ന്യൂഡൽഹി: (KVARTHA) ഒരു സംസ്ഥാനത്തും ഒരു ഭാഷയും അടിച്ചേൽപ്പിക്കില്ലെന്ന് കേന്ദ്ര സർക്കാർ രാജ്യസഭയിൽ അറിയിച്ചു. കേന്ദ്ര വിദ്യാഭ്യാസ സഹമന്ത്രി ഡോ. സുബോധ് മജുംദാർ നൽകിയ രേഖാമൂലമുള്ള മറുപടിയിൽ, ദേശീയ വിദ്യാഭ്യാസ നയം (NEP) 2020 അനുസരിച്ച് ഭരണഘടനയെയും ജനങ്ങളുടെ ആഗ്രഹങ്ങളെയും കണക്കിലെടുത്ത് ത്രിഭാഷാ പദ്ധതി തുടരുമെന്ന് വ്യക്തമാക്കി. എന്നാൽ ത്രിഭാഷാ പദ്ധതിയിൽ ഒരു സംസ്ഥാനത്തും ഒരു ഭാഷയും നിർബന്ധമാക്കില്ലെന്നും അദ്ദേഹം പറഞ്ഞു.

ദേശീയ വിദ്യാഭ്യാസ നയം അനുസരിച്ച് കുട്ടികൾക്ക് മൂന്ന് ഭാഷകൾ പഠിക്കാം. ഈ ഭാഷകൾ തിരഞ്ഞെടുക്കുന്നത് സംസ്ഥാനങ്ങൾക്കും വിദ്യാർത്ഥികൾക്കും തീരുമാനിക്കാം. എന്നാൽ അതിൽ രണ്ട് ഭാഷകൾ എങ്കിലും ഇന്ത്യയിൽ നിന്ന് തന്നെയുള്ള ഭാഷകളായിരിക്കണം. സിപിഎം എം പി ഡോ. ജോൺ ബ്രിട്ടാസ് ഉന്നയിച്ച ചോദ്യത്തിന് മറുപടി പറയുകയായിരുന്നു മന്ത്രി. ദേശീയ വിദ്യാഭ്യാസ നയം 2020 ന്റെ കീഴിൽ ഹിന്ദി അടിച്ചേൽപ്പിക്കുന്നതിനെതിരെ തമിഴ്‌നാട്ടിൽ നടക്കുന്ന ആശങ്കകളും പ്രക്ഷോഭങ്ങളും സർക്കാരിന് അറിയാമോയെന്നായിരുന്നു അദ്ദേഹത്തിന്റെ ചോദ്യം.

ആറാം ക്ലാസ്സിലോ ഏഴാം ക്ലാസ്സിലോ പഠിക്കുമ്പോൾ, കുട്ടികൾക്ക് അവർ പഠിക്കുന്ന മൂന്ന് ഭാഷകളിൽ മാറ്റങ്ങൾ വരുത്താൻ അവസരമുണ്ട്. എന്നാൽ, സ്കൂൾ വിദ്യാഭ്യാസം കഴിയുമ്പോഴേക്കും മൂന്ന് ഭാഷകളിലും (ഒരു ഇന്ത്യൻ ഭാഷ സാഹിത്യ തലത്തിൽ ഉൾപ്പെടെ) കുട്ടികൾക്ക് നല്ല കഴിവ് ഉണ്ടായിരിക്കണം. കുട്ടികൾക്ക് ഇഷ്ടമുള്ള ഭാഷകൾ തിരഞ്ഞെടുക്കാൻ പുതിയ വിദ്യാഭ്യാസ നയം (എൻഇപി 2020) അനുവദിക്കുന്നു. പക്ഷേ, അവർ തിരഞ്ഞെടുക്കുന്ന മൂന്ന് ഭാഷകളിൽ രണ്ടെണ്ണമെങ്കിലും ഇന്ത്യയിൽ ഉപയോഗിക്കുന്ന ഭാഷകൾ ആയിരിക്കണമെന്നും മന്ത്രി വ്യക്തമാക്കി.

ദേശീയ വിദ്യാഭ്യാസ നയം 2020 ലെ 4.12 ഖണ്ഡിക മന്ത്രി ഉദ്ധരിച്ചു. ഗവേഷണങ്ങൾ വ്യക്തമായി കാണിക്കുന്നത് രണ്ട് മുതൽ എട്ട് വയസ്സുവരെയുള്ള കുട്ടികൾ വളരെ വേഗത്തിൽ ഭാഷകൾ പഠിച്ചെടുക്കുന്നു എന്നും ചെറുപ്പത്തിൽ തന്നെ ഒന്നിലധികം ഭാഷകൾ പഠിക്കുന്നത് കുട്ടികളുടെ മാനസിക വികാസത്തിന് വലിയ ഗുണം ചെയ്യും എന്നുമാണ്. അതിനാൽ, കുട്ടികൾക്ക് ചെറുപ്പം മുതലേ (പ്രത്യേകിച്ച് മാതൃഭാഷയ്ക്ക് ഊന്നൽ നൽകി) വിവിധ ഭാഷകൾ പരിചയപ്പെടുത്തും. 

No language to be imposed on any state under three-language formula, languages learned by children to be choices of states and students: Education Ministry tells Rajya Sabha. pic.twitter.com/z7q0l0lQ5a

— Press Trust of India (@PTI_News) March 19, 2025

എല്ലാ ഭാഷകളും രസകരമായി പഠിപ്പിക്കും. കുട്ടികൾക്ക് എളുപ്പത്തിൽ മനസ്സിലാകുന്ന രീതിയിലായിരിക്കും പഠനം. ധാരാളം സംസാരിച്ചും, ആദ്യ വർഷങ്ങളിൽ മാതൃഭാഷയിൽ വായനയും തുടർന്ന് എഴുത്തും, മൂന്നാം ക്ലാസ് മുതൽ മറ്റ് ഭാഷകളിൽ വായിക്കാനും എഴുതാനുമുള്ള കഴിവുകളും വികസിപ്പിക്കും. വിവിധ ഭാഷകൾ പഠിപ്പിക്കുന്നതിനും പ്രചരിപ്പിക്കാനും ആധുനിക സാങ്കേതിക വിദ്യകൾ ഉപയോഗിക്കും.

ഉയർന്ന നിലവാരമുള്ള പാഠപുസ്തകങ്ങൾ മാതൃഭാഷയിൽ ലഭ്യമാക്കുന്നതിനും അധ്യാപകർ പഠിപ്പിക്കുമ്പോൾ ദ്വിഭാഷാ സമീപനം ഉപയോഗിക്കുന്നതിനും എൻ‌ഇ‌പി 2020 നയം വ്യവസ്ഥ ചെയ്യുന്നുണ്ട്. ഈ ലക്ഷ്യം നടപ്പാക്കുന്നതിനായി, സർക്കാർ സ്കൂൾ, കോളേജ് തലങ്ങളിൽ ബഹുഭാഷാത്വം സംയോജിപ്പിക്കുകയാണ്. ഇതിന്റെ ഭാഗമായി ഇന്ത്യൻ ഭാഷകളിൽ പഠന സാമഗ്രികൾ ലഭ്യമാക്കുന്നു. അതുവഴി വിദ്യാർത്ഥികൾക്ക് അവരുടെ മാതൃഭാഷയിലോ പ്രാദേശിക ഭാഷയിലോ പഠിക്കാൻ അവസരം ലഭിക്കുമെന്നും മന്ത്രി കൂട്ടിച്ചർത്തു.

ഈ വാർത്ത ഷെയർ ചെയ്യുക, നിങ്ങളുടെ അഭിപ്രായങ്ങൾ കമന്റുകളായി രേഖപ്പെടുത്തുക.

The Central Government has clarified in the Rajya Sabha that no language will be imposed on any state under the trilingual policy of the National Education Policy. The Union Minister of State for Education assured that the Constitution and the interests of the people will be protected.

#NationalEducationPolicy #LanguagePolicy #India #Education #CentralGovernment #RajyaSabha