Health Tips | ആരോഗ്യം മെച്ചപ്പെടുത്താനും രോഗങ്ങളെ അകറ്റി നിര്‍ത്താനും ഈ 10 കാര്യങ്ങള്‍ നിര്‍ബന്ധമായും അറിഞ്ഞിരിക്കണം!

ന്യൂഡെൽഹി: (KVARTHA) ഏപ്രിൽ ഏഴ് ലോകാരോഗ്യ ദിനമായി ആചരിക്കുന്നു. ലോകാരോഗ്യ സംഘടനയുടെ (WHO) സ്ഥാപക ദിനമാണ് ഇത്. ഈ ദിവസം ലോകമെമ്പാടുമുള്ള ആളുകളെ ആരോഗ്യ സംബന്ധമായ പ്രശ്നങ്ങളെക്കുറിച്ചും ആരോഗ്യത്തിനുള്ള അവകാശത്തെക്കുറിച്ചും ബോധവൽക്കരിക്കുന്നു. എല്ലാ വർഷവും ഈ ദിനത്തിൽ ലോകാരോഗ്യ സംഘടന ആഗോള ആരോഗ്യ പ്രശ്നങ്ങളിൽ ശ്രദ്ധ കേന്ദ്രീകരിക്കുന്നു. 2024 ലെ ലോകാരോഗ്യ ദിനത്തിന്റെ പ്രമേയം 'എന്റെ ആരോഗ്യം, എന്റെ അവകാശം' (My Health, My Right) എന്നതാണ്.

നല്ല ആരോഗ്യം നമ്മുടെ ജീവിതത്തിന്റെ അടിത്തറയാണ്. ശാരീരികമായും മാനസികമായും ആരോഗ്യമുള്ളവരായിരിക്കുമ്പോൾ ജീവിതം പൂർണതയിൽ ആസ്വദിക്കാൻ നമുക്ക് സാധിക്കും. ചെറിയ ചില ജീവിതശൈലി മാറ്റങ്ങളിലൂടെ നിങ്ങളുടെ ആരോഗ്യം മെച്ചപ്പെടുത്താനും രോഗങ്ങളെ അകറ്റി നിർത്താനും കഴിയും. ശ്രദ്ധിക്കേണ്ട 10 കാര്യങ്ങൾ അറിയാം.

1. ആരോഗ്യകരമായ ഭക്ഷണക്രമം:

പഴങ്ങൾ, പച്ചക്കറികൾ, ധാന്യങ്ങൾ എന്നിവ അടങ്ങിയ സമീകൃത ഭക്ഷണക്രമം പിന്തുടരുക. കൊഴുപ്പ്, പഞ്ചസാര, ഉപ്പ് എന്നിവയുടെ അമിത ഉപയോഗം ഒഴിവാക്കുക. ധാരാളം വെള്ളം കുടിക്കുക.

2. പതിവ് വ്യായാമം:

ആഴ്ചയിൽ കുറഞ്ഞത് 150 മിനിറ്റ് മിതമായ വ്യായാമം അല്ലെങ്കിൽ 75 മിനിറ്റ് ശക്തമായ വ്യായാമം ചെയ്യുക.
നടത്തം, ഓട്ടം, സൈക്ലിംഗ് തുടങ്ങിയ എളുപ്പത്തിൽ ചെയ്യാവുന്ന വ്യായാമങ്ങൾ തിരഞ്ഞെടുക്കാം. പതിവ് വ്യായാമം ശരീരഭാരം നിയന്ത്രിക്കാനും രക്തസമ്മർദം കുറയ്ക്കാനും പ്രമേഹ സാധ്യത കുറയ്ക്കാനും സഹായിക്കും. പരമാവധി നിങ്ങൾ എഴുന്നേറ്റ് നടക്കുകയോ ചലിക്കുകയോ ചെയ്യുക. കസേരയിൽ ദീർഘനേരം ഇരിക്കുന്നത് ഒഴിവാക്കുക.

3. മതിയായ ഉറക്കം:

മുതിർന്നവർക്ക് രാത്രിയിൽ 7-8 മണിക്കൂർ ഉറക്കം ആവശ്യമാണ്. ഉറക്കത്തിന്റെ ഗുണനിലവാരം മെച്ചപ്പെടുത്താൻ, കൃത്യമായ സമയത്ത് ഉറങ്ങാൻ ശ്രമിക്കുകയും ഉറങ്ങുന്നതിന് മുമ്പ് മൊബൈൽ ഫോൺ അടക്കമുള്ള ഇലക്ട്രോണിക് ഉപകരണങ്ങളുടെ ഉപയോഗം കുറയ്ക്കുകയും ചെയ്യുക.

4. മാനസിക സമ്മർദം കുറയ്ക്കുക:

യോഗ, ധ്യാനം, ആഴത്തിലുള്ള ശ്വസനം പോലുള്ള പ്രവർത്തനങ്ങൾ പരിശീലിക്കുക. നിങ്ങൾക്ക് ഇഷ്ടമുള്ള കാര്യങ്ങൾ ചെയ്യാനും സമയം കണ്ടെത്തുക. സംഗീതം, വായന, കല എന്നിവ പോലുള്ള ഹോബികൾ, സാമൂഹിക ഇടപെടലുകൾ എന്നിവയിലൂടെ മനസിനെ ശാന്തമാക്കുക.

5. പുകവലി ഒഴിവാക്കുക:

പുകവലി നിങ്ങളുടെ ആരോഗ്യത്തിന് ഏറ്റവും വലിയ ദോഷം ചെയ്യുന്ന ഒന്നാണ്. ഹൃദ്രോഗം, ശ്വാസകോശ സംബന്ധമായ അസുഖങ്ങൾ, കാൻസർ എന്നിവയ്ക്കുള്ള സാധ്യത വർദ്ധിപ്പിക്കുന്നു. പുകവലി ഉപേക്ഷിക്കാൻ നിങ്ങൾക്ക് ഡോക്ടറുടെ സഹായം തേടാവുന്നതാണ്.

6. മദ്യപാനം നിയന്ത്രിക്കുക:

അമിത മദ്യപാനം കരൾ, ഹൃദയം, തലച്ചോർ എന്നിവയ്ക്ക് ഗുരുതരമായ കേടുപാടുകൾ വരുത്തും. മിതമായ അളവിൽ മാത്രം മദ്യപിക്കുകയോ പൂർണമായും ഒഴിവാക്കുകയോ ചെയ്യുന്നതാണ് നല്ലത്.

7. പതിവ് ആരോഗ്യ പരിശോധനകൾ:

പ്രായത്തിനനുസരിച്ച് പതിവ് ആരോഗ്യ പരിശോധനകൾ നടത്തുന്നത് രോഗങ്ങൾ നേരത്തെ കണ്ടുപിടിക്കാനും ചികിത്സ എളുപ്പമാക്കാനും സഹായിക്കും.

8. വൃത്തിയും ശുചിത്വവും പാലിക്കുക:

കൈകൾ പതിവായി കഴുകുക, പരിസര ശുചിത്വം പാലിക്കുക തുടങ്ങിയ ശുചിത്വ ശീലങ്ങൾ രോഗങ്ങളുടെ വ്യാപനം തടയാൻ സഹായിക്കും. ഭക്ഷണം കഴിക്കുന്നതിനു മുമ്പും ശേഷവും, ശൗചാലയത്തിൽ പോയതിന് ശേഷവും കൈകൾ സോപ്പും വെള്ളവും ഉപയോഗിച്ച് കഴുകുന്നത് രോഗാണുക്കളുടെ വ്യാപനം തടയാൻ സഹായിക്കും. വീടും പരിസരവും വൃത്തിയായി സൂക്ഷിക്കുക. കൊതുകു വളരാൻ സാധ്യതയുള്ള സാഹചര്യങ്ങൾ ഒഴിവാക്കുക.

9. ഡോക്ടറുടെ സഹായം തേടുക:

നിങ്ങളുടെ ആരോഗ്യ സംബന്ധമായ എന്തൊരു സംശയവും ഡോക്ടറോട് ചർച്ച ചെയ്യുക. സ്വയം ചികിത്സ ഒഴിവാക്കുക.

10. പോസിറ്റീവ് മനോഭാവം:

സന്തോഷവും പോസിറ്റീവ് മനോഭാവവും നിങ്ങളുടെ മൊത്തത്തിലുള്ള ആരോഗ്യത്തെ മെച്ചപ്പെടുത്തുന്നു. സമ്മർദം കുറയ്ക്കാനും രോഗപ്രതിരോധ ശേഷി വർധിപ്പിക്കാനും ഇത് സഹായിക്കും. നിങ്ങളുടെ ജീവിതശൈലിയിൽ ചെറിയ മാറ്റങ്ങൾ വരുത്തുക വഴി നിങ്ങളുടെ ആരോഗ്യം മെച്ചപ്പെടുത്താനും രോഗങ്ങളെ അകറ്റി നിർത്താനും സാധിക്കും. ആരോഗ്യമുള്ള ജീവിതം നയിക്കാൻ ഈ നിർദേശങ്ങൾ പാലിക്കുക.

Keywords: News, National, New Delhi, World Health Day, My Health, My Right, Health, Lifestyle, Doctor, Sleep, Exercise, Food, How To Protect Your Health.
< !- START disable copy paste -->