Floor Test | ഹരിയാനയില്‍ വിശ്വാസ വോടെടുപ്പ് നടത്തണം: ഗവര്‍ണര്‍ക്ക് കത്തയച്ച് മുന്‍ ഉപമുഖ്യമന്ത്രി ദുഷ്യന്ത് ചൗട്ടാല

ചണ്ഡീഗഡ്: (KVARTHA) ഹരിയാനയില്‍ വിശ്വാസ വോടെടുപ്പ് നടത്തണമെന്ന് ആവശ്യപ്പെട്ട് ഗവര്‍ണര്‍ക്ക് കത്തയച്ച് മുന്‍ ഉപമുഖ്യമന്ത്രിയും ജെജെപി നേതാവുമായ ദുഷ്യന്ത് ചൗട്ടാല. മൂന്ന് സ്വതന്ത്ര എംഎല്‍എമാര്‍ സര്‍കാരിന് പിന്തുണ പിന്‍വലിച്ചതിനെ തുടര്‍ന്നുള്ള രാഷ്ട്രീയ നീക്കങ്ങള്‍ക്കിടെയാണ് വിശ്വാസ വോടെടുപ്പ് നടത്തണമെന്ന ആവശ്യം ചൗട്ടാല ഉയര്‍ത്തുന്നത്. സര്‍കാരിന് ഭൂരിപക്ഷം നഷ്ടമായതായി ഗവര്‍ണര്‍ ബന്ദാരു ദത്താത്രേയയ്ക്ക് അയച്ച കത്തില്‍ ചൗട്ടാല ചൂണ്ടിക്കാട്ടുന്നു.

ചൊവ്വാഴ്ചയാണ് സ്വതന്ത്ര എംഎല്‍എമാര്‍ രാജിവച്ചത്. ദുഷ്യന്ത് ചൗട്ടാലയുടെ ജെജെപി രണ്ടു മാസം മുന്‍പ് സര്‍കാരിനുള്ള പിന്തുണ പിന്‍വലിച്ചിരുന്നു. പിന്നീട് സ്വതന്ത്ര എംഎല്‍എമാരുടെ പിന്തുണയോടെയാണ് ബിജെപി സര്‍കാര്‍ രൂപീകരിച്ചത്. സര്‍കാരിനെതിരെ അവിശ്വാസ പ്രമേയം കൊണ്ടുവന്നാല്‍ ജെജെപി പിന്തുണയ്ക്കുമെന്ന് ചൗട്ടാല പറഞ്ഞു. എന്നാല്‍ കോണ്‍ഗ്രസുമായി ചേര്‍ന്ന് സര്‍കാര്‍ രൂപീകരിക്കുന്നത് സംബന്ധിച്ചുള്ള സൂചനകളൊന്നും തന്നെ ഇതുവരെ നല്‍കിയിട്ടില്ല.