതന്ത്ര്യ പോരാട്ടങ്ങളുടെ ഭാഗമായിരുന്നു.

അദ്ദേഹത്തിന്റെ ജന്മവാര്‍ഷികത്തില്‍ സമാധി സ്ഥലമായ സദൈവ് അടലിലെത്തി പ്രധാനമന്ത്രി നരേന്ദ്രമോദി ഉള്‍പെടെയുള്ള പ്രമുഖര്‍ പുഷ്പച്ചക്രം സമര്‍പിച്ചു. പ്രധാനമന്ത്രി നരേന്ദ്രമോദി അടക്കമുള്ളവര്‍ വാജ്പേയിയെ അനുസ്മരിച്ച് എക്‌സില്‍ കുറിപ്പ് പങ്കുവച്ചിരുന്നു.

രാഷ്ട്ര നിര്‍മാണത്തിനായി ജീവിതം ഉഴിഞ്ഞുവച്ച വ്യക്തിത്വമായിരുന്നു വാജ്‌പേയിയെന്ന് നരേന്ദ്രമോദി ട്വിറ്ററില്‍ പറഞ്ഞു. ഭാരതാംബയെ സേവിക്കാനായി സമര്‍പിക്കപ്പെട്ട അദ്ദേഹത്തിന്റെ ജീവിതം എല്ലാകാലത്തും പ്രചോദനത്തിന്റെ ഉറവിടമാണെന്നും പ്രധാനമന്ത്രി കൂട്ടിച്ചേര്‍ത്തു.